Ɛkliziastis 11 - Krio Fɔs Oli Baybul

Wetin Pɔsin We Gɛt Sɛns De Du

¹ Trowe bred na wata, bikɔs afta sɔm tɛm, yu go gɛt am bak.

² Put yu mɔni sɛvin ɔ et say, bikɔs yu nɔ no wetin go apin na wɔl bambay.

³ We di klawd dak, ren kin kam. Ɛnisay we tik fɔdɔm, na de i de lidɔm.

⁴ Ɛnibɔdi we na aw di briz de blo i de luk, nɔ go plant; if na di klawd nɔmɔ i de luk, i nɔ go pik wetin i plant.

⁵ Jɛs lɛk aw yu nɔ no aw pikin de gɛt layf insay in mama bɛlɛ, na so yu nɔ no aw PAPA GƆD, we mek ɔltin, de wok.

⁶ Na mɔnin, yu de plant yu sid, ivintɛm, yu stil de fɛn tin fɔ du; bikɔs yu nɔ no uswan go bɛnifit yu, di mɔnin yon ɔ di ivintɛm yon, ɔ sɔntɛnde, dɛn ɔltu.

⁷ Layt na swit tin, pɔsin de ɛnjɔy fɔ luk di san.

⁸ Pipul dɛn we gɛt lɔŋ layf fɔ ɛnjɔy dɛnsɛf ɔltɛm; bɔt lɛ dɛn mɛmba se di bita de dɛn go plɛnti. Ɔl dɛn tɛm dɛn de na fɔ natin.

Advays To Yɔŋ Pipul Dɛn

⁹ Ɛnjɔy yusɛf, yɔŋman, we yu yɔŋ, ɛn lɛ yu at mek yu gladi we yu yɔŋ. Du wetin yu at tɛl yu ɛn tek wetin yu si we yu lɛk, bɔt no se fɔ ɔl dɛn tin dɛn de, PAPA GƆD go jɔj yu.

¹⁰ Pul vɛksteshɔn kɔmɔt na yu at ɔltogɛda, lɛ yu nɔ go gɛt pen; bikɔs we pɔsin yɔŋ ɛn we i jɛs bigin layf, na fɔ natin.