Ɛsta 7 - Krio Fɔs Oli Baybul1 Na so di kiŋ ɛn Eman go it to Kwin Ɛsta. 2 Da de de na bin di sɛkɛn de ɛn as dɛn sidɔm de drink, di kiŋ aks Ɛsta bak, i se, “Kwin Ɛsta na wetin yu want mek a du fɔ yu? A dɔn tɛl yu fɔ aks mi nɔmɔ, if ivin na af mi kindɔm, yu go gɛt am.” 3 Dɛn Kwin Ɛsta ansa am se, “Kiŋ sa, if yu gladi wit mi, a de aks mek dɛn nɔ kil mi ɛn mi pipul dɛn. 4 Dɛn dɔn sɛl mi ɛn mi pipul dɛn ɛn se, dɛn fɔ dɔnawe wit wi kpatakpata. If na sɛl dɛn bin sɛl wi man ɛn uman dɛnsɛf as slev, a nɔ bin fɔ se fiŋ, bikɔs di sɔfa we wi bin fɔ sɔfa nɔ bin fɔ rich di lɔsis we yu bin fɔ gɛt if dɛn sɛl wi.” 5 Kiŋ Zaksis aks Kwin Ɛsta se, “Udat gɛt maynd fɔ du da kayn tin de? Usay i de?” 6 Nain Ɛsta se, “Di pɔsin na ɛnimi! Na dis bad Eman!” Dɛn Eman in at pwɛl as i sidɔm wit fred frɔnt di kiŋ ɛn kwin. 7 Di kiŋ grap de blez lɛk faya go na do na di os in gadin; bɔt Eman in lɛf insay de beg Kwin Ɛsta mek i nɔ day, as i notis se di kiŋ wan pɔnish am. 8 Di kiŋ kɔmɔt na di os in gadin go insay usay dɛn bin de drink, i mit Eman butu na Ɛsta in fut fɔ beg am, bɔt da tɛm de, Ɛsta bin lidɔm na di sɛti. So di kiŋ se, “Yuwant fɔ rabish di kwin sɛf usay a de, na mi yon os?” Di wɔd nɔ kɔmɔt gud nain mɔt, dɛn dɔn kɔndɛm Eman. 9 Abona we na wan pan di okobo dɛn we kin wok fɔ di kiŋ tɛl am se di galos, we Eman bin dɔn bil fɔ Mɔdikay we bin mek dɛn nɔ kil di kiŋ de na Eman in os. I se i ay sɛvinti-fayv fut. 10 Di kiŋ se na fɔ kɛr Eman go ɛŋ am de. So dɛn kɛr am go ɛŋ am na di galos we i bin mek fɔ Mɔdikay. Dat mek di kiŋ in at kol. |
Krio Bible © The Bible Society of Sierra Leone, 2013.
Bible Society in Sierra Leone