Ɛsta 9 - Krio Fɔs Oli Baybul

Di Ju Dɛn Dɔnawe Wit Dɛn Ɛnimi Dɛn

¹ Na di de we mek tɔtin na di Ada mɔnt we na di nɔmba twɛlv mɔnt, we di Ju dɛn ɛnimi dɛn bin dɔn min se dɛn go ebul kil dɛn, bay wetin di fɔs lɔ in dɔn se, bɔt we dɛn chenj se di Ju dɛn kin fɛt fɔ dɛn layf,

² ɔl di Ju dɛn insay Kiŋ Zaksis in kindɔm gɛda de rɛdi fɔ fɛt udat go mistek wan kil dɛn. Nɔbɔdi nɔ kres tɔch dɛn bikɔs dɛn ɔl bin de fred di Ju dɛn.

³ Di bigman dɛn, di gɔvna dɛn ɛn ɔl udat bin de wok fɔ di kiŋ, ɔl bin ɛp di Ju dɛn bikɔs dɛn bin de fred Mɔdikay.

⁴ Mɔdikay bin dɔn tɔn bigman na di kiŋ in os ɛn ɔlman bin dɔn no bɔt am ɔlɔbɔt na di prɔvins dɛn; bikɔs i bin jɛs de tɔf mɔ ɛn mɔ.

⁵ So di Ju dɛn kil ɔl dɛn ɛnimi dɛn, chap chap dɛn wit sɔd ɛn dɔnawe wit dɛn kpatakpata, ɛn du wetin dɛn fil fɔ du wit dɛn wan dɛn we nɔ lɛk dɛn.

⁶ Insay Susa insɛf we na di kapital, di Ju dɛn kil fayv ɔndrɛd man,

⁷ dɔn dɛn kil Pashandatha, Dalfɔn, Aspatha,

⁸ Poratha, Adalia Aridatha,

⁹ Pamashta, Arisay, Ariday ɛn Varizatha,

¹⁰ we na Eman we na Amadetha in bɔypikin ɛn we na di Ju dɛn ɛnimi in tɛn bɔypikin; bɔt dɛn nɔ tek natin pan wetin dɛn gɛt.

¹¹ Da sem de de, dɛn tɛl di kiŋ ɔmɔs pɔsin dɛn kil na di kapital we na Susa.

¹² Di kiŋ tɛl Kwin Ɛsta se, “Insay Susa we na di kapital, dɛn dɔn kil fayv ɔndrɛd man wit Eman in tɛn bɔypikin. A wɔnda wetin dɛn go dɔn du na di ɔda ples dɛn! So tɛl mi wetin yu want? A go du am fɔ yu. Wetin igen yu want mi fɔ du? A go du am.”

¹³ Ɛsta tɛl di kiŋ se, if di kiŋ gladi mek i gi pamishɔn to di Ju dɛn lɛ dɛn du di sem tin bak di nɛks de ɛn mek dɛn ɛŋ Eman in tɛn bɔypikin na di galos.

¹⁴ So di kiŋ gi di pamishɔn ɛn mek dɛn mek am lɔ dɔn i mek dɛn ɛŋ Eman in tɛn bɔypikin.

¹⁵ Di Ju dɛn we bin de na Susa gɛda bak di nɛks de we na di de we mek fotin na Ada mɔnt ɛn kil ɔda tri ɔndrɛd man insay Susa bɔt dɛn no tek dɛn natin.

¹⁶ Di ɔda Ju dɛn na di ɔda prɔvins dɛn, dɛnsɛf gɛda fɔ fɛt fɔ dɛn layf ɛn mek dɛn ɛnimi dɛn lɛf fɔ mɔna dɛn, ɛn dɛn kil sɛvinti-fayv tawzin pan dɛn wan we et dɛn; bɔt dɛnsɛf nɔ tek dɛn natin.

¹⁷ Dɛn du dat na di de we mek tɔtin na Ada mɔnt, dɔn di fotin de, dɛn blo ɛn sɛlibret wit gladi.

¹⁸ Bɔt di wan dɛn we bin de na Susa, dɛn gɛda di tɔtin ɛn fotin de, blo di de we mek fiftin ɛn mek da de de, de fɔ sɛlibret ɛn gladi.

