Ɛkliziastis 4 - Krio Fɔs Oli Baybul

¹ A bin si ɔl di bad bad tin dɛn we pipul dɛn de du to dɛn kɔmpin dɛn na wɔl. A si dɛn we dɛn de kray ɛn nɔ gɛt pɔsin fɔ tɛl dɛn ɔsh. Nɔbɔdi nɔ gɛt maynd fɔ ɛp dɛn bikɔs di wan dɛn we de du dɛn bad gɛt pawa.

² A tink se di wan dɛn we dɔn day bɛtɛ pas di wan dɛn we stil de na wɔl,

³ bɔt di wan dɛn we bɛtɛ pas dɛn tu pipul dɛn de, na di wan we nɔ bɔn kam na wɔl yet ɛn nɔ si di bad bad tin dɛn we mɔtalman de du na wɔl.

⁴ A si se ɔl di wok ɛn sɛns we mɔtalman de sho pan in wok na bikɔs i wan tan lɛk ɔda pɔsin. Bɔt ɔl dat na fɔ natin. I tan lɛk we yu de tray fɔ kech briz.

⁵ Fulman les ɛn i nɔ wan wok, bɔt na so i go day wit aŋri insay in po.

⁶ Wan mɔndɔ kwayɛt layf bɛtɛ pas tu mɔndɔ yagba fɔ natin lɛk fɔ rɔnata briz.

⁷ We a luk gud a si se ɔltin na wɔl nɔ min natin.

⁸ Pɔsin we nɔ gɛt nɔbɔdi; we nɔ gɛt pikin ɔ ivin brɔda, bɔt de wok traŋa traŋa wan ɛn nɔ de satisfay wit wetin dɛn gɛt, nɔ de ɛva sidɔm ɛn aks insɛf se udat dɛn de wok ɔl da wok de fɔ, ɛn nɔ de ebul ɛnjɔy in layf. Dis sɛf na natin ɛn nɔ de mek pɔsin gladi.

⁹ I bɛtɛ fɔ tu pipul fɔ wok pas wan, bikɔs dɛn go gɛt bɛtɛ bɛnifit fɔ dɛn wok.

¹⁰ Bikɔs if wan pɔsin fɔdɔm, di ɔda wan go es am ɔp; bɔt trɔbul go mit di wan we in wangren de wok; we i go fɔdɔm, nɔbɔdi nɔ go de fɔ es am.

¹¹ Ɛn if dɛn tu pipul lidɔm togɛda, kol nɔ go kech dɛn; bɔt i nɔ pɔsibul fɔ lidɔm yu wan ɛn kol nɔ kech yu.

¹² If pɔsin atak wan pɔsin, i go ebul bit am. Bɔt if na dɛn tu di pɔsin atak, dɛn go ebul bit di wan we atak dɛn. Tri rop go at fɔ kɔt.

¹³ Yɔŋman we po ɛn gɛt sɛns bɛtɛ pas kiŋ we ol bɔt i fulish we nɔ de tek advays,

¹⁴ pan ɔl we na bin jelman bifo i bi kiŋ ɔ na bin poman na di say we i bin tap.

¹⁵ A de wach ɛn notis se ɔlman na wɔl de go ɔp ɛn dɔŋ pan dɛn yon biznɛs. Bɔt wan yɔŋman bin de we jɛs tinap saful ɛn nain go gɛt fɔ tek di kiŋ in ples.

¹⁶ We i bi kiŋ, i go gɛt fɔ rul ɔlman ɛn di wan dɛn we go bi kiŋ afta am nɔ go gladi wit wetin i du. Dis insɛf na fɔ natin ɛn i tan lɛk we pɔsin de tray fɔ kech briz.