Ɛksodɔs 24 - Krio Fɔs Oli Baybul

PAPA GƆD Kɔnfam In Kɔvinant Wit Di Pipul Dɛn

¹ PAPA GƆD tɔk to Mozis. I se, “Tek Erɔn, Nadab, ɛn Abiu, wit di sɛvinti edman dɛn na Izrɛl. Kam ɔp di mawnten fɔ wɔship mi bɔt una fɔ de dɔŋ say lilibit.

² Na yu Mozis nɔmɔ fɔ kam nia mi. Di ɔda wan dɛn fɔ de dɔŋ say, dɛn ɔl di ɔda pipul dɛn fɔ de dɔŋ di mawnten.”

³ Mozis go dɔŋ go tɛl di pipul dɛn ɔl wetin PAPA GƆD se ɛn ɔl di lɔ dɛn we i gi. Di pipul dɛn ɔl ansa wit wan vɔys se dɛn go du ɔl wetin PAPA GƆD se.

⁴ Mozis insɛf rayt dɔŋ ɔl wetin PAPA GƆD se. Mozis grap ali mɔnin ɛn tek twɛlv ston bil ɔlta dɔŋ di mawnten. Ich ston bin de rɛprizɛnt wan pan di twɛlv fambul dɛn na Izrɛl.

⁵ I sɛn sɔm yɔŋ man dɛn fɔ bɔn animal as sakrifays ɛn kil kaw fɔ mek pis sakrifays to PAPA GƆD.

⁶ Mozis tek af pan di animal dɛn blɔd put am na bol. I sprinkul di ɔda af na di ɔlta.

⁷ Dɔn i tek di Kɔvinant buk we na de ɔl PAPA GƆD in lɔ rayt ɛn rid am lawd wan to di pipul dɛn. Dɛn ɔl ansa se dɛn go obe PAPA GƆD ɛn du wetin i se.

⁸ Mozis tek di blɔd ɛn sprinkul am pan di pipul dɛn, dɔn i tɛl dɛn se dis na di blɔd we kɔnfam di Kɔvinant we PAPA GƆD dɔn mek wit dɛn we i gi dɛn ɔl in lɔ.

⁹ Mozis, Erɔn, Nadab, Abiu ɛn di sɛvinti edman dɛn na Izrɛl go ɔp di mawnten,

¹⁰ ɛn dɛn si Izrɛl dɛn PAPA GƆD. Ɔnda in fut i tan lɛk dɛn mek pevmɛnt wit safaya, na so i klia ɛn brayt lɛkɛ di blu skay.

¹¹ PAPA GƆD nɔ du di Izrɛl edman dɛn natin; dɛn si PAPA GƆD ɛn dɛn ɔl it ɛn drink togɛda.

Mozis Rich Ɔp Mawnt Saynay

¹² PAPA GƆD tɔk to Mozis. I se, “Kam ɔp di mawnten kam wet; a go gi yu ston tablɛt dɛn we na pan dɛn a dɔn rayt ɔl di lɔ ɛn kɔmandmɛnt dɛn we fɔ tich di Izrɛlayt dɛn.”

¹³ So Mozis go ɔp di mawnten. I kɛr in asistant Jɔshwa ɔp di oli mawnten.

¹⁴ Bifo dɛn go ɔp, i tɛl di edman dɛn se lɛ dɛn wet usay dɛn de sote dɛn kam bak. I se Erɔn ɛn Ɔ de wit dɛn, ɛn if ɛni kes de fɔ tɔk, na fɔ kɛr am to dɛn.

¹⁵ As Mozis de go ɔp di mawnten, klawd kam dɔŋ ɛn kɔba di mawnten.

¹⁶ Na PAPA GƆD bin de na di klawd ɛn i bin tan lɛkɛ layt. Di klawd kɔba di mawnten fɔ siks de. Dɔn di de we mek sɛvin nain PAPA GƆD kɔl Mozis na di klawd.

¹⁷ Di we aw PAPA GƆD apia na di mawnten bin tan lɛkɛ faya we de bɔn na di Izrɛlayt dɛn yay.

¹⁸ Di Klawd kɔba Mozis tek am go rayt ɔp di mawnten. I tek fɔti de ɛn fɔti nɛt ɔp na di mawnten.