Ɛsta 3 - Krio Fɔs Oli Baybul

¹ Leta ɔn Kiŋ Zaksis promot Eman, di Agagayt man we na Amadetha in bɔypikin. I mek am bɔs fɔ ɔl di ɔda bigman dɛn we de wit am.

² Ɔl di kiŋ in wokman dɛn we bin de de na di kiŋ in get kin baw we dɛn si Eman fɔ sho rɛspɛkt; bikɔs na so di kiŋ se. Bɔt Mɔdikay in nɔ gri baw.

³ Di kiŋ in wokman dɛn we bin de na di get aks Mɔdikay wetindu i nɔ de du wetin di kiŋ se.

⁴ Dɛn kin de tɛl am ɔltɛm fɔ baw bɔt i nɔba lisin. Dɛn le in kɔmplen to Eman fɔ si if dat go lɛ i chenj in maynd bikɔs i bin dɔn tɛl dɛn se in na Ju.

⁵ So wɛn Eman notis se Mɔdikay stil nɔ de baw to am, dat mek in fukfuk grap.

⁶ Dis mek i plan nɔ fɔ dil wit Mɔdikay in wan we i bin dɔn no se na Ju. I disayd se in go dɔnawe wit ɔl di Ju ɛn uman dɛn we na Mɔdikay in pipul dɛn, we tap na Pashia.

⁷ Insay di fɔs mɔnt we nem Nisan, afta we Kiŋ Zaksis dɔn rul fɔ twɛlv ia, dɛn bin de mek Pur, dat na lukgrɔn bifo Eman ɛvride, ɛvri mɔnt fɔ twɛlv mɔnt, te di nɔmba twɛlv mɔnt we nem Ada.

⁸ Wande, Eman tɛl di kiŋ se sɔm rɛfyuji dɛn de ɔlɔbɔt nain kindɔm; i se dɛn difrɛn pas ɔl di pipul de ɛn dɛn nɔ de du wetin di kiŋ se, so di kiŋ nɔ go gen natin if i tɔlaret dɛn.

⁹ I se, if di kiŋ want, i fɔ gi ɔda se dɛn fɔ dɔnawe wit dɛn. I se in go pe tɛn tawzin silva kɔpɔ to di wan dɛn we de du biznɛs fɔ di kiŋ, mek dɛn go kip am usay dɛn kin kip mɔni.

¹⁰ So di kiŋ pul di riŋ nain fiŋa ɛn gi Eman we na Amadetha in bɔypikin we na di Ju dɛn ɛnimi.

¹¹ Di kiŋ tɛl Eman se lɛ i tek di mɔni bɔt i kin du wetin in want wit di pipul dɛn we i se.

¹² Na di de we mek tɔtin insay di fɔs mɔnt, dɛn kɔl ɔl di kiŋ in sɛktri dɛn ɛn tɛl dɛn fɔ rayt ɔl wetin Eman se fɔ du. Dɛn rayt am to kiŋ in minista dɛn ɛn sɛn am to ɔl di gɔvna ɛn ɔda bigman dɛn na di difrɛn difrɛn prɔvins dɛn. Ɔl prɔvins gɛt in yon lɛta nain yon laŋwej. Dɛn put am de se na Kiŋ Zaksis rayt am ɛn dɛn yuz in riŋ fɔ stamp am.

¹³ Na spɛshal pipul dɛn kɛr di lɛta dɛn go na di difrɛn ples we se dɛn fɔ kil ɛn dɔnawe wit ɔl di Ju dɛn wɛda dɛn yɔŋ ɔ dɛn ol, dɛn na uman ɔ dɛn na pikin, dɛn ɔl fɔ day di sem de na di mɔnt we mek twɛlv in tɔtin de dɔn dɛn fɔ tek ɔl wetin dɛn gɛt.

¹⁴ Dɛn fɔ sɛn dis ɔda go ɔlsay na di kindɔm so dat dɛn ɔl go rɛdi fɔ da sem de de.

¹⁵ Na so di pipul dɛn we de kɛr di ɔda go rawnd de ɔri bikɔs na so di kiŋ se, ɛn nainsay Susa we na di kapital di kiŋ bin gi di ɔda. Di kiŋ ɛn Eman sidɔm de drink bɔt dɛn bin dɔn gi ɔlman na di siti dɛn siriɔs kɔtat.