Ɛksodɔs 23 - Krio Fɔs Oli Baybul

Di Lɔ Bɔt Jɔstis Ɛn Fia Ple

¹ “Una nɔ fɔ lay pan pɔsin, ɛn sɛf una nɔ fɔ jɔyn an wit ɛni wikɛd pɔsin fɔ lay.

² Una nɔ fala ɛni krawd fɔ du bad. Una nɔ fala dɛn fɔ gi fɔls witnɛs, fɔ tɔn rayt to rɔŋ.

³ Una nɔ tɔn poman in rayt to rɔŋ wɛn una de tɔk kes.

⁴ “If una si una ɛnimi in kaw ɔ in dɔŋki mis in rod, una fɔ kɛr am go bak to am.

⁵ “If una si in dɔŋki fɔdɔm na grɔn wit di lod we i tot, una ɛp di dɔŋki mek i tinap bak, una nɔ jɛs pas go.

⁶ Nɔ tek poman in rayt nain an we i go na kot.

⁷ Dɛn wan we de jɔj kes fɔ jɔj tret. Dɛn nɔ fɔ lay pan poman. Dɛn nɔ fɔ sɛntɛns inosɛnt ɔ pɔsin we de waka tret na PAPA GƆD in yay fɔ day. If dɛn du dat, a nɔ go fɔgiv dɛn.

⁸ Una nɔ fɔ tek brayb na ɛnibɔdi in an, bikɔs brayb de mek pɔsin lɔk in yay ɛn mek inosɛnt pɔsin sɔfa.

⁹ “Una nɔ tek advantej pan fɔrina; una no wetin i tan lɛk fɔ bi trenja. Una no se unasɛf na bin trenja na Ijipt.

Di Lɔ Bɔt Di Sɛvin Ia Ɛn Di Sɛvin De

¹⁰ “Una fɔ plant fɔ siks ia ɛn avɛst wetin una plant,

¹¹ bɔt di ia we mek sɛvin una nɔ fɔ plant ɛnitin, ɛn una nɔ fɔ go sɛf na una fam. Una fɔ lɛf ɔl wetin de de fɔ dɛn po wan dɛn fɔ it. Wetin dɛn nɔ ebul fɔ it, dɛn animal go it am. Dɔn una fɔ lɛf una vayn gadin ɛn ɔliv gadin dɛnsɛf fɔ di po wan dɛn.

¹² Na siks de nɔmɔ una fɔ wok fɔ, dɔn di de we mek sɛvin una fɔ blo. Una fɔ mek dɛn slev we de wok fɔ una, dɛn fɔrina ɛn dɛn animal dɛnsɛf blo.

¹³ “Una kiaful fɔ du ɔl wetin a dɔn tɛl una; una nɔ pre to ɔda gɔd dɛn; infakt una nɔ kɔl dɛn nem sɛf na una mɔt.

Di Tri Big Ɔlide Dɛn

¹⁴ “Una fɔ mek tri ɔlide insay di ia fɔ ɔna mi.

¹⁵ Di fɔs wan we na di ɔlide fɔ it bred we nɔ gɛt yist pan am, fɔ bi insay Abib mɔnt, dat na dis mɔnt we una lɛf Ijipt. Una mek di ɔlide ya fɔ ɔna mi. Nɔbɔdi nɔ fɔ kam bifo mi ɛmti an.

¹⁶ Di sɛkɛn ɔlide na di wan we briŋ di fɔs tin dɛn we una avɛst. Dat na dɛn sid we una plant. Di las wan na di ɔlide fɔ avɛst una frut dɛn we kin mek una slip na bafa.

¹⁷ Di man dɛn fɔ kip dɛn ɔlide ya tri tɛm insay di ia fɔ wɔship mi PAPA GƆD we na una PAPA GƆD.

¹⁸ Una nɔ fɔ yuz animal in blɔd mek sakrifays to mi wit it we gɛt yist pan am. Una mek shɔ se una bɔn di animal in fat mek i nɔ slip te di nɛks de.

¹⁹ Na di bɛst pat pan wetin una avɛst na una gadin una fɔ briŋ kam to mi PAPA GƆD una PAPA GƆD as sakrifays. Una nɔ kuk got pikin we de sɔk bɔbi.

PAPA GƆD Gi Ɔda Ɛn Prɔmis To Di Pipul Dɛn

²⁰ “A de sɛn wan enjɛl go bifo una fɔ de gyad una na rod te una rich na di ples we a dɔn rɛdi fɔ una.

²¹ Una rɛspɛkt am ɛn du wetin i se bikɔs na mi sɛn am. If una mek traŋayes i go dil wit una.

²² Bɔt if una obe am ɛn du ɔl wetin a se, a go dil wit una ɛnimi dɛn ɛn fɛt dɛn wan we de fɛt una.

²³ We mi enjɛl de bifo una te una rich to dɛn Amɔrayt, dɛn Itayt, dɛn Pɛrizayt, dɛn Kenanayt, dɛn Ivayt ɛn dɛn Jɛbyusayt dɛn land, a go dɔnawe wit dɛn ɔl.

²⁴ Una nɔ fɔ butu to dɛn gɔd dɛn fɔ wɔship dɛn, ɛn una nɔ fɔ falamakata dɛn fɔ de wɔship lɛkɛ aw dɛn de wɔship. Una pwɛl pwɛl dɛn gɔd dɛn ɛn brok di ston pila dɛn we dɛn mek fɔ wɔship dɛn gɔd.

²⁵ Na mi PAPA GƆD una fɔ wɔship, ɛn if una wɔship mi, a go blɛs una wit bɔku it ɛn wata, ɛn a nɔ go mek wan sik ol una.

²⁶ Nɔn uman nɔ go de we in bɛlɛ go wes ɔ nɔ go gɛt pikin. A go gi una ɔl lɔŋ layf.

²⁷ A go mek ɔl dɛn wan we de agens una fred mi, dɔn a go ib dombolo pan dɛn wan we una de fɛt. A go mek una ɛnimi dɛn rɔnawe lɛf una.

²⁸ A go mek dɛn Ivayt, dɛn Kenanayt ɛn dɛn Itayt dɛn we na una ɛnimi dɛn skyad. As aw una de rich na di land na so a go de drɛb dɛn.

²⁹ A nɔ go jɛs tek wan ia nɔmɔ fɔ drɛb dɛn bikɔs if a du so, di land go jɛs lɛf ɛmti wan, ɛn na soso wayl animal dɛn go de de.

³⁰ A go tek mi tɛm drɛb dɛn kɔmɔt de te una bɔku fɔ tek di wanol ples.

³¹ A go mek una bawndri bigin na di Rɛd Si te rich to di Filistin dɛn Si, dɔn frɔm di ples we pɔsin nɔ go ebul tap te rich dɔŋ di Riva Yufretis. A go mek una ebul di pipul dɛn we de na di kɔntri ɛn una go drɛb dɛn as una de go.

³² Una nɔ tay nɔn bagin wit dɛn, ɔ wit dɛn gɔd dɛn.

³³ Infakt, sɛf una nɔ fɔ mek dɛn tap wit una, bikɔs dɛn go mek una sin to mi. If una wɔship dɛn gɔd dɛn, nainsay big big trap una go fɔdɔm.”