Ɛkliziastis 9 - Krio Fɔs Oli Baybul

¹ Na ɔl dis a sidɔm tink bɔt; a luk insay ɔltin. Aw di pɔsin we de waka tret wit PAPA GƆD ɛn di pɔsin we gɛt sɛns, ɛn di tin dɛn we dɛn de du, de na PAPA GƆD in an; nɔbɔdi nɔ no if na lɛk PAPA GƆD lɛk dɛn ɔ na et i et dɛn fɔ wetin dɛn de du. Ɔltin we dɛn gɛt fɔ du

² na fɔ natin. Na di sem tin de bi to dɛn ɔl; di wan we de waka tret wit PAPA GƆD ɛn di wan we nɔ de waka tret wit PAPA GƆD, di wan we gud ɛn to di wan we nɔ gud, di wan we klin na PAPA GƆD yay ɛn di wan we nɔ klin na PAPA GƆD yay, di wan we de mek sakrifays ɛn di wan we nɔ de mek sakrifays. Na di sem tin we de bi to di wan we de kɔmit sin, de bi to di wan we nɔ de kɔmit sin; na di sem tin de apin to di wan we de swɛ ɛn di wan we nɔ de swɛ.

³ Wan bad bad tin de bi na di wɔl; dat na we na di sem kayn tin de apin to ɔlman. Wetin bad mɔ, na dat na so so bad bad tin de na dɛn at; na kres kres tin kin de na dɛn at we dɛn de na wɔl. Afta ɔl dat, dɛn kin day go.

⁴ Bɔt udat gɛt layf, gɛt op, bikɔs dɔg we gɛt layf bɛtɛ pas layɔn we dɔn day.

⁵ Di wan we nɔ day yet no se in gɛt fɔ day, bɔt dayman nɔ de no natin. Dɛn nɔ gɛt fɔ gɛt natin igen ɛn pipul nɔ gɛt tɛm fɔ mɛmba dɛn igen sɛf.

⁶ Di lɛk we dɛn lɛk ɔ di et we dɛn et ɛn di jɛlɔs we dɛn de jɛlɔs dɔn dɔn; dɛn nɔ go ɛva du tin na dis wɔl igen

⁷ So, ɛnjɔy yu it, ɛn drink yu wayn wit gladi; bikɔs PAPA GƆD dɔn gri lɔntɛm se na so yu go du.

⁸ Yu fɔ drɛs fayn ɔltɛm ɛn rɔb ɔyl na yu ed ɔltɛm.

⁹ Ɛnjɔy yusɛf wit di wɛf we yu lɛk, na dis fɔnatin layf we PAPA GƆD gi yu na dis wɔl, bikɔs na so PAPA GƆD se i fɔ bi fɔ yu, ɛn na pat di wok we yu de wok na dis wɔl.

¹⁰ Mek shɔ se we yu de du ɛnitin, yu du am gud wit ɔl yu at; bikɔs we yu day, yu nɔ go gɛt fɔ wok yanda. Yu nɔ gɛt fɔ tink ɔ sabi ɛnitin, ɛn sɛns biznɛs nɔ de usay yu de go.

¹¹ A fɛnɔt igen na dis wɔl se, i nɔ min se yu go win bikɔs yu kin rɔn fast, ɛn i nɔ min se pɔsin nɔ go bit yu bikɔs yu gɛt trɛnk. Semweso, nɔto sɛns de gi yu mɔni, yu nɔ de jɛntri bikɔs yu gɛt sɛns ɛn nɔto bikɔs yu sabi du tin, mek yu go gɛt wok; na lɔk nɔmɔ de mek bɛtɛ fala yu.

¹² Mɔtalman nɔ no wetin go bi to am. Lɛk we nɛt kin kech fish, ɛn trap de kech bɔd, na so mɔtalman sɛf kin fɔdɔm insay bad trap we sɔntin kin jɛs apin to am so.

¹³ A dɔn si ɔda tin we de bi na wɔl we mek sɛns. I big na mi yay.

¹⁴ Wan smɔl siti bin de we di pipul dɛn we bin de de, nɔ bin plɛnti; Nain wan tɔf tɔf kiŋ go atak am ɛn sɔrawnd am, de bil tin dɛn rawnd di siti fɔ blɔk blɔk am.

¹⁵ Bɔt wan poman bin de de we gɛt sɛns, ɛn nain sɛns i yuz fɔ pul di siti pan waala. Pan ɔl dat, nɔbɔdi nɔ tink bɔt da po man de igen

¹⁶ Na dat mek a se sɛns bɛtɛ pas trɛnk, bɔt nɔbɔdi nɔ fil se poman fɔ gɛt sɛns ɛn dɛn nɔ de lisin to am sɛf.

¹⁷ I bɛtɛ fɔ lisin to di saful saful we, we pɔsin we gɛt sɛns de tɔk, pas fɔ de yɛri we dɛn fulman dɛn bigman de ala.

¹⁸ Fɔ gɛt sɛns bɛtɛ pas fɔ gɛt tin dɛn fɔ tek fɛt, ɛn na wan rɔtin fish de pwɛl ɔl di ɔda wan dɛn.