Ɛsta 6 - Krio Fɔs Oli Baybul

Di Kiŋ Sho Ɔlman Aw I Rɛspɛkt Mɔdikay

¹ Da sem nɛt de, di kiŋ nɔ ebul slip; i ɔda in wokman dɛn fɔ briŋ di buk we nainsay de dɛn kin rayt ɔl wetin de bi insay di kindɔm, kam rid wetin de de to am.

² As dɛn de rid, dɛn si se na Mɔdikay bin pot we i yɛri Bigthana ɛn Terɛsh, dɛn okobo dɛn we na bin in sikyɔriti se dɛn de plan fɔ kil Kiŋ Zaksis.

³ So di kiŋ aks wetin dɛn dɔn du fɔ Mɔdikay. Dɛn ansa am se dɛn nɔ du natin yet.

⁴ Di kiŋ aks udat de na do na di kɔmpawnd. Da tɛm de Eman jɛs go insay di kɔmpawnd fɔ go tɛl di kiŋ fɔ ɛŋ Mɔdikay na di galos we i dɔn bil fɔ am.

⁵ Di kiŋ in wokman dɛn tɛl am se Eman de de. Dɛn se i tinap na di kɔmpawnd. Di kiŋ se mek dɛn mek i go insay.

⁶ Eman go insay to di kiŋ ɛn di kiŋ aks am wetin fɔ du fɔ man we in di kiŋ wan sho ɔlman se i rɛspɛkt. Eman tɔk nain at se di kiŋ nɔ go wan sho ɛni ɔda pɔsin se i rɛspɛkt am, pas insɛf di Eman.

⁷ So Eman tɛl di kiŋ se if i wan sho di man aw i rɛspɛkt am,

⁸ i fɔ mek dɛn briŋ wan pan in kiŋ klos dɛn we i dɔn wɛr wit di ɔs we i dɔn rayd we wɛr krawn nain ed fɔ sho se na kiŋ de rayd am;

⁹ ɛn i fɔ lɛ dɛn gi di klos dɛn ɛn di ɔs to di wan pan di kiŋ in aristo bigman dɛn lɛ i wɛr am pan di man we i wan sho se i rɛspɛkt, ɛn lɛ i mek di man rayd di ɔs go rawnd di siti, bɔt di aristo fɔ de bifo di man de ala se, “Na so di kiŋ kin du fɔ pɔsin we i wan sho ɔlman se i rɛspɛkt!”

¹⁰ So di kiŋ tɛl Eman, lɛ i mekes tek di klos dɛn ɛn di ɔs ɛn du wetin i se to Mɔdikay we na di Ju we kin de sidɔm na di kiŋ in get. I se Eman fɔ du ɔl wetin i se. I nɔ fɔ lɛf natin pan wetin i se.

¹¹ So Eman tek di klos dɛn ɛn di ɔs ɛn drɛs Mɔdikay dɔn i mek i rayd ɔlɔbɔt di siti de ala bifo am se, “Una si di man we di kiŋ wan sho aw i rɛspɛkt!”

¹² Afta dat, Mɔdikay go bak go sidɔm na di kiŋ in get bɔt Eman in put in an nain ed de kray ɛn go nain yon os.

¹³ We i rich nain os i tɛl in wɛf we na Zerɛsh ɛn in padi dɛn ɔl wetin apin da de de. Nain dɛn tɛl am se wans Mɔdikay na Ju i nɔ go ebul du am natin bifo dat nain disgres wan i go de fɛn.

Dɛn Ɛŋ Eman

¹⁴ As dɛn de tɔk di tɔk, nain tu pan di wokman dɛn we na okobo na di kiŋ in os kam kwik kwik wan fɔ kam tek Eman go to Ɛsta fɔ go it.