Lɛta Fɔ Ɛfisɔs 2 - Krio Fɔs Oli Baybul

Wi Gɛt Layf wit Krays

¹ Fɔs tɛm Gɔd bin de luk una lɛkɛ pipul we dɔn day, bikɔs una nɔ bin gri fɔ du wetin i tɛl una fɔ du.

² Da tɛm de una bin de du ɔl dɛn bad tin we di pipul dɛn na di wɔl de du. Una bin de du wetin di dɛbul dɛn edman we de ɔlɔbɔt tɛl una fɔ du, nain de rul dɛn pipul we nɔ de du wetin Gɔd tɛl dɛn fɔ du.

³ Wisɛf bin tan lɛkɛ dɛn, wi bin jɛs de du wetin wi fil fɔ du ɛn wetin wi at gi wi fɔ du; Gɔd bin fɔ vɛks pan wi lɛkɛ aw i vɛks pan dɛn ɔda pipul.

^4-5 Bɔt Gɔd sɔri fɔ wi ɛn bikɔs i lɛk wi bad wan, i gi wi layf wit Krays, pan ɔl we in Spirit bin dɔn lɛf wi we wi nɔ bin gri fɔ du wetin i tɛl wi fɔ du. Na di lɛk we Gɔd lɛk wi we wi nɔ fit fɔ gɛt dɔn sev wi.

⁶ Bikɔs wi gɛt wanwɔd wit Jizɔs Krays, Gɔd dɔn mek wisɛf rayz frɔm di grev lɛkɛ aw Jizɔs Krays bin rayz, so wisɛf de rul wit Jizɔs Krays na di ples we de nɛks wɔl.

⁷ Gɔd du ɔl dis fɔ sho wi frɔm naw sote go aw i lɛk wi bikɔs wi gɛt wanwɔd wit Jizɔs Krays.

⁸ Nɔto una sev unasɛf, bɔt na bikɔs una biliv pan Jizɔs Krays mek, we Gɔd lɛk una wit lɛk we una nɔ fit fɔ gɛt, i sev una.

⁹ Una nɔ gɛt natin fɔ tek bost, bikɔs nɔto ɛnitin we una du, sev una.

¹⁰ Na Gɔd mek wi ɛn bikɔs wi gɛt wanwɔd wit Jizɔs Krays, Gɔd dɔn gi wi nyu layf. Gɔd bin dɔn plan lɔntɛm se we wi dɔn gɛt dis nyu layf, wi go de ɛp ɔda pipul.

Krays Dɔn Mek Wi Ɔl Bi Wan Pipul

¹¹ Na dat mek una dɛn pipul we nɔto Ju we dɛn Ju pipul de kɔl “pipul we nɔ sakɔmsayz,” fɔ mɛmba se, da sakɔmsayz de na fɔ mɔtalman nɔmɔ.

¹² Fɔstɛm una nɔ bin gɛt wanwɔd wit Krays. Una nɔ bin kɔnt pan dɛn pipul we Gɔd dɔn pik; una bin de lɛkɛ trenja. Una nɔ bin gɛt pan wetin Gɔd prɔmis in pipul dɛn. Una bin jɛs de na di wɔl; una nɔ bin biliv pan Gɔd ɛn una nɔ bin gɛt say fɔ abop.

¹³ Bɔt naw we una dɔn gɛt wanwɔd wit Jizɔs Krays, una we nɔ bin de klos Gɔd, di day we Krays day dɔn briŋ una klos Gɔd.

¹⁴ Krays dɔn gi una kol at, i dɔn mek dɛn pipul we nɔto Ju ɛn dɛn pipul we na Ju, bi wan. Di day we Krays day dɔn pwɛl di tin we bin mek di tu neshɔn dɛn nɔ lɛk dɛn kɔmpin.

¹⁵ Jizɔs Krays put di Ju Lɔ ɛn di ɔda lɔ dɛn we di Ju pipul dɛn bin mek, wansay, so dat i go mek di tu neshɔn dɛn bi wan neshɔn we go bi in yon ɛn dɛn ɔl go gɛt wanwɔd.

¹⁶ Krays gri fɔ mek pipul kil am na di krɔs so dat i go pwɛl di tin we mek di tu neshɔn dɛn nɔ lɛk dɛnsɛf. Di day we Krays day dɔn mek di tu neshɔn dɛn gɛt wanwɔd, ɛn i briŋ dɛn kam bak to Gɔd.

¹⁷ Krays kam fɔ tɛl ɔlman bɔt di Gud Nyuz we de gi kol at. Dis Gud Nyuz ya de fɔ dɛn Ju pipul we bin de klos Gɔd ɛn dɛn pipul we nɔto Ju we nɔ bin de klos Gɔd.

¹⁸ Di tin we Krays dɔn du fɔ ɔlman mek wi ebul fɔ kam klos Gɔd we na wi Papa bay Gɔd in Spirit.

¹⁹ Wi ɔl na wan pipul bifo Gɔd ɛn wi gɛt di sem rayt lɛkɛ di wan we ɔl Gɔd in pipul dɛn gɛt, una na Gɔd in pikin dɛn.

²⁰ Na dɛn tin we dɛn apɔsul ɛn dɛn prɔfɛt bin tɛl una, ɛn di layf we dɛn bin liv, na dat na di fawndeshɔn we una layf sidɔm pan. Jizɔs Krays na di fɔs ston we dɛn bil pan.

²¹ Krays na di pɔsin we ol ɔl di os togɛda, ɛn i de tɔn di os smɔl smɔl to Gɔd we na di Masta, in yon.

²² We una na Jizɔs Krays yon pipul, una ɛn dɛn ɔda pipul we na Jizɔs Krays yon semwe dɔn bi wan, una ɔl na pat pan di os we Gɔd in Spirit de.