Ɛkliziastis 2 - Krio Fɔs Oli Baybul

¹ A tɛl misɛf se a go ɛnjɔy misɛf si. Bɔt eya, dis wan sɛf nɔ gɛt bɛnifit.

² A tɔk bɔt laf laf sɛf na kres biznɛs ɛn bɔt ɛnjɔymɛnt se us yus i gɛt?

³ A se mek a si aw i tan fɔ drink rɔm– bɔt a bin stil de yuz mi sɛns we bin de gyad mi. A bin wan no igen aw fulish pɔsin kin fil, so dat a go no wetin gud fɔ mɔtalman na dis wɔl we na shɔt tɛm nɔmɔ i gɛt na wɔl.

⁴ A du big tin dɛn; a bil os dɛn, a mek greps fam dɛn fɔ misɛf.

⁵ A mek gadin dɛn ɛn pak dɛn fɔ misɛf ɛn plant ɔlkayn frut tik dɛn de.

⁶ A mek ples fɔ gɛda wata fɔ wata di bɔku bɔku tik dɛn we de gro.

⁷ A bay man ɛn uman slev dɛn, ɛn bin ivin gɛt slev dɛn we bɔn na mi os; a bin gɛt bɔku bɔku kaw ship ɛn got pas ɔl udat dɔn ɛva tap na Jerusɛlɛm.

⁸ A gɛda jɛntri fɔ misɛf frɔm di ples we dɛn de kip kiŋ dɛn kɔpɔ na ɔl di land dɛn we a de rul; a gɛt man ɛn uman dɛn fɔ siŋ fɔ mi, ɛn bɔku switat, wetin mɔtalman lɛk.

⁹ Ɔl dat mek a tɔf pas ɔl udat bin de bifo mi na Jerusɛlɛm ɛn di sabi we a sabi bɔt di wɔl ɛn bɔt layf de na mi ed te naw.

¹⁰ Ɛnitin we a si ɛn want, a go mɔs gɛt am; a bin miks pan ɔlkayn ladida, a bin de ɛnjɔy ɔl wetin a de du, ɛn da ɛnjɔymɛnt de nain na bin mi yon bɛnifit.

¹¹ Dɔn a bigin tink bɔt ɔl wetin a bin dɔn du ɛn aw a wok traŋa wan fɔ du dɛn, bɔt oya, ɔl na fɔ natin. I tan lɛk we pɔsin de rɔnata briz; i nɔ de prɔfit pɔsin natin na dis wɔl.

¹² So a bigin tink bɔt wetin i min fɔ gɛt sɛns, fɔ kres ɛn fɔ fulish. Afta ɔl, wetin nyu kiŋ go du we di ol kiŋ nɔ du yet.

¹³ Na da tɛm de a si se fɔ gɛt sɛns bɛtɛ pas fɔ fulish; jɛs lɛk aw layt bɛtɛ fafawe pas daknɛs.

¹⁴ Pɔsin we gɛt sɛns no wetin i de du, bɔt fulman nɔ no. Bɔt a si se na di sem we dɛn ɔl de ɛnd.

¹⁵ A tɛl misɛf se, wetin de bi to di fulman go bi to misɛf, so wetin mek a gɛt ɔl dis sɛns? So a tɛl misɛf se dat sɛf na fɔ natin.

¹⁶ Dɛn de fɔgɛt bɔt di man we gɛt sɛns semweso lɛk di fulman. Dɛn nɔ de mɛmba dɛn sote go. Di man we gɛt sɛns de day jɛs lɛk di fulman!

¹⁷ So a gens wit layf, bikɔs man jɛs de yagba fɔ natin. Ɔl na fɔ natin. I tan lɛk we pɔsin de tray fɔ kech briz.

¹⁸ A kam si se a gɛt fɔ lɛf ɔl wetin a dɔn lebɔ fɔ, fɔ ɔda pɔsin ɛn dat mek mi at pwɛl;

¹⁹ ɛn yu no if i go bi sɛnsman ɔ fulman! Pan ɔl dat, i go kam bi masta fɔ ɔl wetin a dɔn swɛt ɛn yuz mi sɛns fɔ gɛt na dis wɔl. Ɔl na fɔ natin.

²⁰ So a chenj mi maynd ɛn mi at pwɛl we a tink bɔt di tiŋs dɛn we a dɔn wok fɔ na dis wɔl,

²¹ bikɔs sɔntɛm kin de we pɔsin we kin dɔn yuz in sɛns ɛn lebɔ dɔn na wɔl, kin gɛt fɔ lɛf ɔltin fɔ ɔda pɔsin we nɔ wok fɔ am, fɔ ɛnjɔy am. Dat sɛf na fɔ natin ɛn dat na bad bad tin.

²² Wetin pɔsin gɛt fɔ bɛnifit pan ɔl di yagba we i de pan na dis wɔl?

²³ Ɔl mɔtalman in layf na pen ɛn wɔri. Ivin na nɛt we i de slip, in at nɔ de rɛst. Dat sɛf na fɔ natin.

²⁴ Di bɛst tin fɔ mɔtalman fɔ du, na fɔ it drink ɛn ɛnjɔy wetin i dɔn wok fɔ. A biliv se na so PAPA GƆD want am fɔ bi.

²⁵ Nain nɔmɔ de mek mɔtalman it, drink ɛn ɛnjɔy insɛf.

²⁶ Udat de wok fɔ pliz PAPA GƆD, PAPA GƆD de gi am mɔ sɛns ɛn mek i gladi; bɔt fɔ sina, PAPA GƆD de mek i wok ɛn kip bɔku tinks ɛn mɔni so dat i go ɛp di wan we de pliz PAPA GƆD. Dis insɛf na fɔ natin, ɛn i tan lɛk we pɔsin de tray fɔ kech briz.