Ɛkliziastis 7 - Krio Fɔs Oli Baybul

Wetin Fɔ Tink Bɔt Layf

¹ Gudnem bɛtɛ pas dia dia pafyum; ɛn di de we pɔsin day bɛtɛ pas di de we i bɔn.

² I bɛtɛ fɔ go na bɛrin os pas fɔ go na os we gɛt pati; bikɔs ɔl mɔtalman gɛt fɔ day ɛn di wan dɛn we nɔ day yet fɔ de mɛmba dat ɔltɛm.

³ Fɔ sɔri bɛtɛ pas fɔ gladi bikɔs sɔri de mek pɔsin at machɔ.

⁴ Pɔsin we gɛt sɛns kin de tink bɔt pipul we de munin; bɔt fulman in jɛs de mɛmba aw in go ɛnjɔy insɛf.

⁵ I bɛtɛ fɔ mek pɔsin lisin wɛn man we gɛt sɛns de tɔk pan am pas fɔ yɛri we fulman de siŋ.

⁶ Bikɔs we fulman laf, i kin tan lɛk we dray tik de spak ɔnda pɔt na faya; ɔl dis na fɔ natin, i nɔ min natin.

⁷ Na tru se we tin de mɔna pɔsin we gɛt sɛns, i kin mek i ful, ɛn braybri de mek pɔsin nɔ du wetin rayt.

⁸ Aw sɔntin tan we i dɔn dɔn, bɛtɛ pas aw i bin tan we i bin bigin; pɔsin we peshɛnt wit PAPA GƆD nain at, bɛtɛ pas di wan we prawd.

⁹ Nɔ kwik fɔ vɛks bikɔs na fulman gɛt soso vɛksteshɔn nain at.

¹⁰ Nɔ bigin aks se wetindu tin bin bɛtɛ fɔstɛm pas naw, bikɔs pɔsin we gɛt sɛns nɔ de aks dɛn kayn kwɛshɔn de.

¹¹ Fɔ gɛt sɛns gud fashin tan lɛk we dɛn day lɛf prɔpati gi pɔsin, na advantej to pɔsin na wɔl.

¹² We yu kip yu sɛns fɔ yu jab, i tan lɛk we yu kip mɔni fɔ bambay; ɛn di advantej we yu go gɛt we yu lan, na dat, sɛns kin mek yu layf lɔŋ.

¹³ Tink bɔt PAPA GƆD in wok; Udat go ebul tret wetin PAPA GƆD dɔn bɛn?

¹⁴ Di de we tin gud fɔ yu na fɔ gladi, bɔt di de we tin nɔ bi lɛk aw yu want am, na fɔ tink bɔt wetin de apin; na PAPA GƆD mek di gud tɛm ɛn nain sem wan mek di tɛm we tin nɔ gud, so dat mɔtalman nɔ go no wetin de apin to am.

¹⁵ Na dis mi layf we nɔ min natin, mi yay dɔn si ɔltin; man de we de waka tret wit PAPA GƆD kin day de waka tret, bɔt wikɛd man kin gɛt lɔŋ layf pan ɔl we dɛn de du bad.

¹⁶ Nɔ waka tret tumɔs ɛn nɔ fɔ mek se yu gɛt sɛns tumɔs. Wetin mek yu de kil yusɛf?

¹⁷ Nɔ biev lɛk fulman ɛn jɛs de du bad. Nɔ mek yu day bifo yu tɛm.

¹⁸ I gud fɔ ol wan say ɛn nɔ trowe di ɔda wan; bikɔs pɔsin we de fred PAPA GƆD go sɔksid wit dɛn tu.

¹⁹ Sɛns kin mek pɔsin gɛt pawa pas we tɛn pɔsin de rul wan siti.

²⁰ Na tru se nɔbɔdi nɔ de na wɔl we de du wetin PAPA GƆD want ɔltɛm ɛn nɔ de ɛva sin.

²¹ Nɔ tray fɔ lisin ɔl wetin pipul dɛn de se, ɔ nɔso, wande, yu go yɛri we yu wokman de kɔs yu;

²² ɛn yusɛf no gud gud wan se yusɛf dɔn kɔs ɔda pipul dɛn plɛnti tɛm.

²³ A dɔn tek tɛm wach ɔl dɛn tin dɛn ya gud wit sɛns. A tɛl misɛf se dat go mek a gɛt sɛns. Bɔt usay! Sɛns nɔ de nia mi sɛf.

²⁴ We sɔntin de we pas yu, i pas yu. Pɔsin nɔ go no natin bɔt am.

²⁵ A disayd fɔ stɔdi mek a go no mɔ tin dɛn ɛn ɔndastand aw i bad fɔ mek pɔsin jɛs de fulish, ɛn aw fulman tan lɛk udat kres.

²⁶ Di tin we a fred pas day na uman we na trap, uman we in at na trap ɛn nɛt, ɛn de fɔ grip ɔltin. Na pɔsin we de du wetin PAPA GƆD want nɔmɔ, in trap nɔ go kech, bɔt i go kech sina izi wan.

²⁷ Di Pricha se fɔ luk wetin in fɛn; i si se i tray fɔ ad wan to wan mek i go no di ansa.

²⁸ I dɔn tɔn tɔn ɔltin oba nain maynd bɔt nɔ fɛnɔt natin. Na wangren tret man pan wan tawzin man a fɛn, bɔt i nɔ ebul fɛn nɔn nɔn uman.

²⁹ Na dis nɔmɔ a ebul fɔ fɛnɔt; dat na we PAPA GƆD mek mɔtalman tret; bɔt na mɔtalman mekmek te in layf bɛnbɛn.