Ɛksodɔs 1 - Krio Fɔs Oli Baybul

Dɛn Trit Di Izrɛlayt Dɛn Bad Wan Na Ijipt

¹ Jekɔb in pikin dɛn we go Ijipt wit am wit dɛn famili dɛn na:

² Rubɛn, Simiɔn, Livay, Juda,

³ Isaka, Zɛbyulɔn, Bɛnjamin,

⁴ Dan, Naftali, Gad ɛn Asha.

⁵ Ɔl ɛn ɔl dɛn pipul ya we na bin Jekɔb in yon jɛnareshɔn, na bin sɛvinti. Bɔt Josɛf we na wan pan dɛn, bin dɔn de na Ijipt.

⁶ I te, i te Josɛf day. In brɔda dɛn ɛn ɔl da jɛnareshɔn de sɛf day.

⁷ Bɔt dɛn yon jɛnareshɔn dɛn we na di Izrɛlayt dɛn, bin dɔn bɔn bɔku bɔku pikin dɛn. Dɛn bin so bɔku ɛn dɛn de ɔlɔbɔt na di kɔntri.

⁸ Afta sɔntɛm, wan kiŋ we nɔ no natin bɔt Josɛf ɛn wetin i bin dɔn du bigin fɔ rul na Ijipt.

⁹ I tɛl in pipul dɛn se di Izrɛlayt dɛn dɔn bɔku pasmak ɛn i tan lɛk dɛn wan pas dɛn di Ijipshian dɛn.

¹⁰ So, dɛn fɔ tek tɛm aw dɛn de dil wit dɛn Izrɛlayt dɛn, ɔ nɔ so dɛn go kɔntinyu fɔ de boku, ɛn if wa fɔdɔm na di kɔntri dɛn go want jɔyn dɛn ɛnimi dɛn ɛn fɛt dɛn ɛn dɛn go rɔnawe kɔmɔt na di kɔntri lɛf dɛn.

¹¹ So di Ijipshian dɛn put masta dɛn oba di Izrɛlayt dɛn fɔ trit dɛn bad ɛn fos dɛn fɔ wok lɛk slev. Dɛn mek di Izrɛlayt dɛn bil Pitɔm ɛn Ramisis we na tu siti fɔ kip it ɛn ɔda tin dɛn fɔ di kiŋ.

¹² Bɔt di mɔ di Ijipshian dɛn mɔna di Izrɛlayt dɛn na di mɔ dɛn de bɔn bɔku pikin ɛn de bɔku na di kɔntri. Dat mek di Ijipshian dɛn bigin fred dɛn.

¹³ So dɛn bigin trit dɛn bad ɛn fos dɛn fɔ du traŋa traŋa wok.

¹⁴ Di Ijipshian dɛn fos dɛn fɔ de miks mɔta blɔk ɛn fɔ du ɔlkayn traŋa wok na di fam. Dɛn mek dɛn layf traŋa. Dɛn nɔ bin gɛt wan sɔri-at fɔ dɛn.

¹⁵ Di kiŋ gi ɔda to tu Ibru uman we nem Shifra ɛn Pua, we dɛn wok na fɔ ɛp dɛn kɔmpin bɛlɛ uman dɛn we dɛn wan bɔn

¹⁶ I se we dɛn go ɛp di Ibru uman dɛn we wan bɔn, dɛn fɔ kil ɛni bɔypikin as dɛn bɔn am, bɔt if na gyal pikin, dɛn fɔ mek i liv.

¹⁷ Bɔt Shifra ɛn Pua bin de fred PAPA GƆD ɛn dɛn nɔ kil di Ibru uman dɛn bɔypikin dɛn we na dat di kiŋ bin tɛl dɛn fɔ du.

¹⁸ So di kiŋ sɛn kɔl dɛn tu uman dɛn ya ɛn aks dɛn se wetindu dɛn de mek di bɔypikin dɛn liv, pan ɔl we i dɔn tel dɛn se dɛn fɔ kil dɛn.

¹⁹ Di uman dɛn tɛl di kiŋ se di Ibru uman dɛn nɔ wik lɛkɛ Ijipshian uman dɛn. Dɛn se, dɛn trɔŋ ɛn dɛn kin ebul bɔn fɔ dɛnsɛf bifo dɛn de rich de.

²⁰ Fɔ we dɛn uman dɛn ya nɔ bin gri fɔ kil di Ibru uman dɛn bɔypikin dɛn, PAPA GƆD blɛs dɛn, ɛn dat mek Izrɛlayt dɛn bin kɔntinyu fɔ bɔn bɔku bɔku pikin dɛn we mek dɛn bɔku na di kɔntri.

²¹ As dɛn uman ya bin de fred PAPA GƆD, PAPA GƆD bin gi dɛnsɛf dɛn yon famili dɛn.

²² So mek di kiŋ gi ɔda to ɔl in pipul dɛn fɔ mek dɛn trowe ɛni bɔypikin we dɛn Ibru uman go bɔn na Riva Nayl, bɔt dɛn fɔ lɛf di gyal pikin dɛn fɔ liv.