Ɛsta 4 - Krio Fɔs Oli Baybul

Mɔdikay Aks Ɛsta Fɔ Ɛp Di Ju Man Dɛn

¹ Wɛn Mɔdikay yɛri bɔt ɔl wetin dɛn dɔn du, i chɛr in klos fɔ sho se i nɔ gladi, wɛr saklɔth ɛn rɔb ashis pan insɛf de waka ɔlɔbɔt di siti de kray bita bita wan;

² i waka te i rich to di domɔt fɔ go to di kiŋ in get bikɔs nɔbɔdi nɔ fɔ wɛr saklɔth fɔ go insay di kiŋ in get.

³ Nainsay ɔl di prɔvins we yɛri bɔt di kiŋ in ɔda, na soso kray di Ju dɛn de kray ɛn fast, dɔn bɔku pan dɛn wɛr saklɔth fɔ sho se dɛn sɔri.

⁴ Wɛn di uman dɛn ɛn di ɔda okobo dɛn we bin de de wit Ɛsta tɛl am bɔt aw dɛn si Mɔdikay, Ɛsta in at pwɛl; i sɛn klos go gi Mɔdikay so dat i kin chenj bɔt Mɔdikay nɔ gri tek di klos dɛn.

⁵ Dɛn Ɛsta kɔl Atak we na wan pan di man dɛn we de wok wit di kiŋ, we nain di kiŋ pik fɔ de de wit Ɛsta, ɛn tɛl am fɔ go tɔk to Mɔdikay ɛn fɛnɔt wetindu i de biev so.

⁶ Atak go mit Mɔdikay na wan big ɛmti spes we de bifo di kiŋ in get,

⁷ ɛn Mɔdikay tɛl am ɔl wetin dɔn bi ɛn di mɔni we Eman se i go put na di say we di kiŋ de kip in mɔni so dat di kiŋ go gri fɔ mek dɛn dɔnawe wit ɔl di Ju dɛn.

⁸ Mɔdikay gi am wan pan di lɛta we di kiŋ rayt gi di ɔda na Susa, fɔ mek dɛn dɔnawe wit ɔl di Ju dɛn, mek i go go sho Ɛsta, dɔn i se Ɛsta fɔ go beg di kiŋ fɔ in pipul dɛn.

⁹ So Atak go tɛl Ɛsta ɔl wetin Mɔdikay se.

¹⁰ Dɛn Ɛsta gi am mɛsej bak fɔ go gi Mɔdikay.

¹¹ I se, ɔlman we de wok fɔ di kiŋ no se nɔn man ɔ uman nɔ fɔ go insay usay di kiŋ de, pas if insɛf kɔl am ɔ nɔ so i go day. I se di kiŋ gɛt fɔ pɔynt di tik we dɛn mek wit gold fɔ sho se i gɛt pawa, bifo di pɔsin go insay usay i de. Na dat nɔmɔ go mek di pɔsin nɔ day. Ɛsta se na tati de naw we di kiŋ nɔ sɛn fɔ am.

¹² Wɛn dɛn go tɛl Mɔdikay ɔl wetin Ɛsta se,

¹³ Mɔdikay sɛn dɛn bak go tɛl Ɛsta se lɛ i nɔ fil se bikɔs in de na di kiŋ in os, natin nɔ go du am de.

¹⁴ I se, if Ɛsta sɛt in mɔt ɛn nɔ du natin, na ɔda pɔsin go fɛt fɔ di Ju dɛn, bɔt as fɔ in ɛn ɔl udat de nain papa in os dɛn ɔl go day. I se, sɔntɛm na bikɔs i go gɛt fɔ pul di Ju dɛn pan trɔbul mek i bi kwin da tɛm de.

¹⁵ Ɛsta sɛn dɛn bak to Mɔdikay. I se,

¹⁶ Mɔdikay fɔ go gɛda ɔl di Ju dɛn na Susa ɛn dɛn fɔ fast ɛn pre fɔ am. I se dɛn nɔ fɔ it ɛn drink fɔ tri de ɛn tri nɛt ɛn insɛf wit in wokuman dɛnsɛf go fast. Dɔn i go mek drayay ɛn go insay go tɔk to di kiŋ pan ɔl we bay di lɔ i nɔ fɔ du dat; i se if i fɔ day, i go day.

¹⁷ So Mɔdikay, go du ɔl wetin Ɛsta se fɔ du.