Lɛta Fɔ Ɛfisɔs 5 - Krio Fɔs Oli Baybul

Una fɔ De Lɛkɛ Pipul we De Na Layt

¹ We una na Gɔd in pikin dɛn we i lɛk, una fɔ tray fɔ tan lɛkɛ am.

² Una fɔ gɛt lɛk na una at, jɛs lɛkɛ aw Krays lɛk wi, dɔn i gi in layf lɛkɛ sakrifays we gɛt swit sɛnt we mek Gɔd satisfay.

³ We una na Gɔd in pikin dɛn, i nɔ gud fɔ mek una liv fri layf, ɔ mek una du wetin nɔ rayt, ɔ mek una put yay pan wetin ɔda pɔsin gɛt; i nɔ gud sɛf fɔ mek una de tɔk bɔt dɛn tin ya to una kɔmpin.

⁴ Una nɔ fɔ tɔk bad, fulish, ɔ dɔti wɔd, bɔt una fɔ de tɛl Gɔd tɛnki.

⁵ Una fɔ no se: pɔsin we liv fri layf, pɔsin we gɛt bad at, ɔ pɔsin we want ɔltin fɔ insɛf (we jɛs tan lɛkɛ pɔsin we de pre to dɛn tin we mɔtalman mek fɔ pre to) nɔ go de na di ples we Krays de rul ɛn we Gɔd de rul.

⁶ Mek nɔbɔdi nɔ mek una ful wit wɔd we nɔ min natin, na ɔl dɛn tin ya de mek Gɔd vɛks pan dɛn pipul we nɔ de du wetin i tɛl dɛn fɔ du.

⁷ Una nɔ fɔ gɛt natin fɔ du wit dɛn kayn pipul ya.

⁸ Una bin de na dak, bɔt naw una dɔn bi di Masta in yon pipul, una dɔn de na di layt, una fɔ liv lɛkɛ pipul we de na di layt.

⁹ If una de na di layt, una go du wetin gud, ɛn wetin rayt ɛn tɔk wetin tru.

¹⁰ Una tray fɔ lan wetin di Masta want una fɔ du.

¹¹ Una nɔ du dɛn tin we dɛn ɔda pipul de du we nɔ go ɛp nɔbɔdi, na dɛn pipul we de na dak de du dɛn kayn tin ya; bɔt una fɔ briŋ dɛn tin ya kam na layt.

¹² Pipul go shem sɛf fɔ tɔk bɔt dɛn tin we dɛn pipul we de na dak de du, we nɔbɔdi nɔ si.

¹³ Bɔt wɛn wi briŋ dɛn bad tin kam na layt, da tɛm de ɔlman go si aw dɛn tan. Ɛni tin we yay dɔn si, de na layt.

¹⁴ Na dat mek dɛn rayt se, “Yu we de slip, yu wek, ɛn rayz frɔm di grev, ɛn Krays go gi yu layt.”

¹⁵ Una tek tɛm aw una liv una layf, una nɔ du lɛkɛ dɛn pipul we nɔ gɛt sɛns.

¹⁶ Ɛni chans we una gɛt fɔ du gud, una du ɔl wetin una ebul du, bikɔs dis tɛm ya na bad tɛm.

¹⁷ Una nɔ gri mek ɛnibɔdi mek una ful, una tray fɔ no wetin di Masta want una fɔ du.

¹⁸ Una nɔ fɔ drink wayn te una drɔnk we go mek una du bad, bɔt una fɔ mek Gɔd in Spirit de insay una gud gud.

¹⁹ Wɛn una de tɔk wit una kɔmpin dɛn, una fɔ tɔk bɔt wetin rayt na dɛn Sams ɛn dɛn Gɔd siŋ. Una fɔ siŋ Gɔd siŋ ɛn Sams wit ɔl una at fɔ prez di Masta.

²⁰ Una fɔ tek wi Masta Jizɔs Krays in nem tɛl Papa Gɔd tɛnki ɔltɛm fɔ ɔltin.

Aw Maredman ɛn In Wɛf Fɔ De

²¹ Una fɔ put unasɛf ɔnda una kɔmpin bikɔs una rɛspɛkt Krays.

²² Wɛf fɔ put insɛf ɔnda in man lɛkɛ se na Krays i de put insɛf ɔnda.

²³ Wetin mek a tɔk dat, na we di man gɛt pawa oba in wɛf lɛkɛ aw Krays gɛt pawa oba di chɔch, ɛn Krays insɛf sev di chɔch, we nain bɔdi.

²⁴ Lɛkɛ aw di chɔch put insɛf ɔnda Krays, na so di wɛf fɔ put insɛf ɔnda in man pan ɔltin.

²⁵ Man fɔ lɛk in wɛf lɛkɛ aw Krays lɛk di chɔch sote i day,

²⁶ fɔ mek di chɔch klin wit wata ɛn in wɔd, dɛn i an am oba gi Gɔd.

²⁷ Krays du ɔl dat, so dat wɛn i go mek di chɔch tinap bifo am, di chɔch go klin, i nɔ go gɛt bɔt pan am.

²⁸ Man fɔ lɛk in wɛf lɛkɛ aw i lɛk in yon bɔdi. Di man we lɛk in wɛf, lɛk insɛf.

²⁹ Nɔbɔdi nɔ de we nɔ lɛk insɛf, na dat mek pɔsin de it ɛn ol in bɔdi gud, lɛkɛ aw Krays de du fɔ di chɔch;

³⁰ bikɔs wisɛf na pat pan Krays in bɔdi.

³¹ Dɛn rayt na Gɔd in Buk se, “Na fɔseka dis, man go lɛf in mama ɛn papa, go mared wɛf ɛn di man ɛn in wɛf go bi wan.”

³² Wetin a jɛs tɔk bɔt sho wi tru tin we at fɔ ɔndastand, bɔt a no se dis tru tin na bɔt Krays ɛn di chɔch.

³³ Na di sem tin fɔ bi to una: ɛvri man we mared fɔ lɛk in wɛf lɛkɛ aw i lɛk insɛf, ɛn ɔl mared uman fɔ rɛspɛkt in man.