Ɛkliziastis 6 - Krio Fɔs Oli Baybul

¹ Wan bad tin de we a dɔn si na wɔl we de apin to mɔtalman plɛnti:

² PAPA GƆD kin gi sɔm pipul dɛn jɛntri, prɔpati ɛn rɛspɛkt, so dat dɛn nɔ kin krach dɛn ed fɔ natin. Bɔt PAPA GƆD nɔ kin mek i ebul ɛnjɔy ɔl dɛn tin dɛn de; na trenja kin kam ɛnjɔy dɛn; dis na fɔ natin. Na tin we penful.

³ Pɔsin kin bɔn wan ɔndrɛd pikin ɛn de te i ol; bɔt i nɔ mata aw lɔŋ i liv, if i nɔ ɛnjɔy layf ɛn we i day dɛn nɔ mek soba bɛrin fɔ am, pikin we bɔn day wan sɛf bɛtɛ pas am.

⁴ Bikɔs di pikin we bɔn day wan kam na dis fɔ natin wɔl, day wan, so nɔbɔdi nɔ go ebul fɔ tɔk bɔt am as i nɔ ivin gɛt nem;

⁵ we yu luk am gud, i nɔ si san wande ɛn nɔ no natin; bɔt i de rɛst wit kol at pas dɛn jɛntriman dɛn we nɔ de ɛnjɔy dɛn jɛntri.

⁶ I lɛk i de na wɔl fɔ tu tawzin ia ɛn nɔ ɛnjɔy natin, nɔto di sem ples dɛn ɔltu de go?

⁷ Ɔl wetin pɔsin de yagba fɔ, na fɔ mek i gɛt wetin fɔ it, bɔt pan ɔl dat, di bɛlɛ nɔ de satisfay.

⁸ Di sem bɛnifit we di man we gɛt sɛns gɛt, na di sem bɛnifit di fulman insɛf gɛt. Wetin di poman gɛt fɔ bɛnifit if i no aw fɔ waka na layf?

⁹ We yu si sɔntin, bɛtɛ pas we yu de swɛla pit fɔ tin we yu nɔ si; ɔl na fɔ natin ɛn i tan lɛk we pɔsin de tray fɔ kech briz.

¹⁰ Ɛnitin we de bi naw, bin dɔn bi ɛn i gɛt nem, ɛn ɔlman no se mɔtalman na mɔtalman ɛn dɛn nɔ go ebul fɔ agyu pɔsin we pas dɛn.

¹¹ Di mɔ pɔsin de tɔk tɔk, na di mɔ yu de si se layf na fɔ natin; aw naw yu go se wan pɔsin bɛtɛ pas in kɔmpin.

¹² Udat no wetin gud fɔ mɔtalman we na tu- tri de i gɛt na di fɔnatin-wɔl, ɛn in layf de pas lɛk shado? Udat de we go ebul tɛl pipul wetin go apin bambay?