Ɛkliziastis 8 - Krio Fɔs Oli Baybul

¹ Udat tan lɛk pɔsin we gɛt sɛns? Udat no aw fɔ intaprit ɛnitin? Sɛns de mek pɔsin fes shayn ɛn di twis we i de twis in fes, chenj.

Du Wetin Di Kiŋ Se

² Du wetin di kiŋ se bikɔs na dat yu bin dɔn prɔmis PAPA GƆD.

³ Nɔ fred natin; kɔmɔt bifo am. Nɔ westɛm bifo kiŋ we di tin we mek yu go bifo am nɔto gud wan, bikɔs i kin du ɛnitin.

⁴ Bikɔs wetin di kiŋ se, nɛf kɔt. Udat go aks am se wetin i du so.

⁵ Pɔsin we de du wetin dɛn se fɔ du, nɔ de gɛt prɔblɛm, ɛn sɛnsman no wɛn ɛn aw fɔ du tin.

⁶ Ɔltin gɛt tɛm ɛn aw fɔ du am, ɔlwe mɔtalman gɛt plɛnti plɛnti trɔbul.

⁷ Fɔ tru, dɛn nɔ no wetin fɔ bi, bikɔs nɔbɔdi nɔ ebul tɔk aw i go bi.

⁸ Nɔbɔdi nɔ gɛt pawa oba in layf, ɔ pawa fɔ tap day. Aw dɛn nɔ de sak soja na batul fil, na so wikɛdnɛs nɔ de sev wikɛd pɔsin.

⁹ Na ɔl dɛn tin ya a notis we a de lan bɔt dis wɔl; wɔl we pipul we gɛt pawa de sɔprɛs di wan we i gɛt pawa pas te dɛn ambɔg dɛnsɛf.

Di Gud Pɔsin Ɛn Di Bad Pɔsin

¹⁰ A si we dɛn de bɛr bad pipul dɛn; na so dɛn bin de go insay ɛn kɔmɔt na do na PAPA GƆD in os. Pipul bin de prez dɛn usay dɛn bin dɔn du bad tin dɛn. Dis sɛf na fɔ natin.

¹¹ Na bikɔs we pɔsin du bad, dɛn nɔ de gi jɔjmɛnt kwik, na dat mek pipul de kɔntinyu fɔ du bad.

¹² Ɔl we sina dɛn de du bad tin ɔndrɛd tɛm ɛn dɛn layf kin stil lɔŋ, mi no se ɔltin go go fayn fɔ di wan dɛn we de fred PAPA GƆD, bikɔs dɛn rɛspɛkt am,

¹³ bɔt i nɔ go bi fɔ di bad man. In layf go tan lɛk shado ɛn i mɔs day kwik, bikɔs i nɔ de fred PAPA GƆD.

¹⁴ Wan fɔnatin tin de bi na di wɔl; dat na dat, sɔm man dɛn de we de waka tret wit PAPA GƆD bɔt na wetin fɔ bi to di bad pipul, de bi to dɛn, ɛn bad pipul de we na wetin fɔ bi to udat de waka tret wit PAPA GƆD, de bi to dɛn. A bin tɔk se ɔl dis sɛf, na fɔ natin.

¹⁵ Na dat mek a se pɔsin fɔ ɛnjɔy insɛf, bikɔs natin nɔ de na dis wɔl we bɛtɛ fɔ mɔtalman pas fɔ it ɛn fɔ drink ɛn fɔ ɛnjɔy insɛf. Na so dɛn go de yagba na layf te di tɛm dɔn we PAPA GƆD gi dɛn na dis wɔl.

¹⁶ Wɛn a tray fɔ ɔndastand wetin de apin na wɔl, a si se a nɔ ebul fɔ slip santɛm, a nɔ ebul fɔ slip na nɛt;

¹⁷ na da tɛm de a ebul fɔ si ɔl wetin PAPA GƆD de du, we nɔbɔdi na dis wɔl nɔ go ebul ɔndastand. I lɛk aw dɛn tray fɔ fɛnɔt te, dɛn nɔ go ebul. Ɔl we dɛn sɛnsman dɛn de se dɛn gɛt sɛns, dɛn nɔ go ɛva ebul fɛnɔt PAPA GƆD in wok.