Ɛsta 1 - Krio Fɔs Oli Baybul

Kwin Vashti Nɔ Gri Fɔ Du Wetin Kiŋ Zaksis Want

¹ Di tɛm we Kiŋ Zaksis we dɛn kin kɔl Aesuerɔs, bin de rul frɔm India te rich Ithiopia, i bin gɛt wan ɔndrɛd ɛn twɛnti-sɛvin prɔvins ɔnda am,

² ɛn da tɛm de, i bin tap na Susa, we na di kapital

³ Na bin di tɛm we i bin dɔn bi kiŋ fɔ tri ia, i mek pati fɔ in bigman dɛn, wokman dɛn ɛn di ami chif dɛn we de na Pashia ɛn Mɛdia, wit di aristo dɛn ɛn di gɔvna dɛn we de usay i de rul.

⁴ I bin de sho ɔlman in jɛntri we i gɛt bikɔs in na kiŋ, ɛn di fayn fayn we we in de wit kiŋ rɛspɛkt, fɔ lɔŋ tɛm. Dat na wan ɔndrɛd ɛn eti de.

⁵ We dɛn dɔn da wande, di kiŋ mek ɔda pati fɔ sɛvin de fɔ ɔl udat tap insay Susa we na di kapital; bigman ɛn ɔdinari pɔsin dɛn, na di kɔmpawnd usay i tap.

⁶ Dɛn drɛs di ples wit wayt kɔtin winda blayn ɛn blu kep we gɛt kɔd we dɛn ɛŋ pan silva riŋ wit fayn linin ɛn pɔpul, ɛn put sɛti we dɛn tek gold ɛn silva mek pan mabul tayl we tek difrɛn difrɛn kayn ston mek. Dɛn fiks af af pɔfiri, mabul, mɔta-ɔf-pal ɛn ɔda dia miniral ston dɛn, na di pevmɛnt usay dɛn put di sɛti dɛn.

⁷ Dɛn sav drink na gold wayn kɔp ɛn ɔda wayn kɔp we dɛn tek difrɛn tin dɛn mek, ɛn di kiŋ in wayn bin de bɔku fɔ drink.

⁸ Lɔ nɔ bin de pan di rɔm; di kiŋ tɛl in wokman dɛn na di kiŋ os se ɔlman fri fɔ drink ɔmɔs i ebul.

⁹ Kwin Vashti insɛf mek pati fɔ di uman dɛn insay Kiŋ Zaksis in os.

¹⁰ Di de we mek sɛvin, we di kiŋ in at layt bikɔs i dɔn drink bɔku wayn, i tɛl Mɛuman, Biztha, Abona, Bigtha, Abagtha, Zitha ɛn Kakas, di sɛvin okobo we de fɔ de wach wetin de apin na di kiŋ in os,

¹¹ fɔ kɔl Kwin Vashti ɛn i fɔ wɛr in krawn so dat i kin sho ɔlman aw i fayn, bikɔs na uman we fayn fɔ luk.

¹² Bɔt Kwin Vashti nɔ gri go we di kiŋ sɛn di okobo dɛn fɔ kɔl am. Dis mek di kiŋ vɛks bad ɛn in fukfuk grap.

¹³ Di kiŋ naw aks di bukman dɛn lɛk aw i kin du bikɔs dɛn no bɔt di lɔ ɛn fia ple.

¹⁴ Dɛn bin sidɔm nia am. Dɛn na Kashena, Shita, Admata, Tashish, Merɛs, Masɛna, ɛn Mɛmukan. Na dɛn sɛvin de inchaj ɔf di prɔvins dɛn na Pashia ɛn Mɛdia, ɛn na dɛn di kiŋ kin de tɔk wit. Na dɛn de nɛks to am.

¹⁵ I se, “Wetin di lɔ se fɔ du to Kwin Vashti we i nɔ gri kam we Kiŋ Zaksis sɛn in man dɛn fɔ go kɔl am?”

¹⁶ Usay di kiŋ ɛn ɔl di bigman dɛn de, nain Mɛmukan tɛl di kiŋ se nɔto in nɔmɔ Kwin Vashti fityay. I se Kwin Vashti dɔn fityay ɔl di man dɛn we tap usay Kiŋ Zaksis de.

¹⁷ I se if ɔl dɛn uman yɛri bɔt wetin di kwin du, dɛn go de fityay dɛn man dɛn ɛn se afta ɔl Kiŋ Zaksis bin sɛn kɔl Kwin Vashti ɛn i nɔ gri go.

¹⁸ I se da de de, di bigman dɛn na Pashia ɛn Mɛdia dɛn wɛf we go dɔn yɛri bɔt wetin di kwin du, go de yuz di stori fɔ fityay dɛn man.

¹⁹ I se, if di kiŋ lɛk i fɔ sɛn tɛl ɔlman se Vashti nɔto Kwin igen ɛn dat i nɔ fɔ ɛva kam bifo am igen I se di kiŋ fɔ rayt di lɔ insay usay di Mɛdis ɛn di Pashian dɛn lɔ de so dat nɔbɔdi nɔ go chenj am. I se di kiŋ fɔ fɛn ɔda pɔsin we sabi biev pas Vashti.

²⁰ I se wɛn di uman dɛn ɔlɔbɔt na di kindɔm yɛri di lɔ dat go mek ɔl di uman dɛn rɛspɛkt dɛn man i lɛk udat i bi.

²¹ Di kiŋ ɛn ɔl di bigman dɛn we yɛri wetin Mɛmukan se gladi ɛn di kiŋ du wetin i se.

²² I sɛn lɛta go to ɔl di prɔvins we i de rul ɛn i mek shɔ se di lɛta we de go ɛnisay dɛn rayt am na di laŋwej we di pipul dɛn de de tɔk.