¹⁹ Na dat mek di Ju dɛn we tap na di smɔl siti dɛn de mek di fotin de na Ada mɔnt ɔlide we dɛn fɔ gladi ɛn sɛlibret. Da de de, dɛn fɔ sɛn fayn prɛzɛnt fɔ dɛn kɔmpin.

Di Purim Fɛstival

²⁰ Mɔdikay rayt ɔl wetin apin dɔŋ ɛn sɛn lɛta to ɔl di Ju dɛn we tap na di prɔvins dɛn we Kiŋ Zaksis de rul, wɛda dɛn de nia ɔ dɛn de fawe,

²¹ de aks dɛn fɔ mek di fotin ɛn fiftin pan Ada mɔnt ɛvri ia bi ɔlide,

²² bikɔs dat na di de dɛn we di Ju dɛn ɛnimi dɛn blo biɛn dɛm ɛn as mɔnt we tin chenj frɔm sɔri to gladi fɔ dɛn ɛn frɔm tɛm we dɛn go kray to ɔlide. I se, dɛn fɔ mek dɛn de dɛn de bi tɛm fɔ gladi ɛn sɛlibret we dɛn go de gi dɛn kɔmpin prɛzɛnt.

²³ So di Ju dɛn disayd fɔ kɛriɔn wit wetin dɛn bigin ɛn fala wetin Mɔdikay rayt to dɛn se.

²⁴ Na da de de, Eman we na Agagayt ɛn na Amadetha in bɔypikin bin dɔn plan se dɛn go dɔnawe wit ɔl di Ju dɛn ɛn dɛn bin lukgrɔn fɔ pik ustɛm dɛn de du am;

²⁵ bɔt wɛn Ɛsta beg di kiŋ, i bin gi ɔda fɔ lɛ ɔl wetin Eman bin plan fɔ du tɔn bak pan am ɛn dat in ɛn in bɔypikin dɛn fɔ ɛŋ na galos.

²⁶ Na dat mek dɛn kɔl dɛn de dɛn de, Purim bikɔs ɔf di tɛmpul, ɛn bikɔs ɔf wetin Mɔdikay bin rayt nain lɛta we i tɔk bɔt wetin fɔ bi to dɛn.

²⁷ Di Ju dɛn mek shɔ se dɛn ɔl ɛn ɔl udat de wit dɛn jɔyn dɛn fɔ mɛmba dis de lɛkɛ aw dɛn bin dɔn se ɛn di tɛm we dɛn bin dɔn se,

²⁸ ɛn dɛn fɔ mɛmba dis de na ɔl di jɛnareshɔn, insay ɔl di famili dɛn, ɔl di prɔvins ɛn na di siti. Dɛn se dɛn nɔn nɔ fɔ ɛva lɛf fɔ mɛmba dɛn de dɛn de we dɛn kɔl Purim na ɔl di jɛnareshɔn dɛn.

²⁹ Dɛn Kwin Ɛsta we na Abiail in gyal pikin ɛn Mɔdikay da Ju gi siriɔs ɔda bɔt wetin fɔ du fɔ Purim insay di sɛkɛn lɛta.

³⁰ Di lɛta dɛn go to ɔl di Ju pipul dɛn na di wan ɔndrɛd ɛn twɛnti- sɛvin prɔvins we Kiŋ Zaksis de inchaj ɔf. Di lɛta dɛn na bin lɛta dɛn we tɔk bɔt pis ɛn dɛn tɔk tru tin,

³¹ we de tɔk se di de dɛn we na fɔ Purim, dɛn fɔ du dɛn di rayt tɛm we Mɔdikay da Ju ɛn Kwin Ɛsta bin dɔn tɛl di Ju pipul dɛn se dɛn fɔ du wit dɛn jɛnareshɔn kɔnsanin di fast we dɛn fɔ fast ɛn di sɔri we dɛn fɔ sɔri.

³² Na Kwin Ɛsta tɔk ɔl wetin fɔ bi fɔ di Purim ɛn dɛn rayt am dɔŋ.