Egay 2 - Krio Fɔs Oli Baybul

Aw PAPA GƆD In Os Fayn.

¹ Insay di sɛkɛn ia we Dariɔs bi kiŋ, na di twɛnti-wande na di sem mɔnt, nain PAPA GƆD tɔk bak to di prɔfɛt Egeay bɔt di pipul dɛn.

² I tɛl Egeay fɔ aks Zɛrubabɛl we na Shialtiɛl in bɔypikin ɛn na di gɔvna na Juda, Jɔshwa we na Jɛozedak in yon bɔypikin ɛn na di bigman fɔ dɛn man we de mek sakrifays fɔ pipul sin, ɛn ɔl di balans pipul se,

³ udat lɛf we go mek PAPA GƆD in os fayn lɛk aw i bin fayn. I se lɛ dɛn kɔmpia am naw, if i nɔ fiba lɛk wetin nɔ min natin.

⁴ I se PAPA GƆD se Zɛrubabɛl nɔ fɔ pwɛlat, Jɔshwa, we na Jɛozedak in bɔypikin ɛn na di bigman fɔ dɛn man we de mek sakrifays fɔ pipul sin, insɛf nɔ fɔ pwɛlat wit ɔl di ɔda pipul na di land. PAPA GƆD se dɛn fɔ jɛs du di wok bikɔs in PAPA GƆD de wit dɛn,

⁵ lɛkɛ aw i bin dɔn prɔmis dɛn wɛn i bin pul dɛn kɔmɔt na Ijipt. In Spirit go de wit dɛn, so dɛn nɔ fɔ fred.

⁶ PAPA GƆD Ɔlmayti se, i nɔ go te igen, i go ple wɔwɔ wan tɛm mɔ. I go mek ɛvin shek ɛn athkwek go bi na di wɔl, dɔn i go shek di si ɛn di dray land;

⁷ ɛn i go mek dɛn pawaful neshɔn dɛn lɔs dɛn pawa, so dat ɔl wetin dɛn dɔn gɛda go kam bi Jerusɛlɛm yon, dɔn PAPA GƆD in os go de fayn fayn wan. Na so PAPA GƆD Ɔlmayti se.

⁸ PAPA GƆD Ɔlmayti se nain gɛt di silva ɛn di gold dɛn.

⁹ I se aw PAPA GƆD in os go fayn go pas aw i bin fayn fɔs. PAPA GƆD Ɔlmayti se, i go mek shɔ se di pipul dɛn prɔspa, dɛn go ɛnjɔy gud gud tin dɛn ɛn liv wil kolat.

Di Prɔfɛt Egeay Go To Di Man Dɛn We De Mek Sakrifays Fɔ Pipul Sin Fɔ Advays Am

¹⁰ Na di twɛnti-fo de na di nɔmba nayn mɔnt insay di sɛkɛn ia we Dariɔs na bin kiŋ, PAPA GƆD tɔk to di prɔfɛt Egeay fɔ tɛl di pipul se,

¹¹ in PAPA GƆD Ɔlmayti se, Egeay fɔ aks di man dɛn we de mek sakrifays fɔ pipul sin fɔ tɛl am wetin dis,

¹² if pɔsin put oli bif nain skat pɔkit, dɔn di skat tɔch bred, ɔ pap ɔ ɔyl ɔ ɛni ɔda tin fɔ it, dɛn tin dɛn de sɛf go gɛt olinɛs? Di man dɛn we de mek sakrifays fɔ pipul sin ansa am se, nɔ.

¹³ Dɛn Egeay as dɛn se, if pɔsin we nɔ klin na PAPA GƆD yay bikɔs i dɔn tɔch dedebɔdi, tɔch dɛn tin ya, if di tin dɛnsɛf de tɔn tin dɛn we nɔ klin na PAPA GƆD yay. Di man dɛn we de mek sakrifays fɔ pipul sin ansa se, dɛn tin de dɛnsɛf nɔ go klin na PAPA GƆD yay.

¹⁴ Dɛn Egeay tɛl dɛn se, PAPA GƆD se na so i bi wit in pipul dɛn ɛn ɔl wetin dɛn de du ɛn ivin wetin dɛn de gi am we nɔ klin nain yay.

PAPA GƆD Prɔmis Se I Go Blɛs Dɛn

¹⁵ PAPA GƆD se naw dɛn fɔ de tink bɔt wetin gɛt fɔ apin bambay. I se bifo dɛn bin le di fawndeshɔn fɔ bigin bil PAPA GƆD in os bak,

¹⁶ wetin bin de apin? Wɛn dɛn kin ɛkspɛkt se dɛn de gɛt twɛnti tin pan wetin dɛn plant, na tɛn nɔmɔ dɛn kin gɛt; wɛn dɛn de ɛkspɛkt fifti galɔn wayn, na twɛnti galɔn, dɛn kin gɛt.

¹⁷ I se i bin de mek ɔl wetin dɛn plant mɛleju ɛn dɔn i kin lɛ da ren we fiba grabul-grabul pwɛl dɛn; bɔt pan ɔl dat dɛn nɔ tɔn dɛn at to PAPA GƆD.

¹⁸ I se frɔm da de de we na di twɛnti-fo de na di mɔnt we mek nayn, dɛn fɔ bigin de tink bɔt wetin gɛt fɔ apin. Frɔm di de we dɛn le fawndeshɔn fɔ PAPA GƆD in os, na fɔ de mɛmba dat.

¹⁹ I aks dɛn se, ivin if i tan lɛk se nɔn sid nɔ de, if dat min se di greps tik, di fig tik, di pomigranet tik ɛn di ɔliv tik dɛn, nɔ go bia natin. I prɔmis se, dɛn go gɛt ɔltin bak.

PAPA GƆD in prɔmis to Zɛrubabɛl

²⁰ PAPA GƆD tɔk bak fɔ di sɛkɛn tɛm to Prɔfɛt Egeay, di twɛnti-fo de na di mɔnt.

²¹ I tɛl Egeay fɔ tɛl Zɛrubabɛl we na gɔvna na Juda se, in, PAPA GƆD dɔn rɛdi fɔ shek ɛvin ɛn ath,

²² ɛn i go ovatro di kindɔm dɛn; i se in dɔn rɛdi fɔ nɔnsɛns dɛn trɛnk dɛn na dɛn neshɔn wit kiŋ dɛn, ɛn i go mek dɛn ɔs ɛn karej ɛn di man dɛn we de rayd dɛn wit di ɔs dɛn ɛn dɛn yon rayda dɛn, ɔl day wan bay wan we dɛn kɔmpin dɛn go kil dɛn.

²³ PAPA GƆD Ɔlmayti se fɔ tɛl Zɛrubabɛl we nain wokman ɛn we na Shialtiɛl in bɔypikin se, in PAPA GƆD se, na da de de i go mek i tan lɛk riŋ we dɛn de tek sayn, fɔ sho se i gɛt pawa, bikɔs nain PAPA GƆD Ɔlmayti dɔn pik am.