Ɛsta 2 - Krio Fɔs Oli Baybul

Aw Ɛsta Bi Di Kiŋ In Wɛf

¹ Afta ɔl wetin dɔn bi ɛn di kiŋ in at dɔn kol, i bin de tink bɔt Vashti, aw i biev ɛn wetin in dɔn mek lɔ bɔt am.

² So di kiŋ in wokman dɛn we de nia am tɛl am se, “Lɛ wi fɛn yɔŋgyal we na vajin fɔ di kiŋ.

³ Lɛ di kiŋ mek ɔfisa dɛn na di difrɛn prɔvins dɛn aks ɔl di yɔŋgyal dɛn we na vajin we tap insay Susa we na di kapital, fɔ go na di say we dɛn uman kin go, dɔn i fɔ put Egay inchaj ɔf dɛn as nain na di okobo we kin de inchaj ɔf di uman dɛn; fɔ gi dɛn ɔyl fɔ dɛn bɔdi so dɛn go luk frɛsh.

⁴ Di wan we di kiŋ go lɛk fɔ bi kwin fɔ tek Vashti in ples.” Di kiŋ gladi fɔ di advays ɛn du wetin dɛn se.

⁵ Wan Ju we nem Mɔdikay bin tap na Susa. Na bin Jeir we na Shimɛay in bɔypikin, in yon bɔypikin. Kish we na Bɛnjaminayt, na bin Jeir in grampa.

⁶ Di tɛm we Kiŋ Nɛbyukadnɛza bin kech Jɛoiakim we na bin kiŋ na Juda ɛn kɛr am go ɛgzayl kɔmɔt Jerusɛlɛm, Mɔdikay na bin wan pan di wan dɛn we dɛn kech.

⁷ In ɔnkul in gyal pikin we bin nem Adasa bin de to am fɔ mɛn bikɔs in mama ɛn papa bin dɔn day. I nem Ɛsta bɔt in Ibru nem na Adasa. Mɔdikay bin tek am lɛk in yon pikin.

⁸ Wɛn di lɔ we di kiŋ pas kɔmɔt na do fɔ mek dɛn yɔŋgyal dɛn gɛda na Susa to Egay, Ɛsta sɛf na bin wan pan dɛn ɛn dɛn bin lɛ Egay de inchaj ɔf am bikɔs nain bin de inchaj ɔf di uman dɛn.

⁹ Egay kam lɛk in biznɛs ɛn na so i kin de magomago fɔ gi am di ɔyl we fɔ mek in bɔdi fayn, ɛn di it we i fɔ it, ɛn pik di sɛvin atɛndant we fɔ de wit am. I gi am di bɛst ples fɔ tap, usay di uman dɛn kin tap na di kiŋ in os.

¹⁰ Ɛsta nɔ bin mek dɛn no udat in ɔ in pipul dɛn bi bikɔs Mɔdikay bin dɔn tɛl am nɔ fɔ tɔk.

¹¹ Ɛvride Mɔdikay kin kam pas bifo usay i tap so dat i go no if i ɔrayt.

¹² Di uman dɛn go de fɔ twɛlv mɔnt de mek dɛnsɛf luk fayn lɛkɛ aw di kiŋ want; dɛn go tek siks mɔnt de rɔb ɔyl na dɛn bɔdi ɛn siks mɔnt de rɔb dɛn ɔda krim dɛn we kin pul fayn sɛnt. Bay da tɛm de dɛn fɔ dɔn rɛdi fɔ go insay to Kiŋ Zaksis bay tɔn.

¹³ Da tɛm de we ɛniwan pan di uman dɛn de go insay to di kiŋ, dɛn kin gi am ɛnitin we in want frɔm di wɔdrob fɔ go to di kiŋ.

¹⁴ Na ivintɛm i de go insay to di kiŋ bɔt i de kɔmɔt de na mɔnin go na di sɛkɛn ples ɛn dis tɛm na Sheashgaz, wan ɔda okobo, we bin de inchaj ɔf di kiŋ in switat dɛn, de inchaj ɔf dɛn. Afta dat, i nɔ fɔ go insay to di kiŋ igen pas i sɛn kɔl am bay in nem.

¹⁵ Wɛn Ɛsta, dat na Abiail we na Mɔdikay in ɔnkul in pikin, we Mɔdikay tek lɛk in yon pikin, in tɔn rich fɔ go insay to di kiŋ, i nɔ aks fɔ ɛnitin pas wetin Egay, da okobo we bin de inchaj ɔf di uman dɛn, se. Ɔlman we si Ɛsta lɛk in biznɛs.

¹⁶ Na di mɔnt we mek tɛn we nem Tebɛt, afta we Kiŋ Zaksis dɔn rul fɔ sɛvin ia,

¹⁷ nain di kiŋ fɔl fɔ Ɛsta. I bin lɛk am pas ɔl di uman dɛn ɛn kin gladi we i si am pas ɔl di vajin dɛn, so di kiŋ wɛr di krawn na Ɛsta in ed ɛn mek am di kwin ɛn fɔgɛt bɔt Vashti.

¹⁸ Di kiŋ mek pati fɔ Ɛsta ɛn kɔl ɔl di bigman dɛn ɛn in wokman dɛn. I mek ɔlide de na ɔl di prɔvins ɛn sheb prɛzɛnt we na kiŋ nɔmɔ kin sheb.

Mɔdikay Sev Di Kiŋ In Layf

¹⁹ Wɛn di vajin dɛn gɛda bak, Mɔdikay in bin sidɔm na di kiŋ in get.

²⁰ Ɛsta stil nɔ bin tɔk udat in pipul dɛn bi jɛs lɛkɛ aw Mɔdikay bin dɔn se, bikɔs Ɛsta bin de du ɔl wetin Mɔdikay se lɛkɛ aw i bin de du we i de mɛn am.

²¹ Wande we Mɔdikay sidɔm na di kiŋ in get, Bigthan ɛn Terɛsh we na ɔda okobo dɛn ɛn na di kiŋ in sikyɔriti dɛn nain os, bin vɛks bad ɛn plan fɔ kil Kiŋ Zaksis.

²² We Mɔdikay yɛri bɔt dɛn plan i tɛl Kwin Ɛsta ɛn Ɛsta tɛl di kiŋ se na Mɔdikay tɛl am.

²³ Wɛn dɛn fɛnɔt se na tru, dɛn ɛŋ di tu man na galos ɛn rayt wetin apin fɔ di kiŋ insay di buk we dɛn kɔl Kronikuls.