Ɛsta 5 - Krio Fɔs Oli Baybul

Ɛsta Kuk Ɛn Invayt Di Kiŋ Ɛn Eman Fɔ It

¹ Wɛn i dɔn fast fɔ tri de, Ɛsta wɛr di klos we i kin wɛr fɔ drɛs lɛk kwin. I go tinap na di kɔmpawnd in domɔt ɔpozit di ɔl we di kiŋ kin sidɔm. Di kiŋ in bin sidɔm na di chia we kiŋ kin sidɔm insay in os ɔpozit di domɔt;

² wɛn di kiŋ si Kwin Ɛsta tinap na di kɔmpawnd, i mek di kiŋ in at swit, so i pɔynt di gold tik nain an. Dɛn Ɛsta waka lɛkɛ kwin go insay ɛn tɔch pantap di tik.

³ Di kiŋ se, “Wetin du yu Kwin Ɛsta? Wetin yu want? I lɛk na af di kindɔm we a de rul, a go gi yu.”

⁴ Ɛsta se, “Kiŋ, if yu gri, mek yu ɛn Eman kam it to mi tide bikɔs a dɔn kuk fɔ una”.

⁵ Di kiŋ sɛn go kɔl Eman kwik so dat dɛn go du wetin Ɛsta want dɔn dɛn ɔltu go to Ɛsta fɔ go it di it we i kuk.

⁶ As dɛn sidɔm de drink wayn, di kiŋ aks Ɛsta wetin i want. I prɔmis am se i go gɛt wetin i want so mek i jɛs tɛl am. I se if ivin i want af in kindɔm, i go gi am.

⁷ Bɔt Ɛsta tɛl am se, “Wetin a de beg yu fɔ du na:

⁸ If di kiŋ gladi wit mi, ɛn if yu want fɔ du wetin a want ɛn mek mi at swit, lɛ di kiŋ ɛn Eman kam bak tumara de we a go kuk fɔ dɛn fɔ it ɛn na da tɛm de a go aks di kiŋ wetin a wan aks am.”

Eman Plan Fɔ Kil Mɔdikay

⁹ Wɛn Eman kɔmɔt to Ɛsta i bin gladi ɛn in at layt, bɔt wɛn i si Mɔdikay na di get ɛn we Mɔdikay nɔ baw ɔ mek lɛk i si am, in fukfuk grap bak ɛn i vɛks bad pan Mɔdikay.

¹⁰ Ɛniwe, i bia ɛn go nain os saful. Dɛn i sɛn kɔl in padi dɛn ɛn aks in wɛf we na Zirɛsh insɛf fɔ kam de wit dɛn.

¹¹ We dɛn ɔl de de, i bigin blɔf bɔt aw i jɛntri, ɔmɔs bɔypikin i gɛt, aw di kiŋ dɔn promot am ɛn gi am big post, ɛn aw i impɔtant pas ɔl di ɔda bigman dɛn we de wok wit di kiŋ.

¹² Dɛn i tɔk bak se, ivin Kwin Ɛsta, we i wan pɔsin fɔ go wit di kiŋ fɔ it wetin i kuk, i nɔ kɔl nɔbɔdi pas in di vɛri wan ɛn dat i dɔn kɔl dɛn bak di nɛks de.

¹³ I se ɔl dat nɔ de mek in at swit, bikɔs i de si Mɔdikay sidɔm na di kiŋ in get ɛvride.

¹⁴ Dɛn in wɛf ɛn ɔl in padi dɛn de, se i fɔ bil wan galos we sɛvinti-fayv fut ay so dat na mɔnin, i go tɛl di kiŋ fɔ ɛŋ Mɔdikay de dɔn da tɛm de, dɛn kin go it to Ɛsta wit kolat. Eman gladi fɔ yɛri wetin dɛn se, ɛn i gi ɔda fɔ mek dɛn bil di galos.