Ɛkliziastis 10 - Krio Fɔs Oli Baybul

¹ Day flay de mek pafyum pul bad sɛnt; na semweso lili bigful kin pwɛl pɔsin in sɛns ɛn rɛspɛkt.

² Pɔsin we gɛt sɛns want fɔ du wetin rayt ɔltɛm, bɔt na bad nɔmɔ de na fulman at.

³ Ivin we fulman dɛn de waka na trit, bikɔs dɛn nɔ gɛt sɛns, dɛn kin mek ɔlman no se dɛn na fulman.

⁴ We kiŋ vɛks pan yu, nɔ vɛks rizayn, bikɔs di vɛks we yu nɔ vɛks bak go mek in at kol.

⁵ Wan ɔda bad tin de we a dɔn si na wɔl, we bad lɛk we kiŋ kin mek mistek:

⁶ na fulish pɔsin de gɛt gud pozishɔn, ɛn di wan dɛn we jɛntri de sidɔm na lo ples.

⁷ A dɔn si slev dɛn de rayd ɔs we kiŋ pikin dɛn de waka lɛk slev.

⁸ Ɛnibɔdi we dig ol, nainsɛf go fɔdɔm de, ɛn ɛnibɔdi we brok wɔl go insay, na snek go bɛt am.

⁹ Ɛnibɔdi we de brok ston, ston go mɔs wund am; ɛn ɛnibɔdi we de plit wud, wud go mɔs nak an wande.

¹⁰ If nɛf dɔn dɔl ɛn dɛn nɔ shap am, pɔsin gɛt fɔ pul trɛnk fɔ kɔt wit am; bɔt sɛns de mek pɔsin sɔksid.

¹¹ If snek bɛt pɔsin bifo di man we de kech snek, kech am, nid nɔ de fɔ gɛt pɔsin we de kech am.

¹² Sɛnsman kin bɛnifit fɔ tin we i tɔk bɔt na trɔbul nɔmɔ fulman kin gɛt.

¹³ We i opin in mɔt na soso nɔnsɛns ful de ɛn bay di tɛm we i de tɔk dɔn, na so so wikɛdnɛs yu go si;

¹⁴ pan ɔl dat fulman stil de tɔk bɔku. Nɔbɔdi nɔ no wetin gɛt fɔ bi ɛn nɔbɔdi nɔ go ebul tɔk wetin go apin bambay.

¹⁵ Fulman so de yagba dat i nɔba ebul insɛf ɛn dɛn nɔba sabi rod fɔ go na siti.

¹⁶ Na siriɔs alaki go mit da kɔntri we dɛn kiŋ na pikin, ɛn dɛn bigman dɛn de mek pati na mɔnin.

¹⁷ Una gɛt blɛsin, una we una kiŋ na aristo, ɛn una bigman dɛn sabi di tɛm fɔ mek pati ɛn kɔntrol dɛnsɛf mek dɛn nɔ drɔŋɔ.

¹⁸ Na lezinɛs kin pɔsin in os ruf bɛn go insay, ɛn slaknɛs kin mek di os lik.

¹⁹ Fɔ it na fɔ ɛnjɔy, wayn de mek yu at layt, ɛn mɔni de mek yu nɔ krach yu ed fɔ natin.

²⁰ Nɔ kɔs di kiŋ, ivin insay yu at, ɔ kɔs jɛntriman, i lɛk yu de na yu rum; bikɔs bɔd we de flay ɔp kin kɛr yu vɔys go, ɔ krichɔ we de flay, kin go se na so yu bin se.