Ɛsta 8 - Krio Fɔs Oli Baybul

Dɛn Tɛl Di Ju Dɛn Fɔ Fɛt Udat Wan Kil Dɛn

¹ Da de de, Kiŋ Zaksis gi Kwin Ɛsta, Eman we na di Ju dɛn ɛnimi, in os. So Mɔdikay go si di kiŋ bikɔs bay da tɛm de, Ɛsta bin dɔn tɛl di kiŋ udat Mɔdikay bi to am;

² ɛn di kiŋ tek di riŋ we i pul na Eman in fiŋa gi Mɔdikay. Dɔn Ɛsta mek Mɔdikay de inchaj ɔf ɔl wetin Eman bin gɛt.

³ Dɛn Ɛsta fɔdɔm na di kiŋ in fut de kray ɛn beg am fɔ du sɔntin we go mek di plan we Eman we na Agagayt bin dɔn mek fɔ kil di Ju dɛn nɔ go rayt.

⁴ Di kiŋ es di tik we dɛn mek wit gold fɔ sho se i gɛt pawa to Ɛsta,

⁵ Ɛsta grap ɛn tinap bifo di kiŋ ɛn aks di kiŋ se, “If di kiŋ gladi wit mi, ɛn i wan fɔ du wetin a want, ɛn if i fil se na di rayt tin a de aks fɔ, lɛ i rayt ɔda lɛta dɛn we go chenj wetin de na di wan dɛn we Eman we na Agagayt dat na Amadetha in bɔypikin, bin rayt se dɛn fɔ dɔnawe wit ɔl di Ju dɛn na di prɔvins dɛn we di kiŋ de rul.

⁶ Aw a go sidɔm de luk wetin de bi to mi pipul dɛn? Ɛn uskayn bia a go bia fɔ si we mi pipul dɛn de day?”

⁷ Kiŋ Zaksis tɛl Kwin Ɛsta ɛn Mɔdikay we na Ju se, “Una si we a dɔn gi Ɛsta, Eman in os ɛn a dɔn mek dɛn ɛŋ am na di galos bikɔs i want fɔ dɔnawe di Ju dɛn.

⁸ Una kin rayt wetin una want fɔ bi to di Ju dɛn in mi nem, yuz di kiŋ in riŋ fɔ stamp am; bikɔs ɛnitin we dɛn mi nem rayt ɛn yuz mi riŋ fɔ stamp am, nɔ de chenj.

⁹ Dɛn kɔl di kiŋ in sɛktri dɛn insay di twɛnti-tri de na di tɔd mɔnt we nem Sivan ɛn dɛn rayt di mɛsej we Mɔdikay se bɔt di Ju dɛn, fɔ di gɔvna ɛn ɔda bigman dɛn frɔm India te rich Ithiopia dat na wan ɔndrɛd ɛn twɛnti-sɛvin prɔvins. Ɔl di prɔvins dɛn gɛt dɛn yon lɛta na di laŋwej we di pipul go ɔndastand ɛn di Ju dɛnsɛf gɛt dɛn yon lɛta na dɛn laŋwej.

¹⁰ Dɛn bin rayt ɔl wit Kiŋ Zaksis in nem ɛn yuz di kiŋ in riŋ fɔ stamp dɛn ɛn mek dɛn sɛn di lɛta dɛn wit di kiŋ in mɛsenja dɛn ɛn mek dɛn rayd fast pan di kiŋ in ɔs dɛn we dɛn kin yuz fɔ du biznɛs fɔ di kiŋ. Na to di kiŋ dɛn de kip dɛn ɔs de ɛn dɛn de fid dɛn gud.

¹¹ Insay di lɛta, di kiŋ gri se di Ju dɛn ɔlsay fɔ fɛt fɔ dɛn layf so dɛn kin kil ɛni ɔda pɔsin we atak dɛn fɔ kil dɛn. Dɛnsɛf kin kil dɛn wit dɛn pikin ɛn uman dɛn ɛn ivin tek dɛn tin dɛn na dɛn an,

¹² wans dɛn du am di sem de we na di nɔmba twɛlv de na di twɛlv mɔnt we nem Ada.

¹³ Dɛn mek wetin dɛn rayt lɔ na ɔl di prɔvins dɛn so dat dɛn go tɛl ɔlman mek di Ju dɛn go rɛdi da de de fɔ fɛt fɔ dɛn layf ɛn kil dɛn ɛnimi.

¹⁴ So di mɛsenja dɛn jomp pantap di ɔs dɛn we de rɔn fast, we dɛn kin yuz fɔ du biznɛs fɔ di kiŋ ɛn di kiŋ insɛf ɔda dɛn fɔ go kwik. So dɛn pas am as lɔ na ɔlsay na Susa we na di kapital.

¹⁵ Dɛn Mɔdikay kɔmɔt usay di kiŋ de wit in blu ɛn wayt klos lɛkɛ di wan we kiŋ kin wɛr, wit gold krawn ɛn kot we dɛn tek fayn linin ɛn pɔpul matirial mek. Da tɛm de, na so ɔlman insay Susa de ala wit gladi.

¹⁶ Ɔl di Ju dɛn bɔdi bin layt. Dɛn bin gladi. Ɔlman fred ɛn rɛspɛkt dɛn.

¹⁷ Ɔlɔbɔt we dɛn yɛri di lɔ, di Ju dɛn gladi. Dɛn mek ɔlide ɛn sɛlibret. Bɔku pan di ɔda pipul bigin se dɛnsɛf na Ju, bikɔs dɛn bin de fred de Ju dɛn.