Lɛta Fɔ Ɛfisɔs 6 - Krio Fɔs Oli Baybul

Pikin, Papa, Mama

¹ Una we na pikin, una fɔ de du wetin di wan dɛn we bɔn una tɛl una fɔ du; na di rayt tin dat we Kristiɛn fɔ du.

^2-3 Pan ɔl di lɔ we Gɔd gi Mozis, di fɔs wan we gɛt prɔmis, se: “Yu fɔ rɛspɛkt yu papa ɛn mama, so dat ɔltin go fayn fɔ yu ɛn yu go gɛt lɔŋ layf.”

⁴ Una we na mama ɛn papa, una nɔ fɔ du una pikin dɛn tin we go mek dɛn vɛks, bɔt una fɔ gi dɛn Kristiɛn trenin.

Dɛn Masta ɛn dɛn Wan we de Wok fɔ dɛn

⁵ Una we de wok, una fɔ de du wetin una masta tɛl una fɔ du, ɛn una fɔ rɛspɛkt dɛn. Una fɔ du di wok wit ɔl una at lɛkɛ se na Krays una de du am fɔ.

⁶ Nɔto wɛn una masta de luk una nɔmɔ una fɔ du una wok gud, so dat dɛn go prez una; bɔt una fɔ de du una wok lɛkɛ se na Krays una de du am fɔ, ɛn una fɔ du wetin Gɔd want wit ɔl una at.

⁷ Una fɔ du gud wok wit gladi lɛkɛ se na fɔ Krays una de du am, nɔto fɔ mɔtalman.

⁸ Una fɔ no se Krays go gi ɔlman di pe fɔ di wok we ɔlman du, ilɛk di pɔsin na slev ɔ fribɔn.

⁹ Una we na masta, na so unasɛf fɔ de du to dɛn pipul we de wok to una. Una nɔ fɔ tɛl dɛn ɛnitin we go mek dɛn at ɛŋ. Una fɔ no se una Masta we de na ɛvin na di Masta fɔ ɔlman ɛn i nɔ fil se wan pɔsin bɛtɛ pas in kɔmpin.

Di Klos we Gɔd Gi Una fɔ di Fɛt

¹⁰ Mek a tɛl una dis las wɔd bifo a dɔn wetin a de tɔk: Di wanwɔd we una gɛt wit Krays fɔ mek una abop pan di Masta in trɛnk ɛn di pawa we i gɛt.

¹¹ Una fɔ wɛr di klos we Gɔd gi una fɔ tek fɛt so dat wɛn Setan pul in kɔni fɔ fɛt una, i nɔ go ebul una.

¹² Wi nɔ de fɛt mɔtalman, wi de fɛt dɛn pawa we wi nɔ de si, dɛn pawa we de rul dis dak wɔl ɛn dɛn wan we de ɔp ɔp na di klawd.

¹³ Una fɔ wɛr di klos we Gɔd gi una fɔ tek fɛt, so dat wɛn di tɛm we pipul go de du plɛnti bad pas ɔl na wɔl go kam, una go ebul fɔ fɛt Setan pan ɔl di kɔni we i de pul. Wɛn una de fɛt, una nɔ go fɔdɔm, ɛn wɛn di fɛt dɔn, una go stil tinap traŋa.

¹⁴ So una fɔ tinap traŋa: mek ɔl wetin tru bi di bɛlt we una fɔ tay; mek di rayt we bi di ayɛn plet we una go wɛr fɔ kɔba una chɛst wɛn una de fɛt.

¹⁵ Una fɔ wɛr di sus we go mek una rɛdi fɔ tɛl pipul di Gud Nyuz we de gi kol at.

¹⁶ Pantap ɔl dɛn tin ya, una shild na fɔ biliv pan di Masta. Dis shild ya go mek dɛn ɔt aro we Setan de shut, nɔ du una natin.

¹⁷ Una fɔ mek di sev we Gɔd dɔn sev una, bi di kyap we una go wɛr na una ed; ɛn una fɔ yus di sɔd we di Spirit gi una, dat na Gɔd in wɔd.

¹⁸ Una fɔ pre ɔltɛm fɔ ɔltin bay aw Gɔd in Spirit de tɛl una. Una fɔ waydawek ɛn una nɔ fɔ taya fɔ pre ɔltɛm fɔ Gɔd in pipul dɛn.

¹⁹ Ɛn una pre fɔ misɛf, mek Gɔd gi mi mɛsej so dat a nɔ go fred wɛn a de tɛl pipul bɔt di sikrit we de na di Gud Nyuz.

²⁰ Mi na Gɔd in mɛsenja we de na jel fɔseka di Gud Nyuz. Una pre fɔ mi, so dat a nɔ go fred fɔ tɔk bɔt Jizɔs Krays aw a fɔ tɔk bɔt am.

Pɔl In Las Wɔd dɛn na dis Lɛta

²¹ Taychikɔs, wi brɔda we wi lɛk, na pɔsin we de du di Masta in wok siriɔs wan. I go tɛl una ɔltin bɔt mi, so dat una go no aw a de ɛn wetin a de du.

²² A de sɛn Taychikɔs fɔ tɛl una ɔl wetin de bi to mi ɛn fɔ kɔrej una.

²³ Mi Kristiɛn brɔda dɛn, mek Gɔd we na wi Papa ɛn di Masta, Jizɔs Krays gi una ɔl kol at, ɛn mek di biliv we una biliv pan Jizɔs Krays mek una lɛk una kɔmpin.

²⁴ Mek Gɔd blɛs dɛn pipul we lɛk wi Masta, Jizɔs Krays fɔ tru.