Ɛkliziastis 3 - Krio Fɔs Oli Baybul

Ɔltin Gɛt In Yon Tɛm

¹ Fɔ ɛnitin we pɔsin wan du, di rayt tɛm de; ɔltin gɛt in tɛm na dis wɔl:

² tɛm de fɔ bɔn, ɛn tɛm de fɔ day; tɛm de fɔ plant, ɛn tɛm de fɔ pik wetin yu plant;

³ tɛm de fɔ kil, ɛn tɛm de fɔ mɛn; tɛm de fɔ brok, ɛn tɛm de fɔ bil;

⁴ tɛm de fɔ kray, ɛn tɛm de fɔ laf; tɛm de fɔ munin, ɛn tɛm de fɔ gladi;

⁵ tɛm de fɔ mek lɔv ɛn tɛm de we nɔ fɔ mek lɔv tɛm de fɔ gladi ɛn grip yu kɔmpin ɛn tɛm de we nɔ fɔ gladi ɛn grip yu kɔmpin;

⁶ tɛm de fɔ luk fɔ wetin lɔs, ɛn tɛm de fɔ lɔs sɔntin; tɛm de fɔ kip, ɛn tɛm de fɔ trowe tin dɛn;

⁷ tɛm de fɔ chɛr, ɛn tɛm de fɔ so; tɛm de fɔ sɛt mɔt, ɛn tɛm de fɔ tɔk;

⁸ tɛm de fɔ lɛk ɛn tɛm de fɔ et tɛm de fɔ wa, ɛn tɛm de fɔ pis.

⁹ Wetin pɔsin de gen fɔ ɔl di yagba we i de yagba?

¹⁰ A dɔn si wetin PAPA GƆD gi mɔtalman fɔ du we go kip am bizi.

¹¹ I mek ɔltin fayn fɔ bi di tɛm we i fɔ bi, dɔn i mek mɔtalman de wɔndrin bɔt wetin gɛt fɔ apin nɛks wɔl, bɔt pan ɔl dat, wi nɔ ebul ɔndastand PAPA GƆD in wok.

¹² A no se natin nɔ de we bɛtɛ pas fɔ de gladi ɛn ɛnjɔy yusɛf wans yu gɛt layf;

¹³ ɛn mɛmba se PAPA GƆD want ɔlman fɔ it, drink ɛn ɛnjɔy ɔl wetin i lebɔ fɔ.

¹⁴ A no se ɔl wetin PAPA GƆD de du go de sote go; nɔbɔdi nɔ ebul ad pan am ɛn nɔbɔdi nɔ ebul pul kɔmɔt de; na so PAPA GƆD want am so dat mɔtalman go fred am.

¹⁵ Wetin de bi naw bin dɔn bi ɛn wetin gɛt fɔ bi, insɛf bin dɔn bi, ɛn PAPA GƆD want wi fɔ tray fɔ no wetin de bi

Di wɔl nɔ lɛvul

¹⁶ Pantap dat, a si se na dis wɔl ya, usay pɔsin fɔ jɔj tret, na soso wikɛdnɛs de de, ɛn usay pipul fɔ de waka tret, na so so wikɛdnɛs.

¹⁷ A tɛl misɛf se PAPA GƆD go jɔj di raychɔs man ɛn di wikɛd man di tɛm we i dɔn pik fɔ ɔltin.

¹⁸ A tɛl misɛf se, we i kam pan mɔtalman, PAPA GƆD de tɛst am fɔ sho am se i nɔ pas animal.

¹⁹ Mɔtalman ɛn animal de ɛnd di sem we; na day wi dɛn gɛt fɔ day. Na di sem kayn layf ɔltu gɛt, ɛn mɔtalman nɔ bɛtɛ pas animal; ɔl na fɔ natin.

²⁰ Na bɛr dɛn de bɛr dɛn ɔltu. Na dɔti dɛn tek mek dɛn ɛn na dɔti dɛn de go bak we dɛn day.

²¹ Udat no if mɔtalman in spirit de go ɔp we i day, ɔ if di animal in yon spirit na dɔŋ i de go?

²² So a si se natin nɔ bɛtɛ pas fɔ mek mɔtalman ɛnjɔy wetin i de du, bikɔs na dat PAPA GƆD se fɔ bi to am; nɔbɔdi nɔ go ebul tɛl am wetin go bi wɛn i dɔn day.