Ɛkliziastis 1 - Krio Fɔs Oli Baybul

Layf Yuslɛs

¹ Na di tin dɛn dis we di Pricha, dat na Devid in bɔypikin we na kiŋ na Jerusɛlɛm se.

² Di Pricha se di natin we pas ɔl natin na wɔl! Di natin we pas ɔl natin na wɔl! Ɔl na fufafu.

³ Wetin mɔtalman gɛt fɔ prɔfit pan ɔl di yagba we i de yagba na layf?

⁴ Pipul de bɔn ɛn pipul de day, bɔt di wɔl in de sote go.

⁵ San de kam ɔp ɛn san de go dɔŋ, i de rɔn go bak usay i bin bigin.

⁶ Briz de blo go na di Sawt, dɔn i kin blo go rawnd to di Nɔth; di briz de go rawnd ɛn rawnd ɛn tɔn bak kam na di sem rod we i bin pas go.

⁷ Ɔl dɛn watasay de rɔn go na di si, bɔt di si nɔ de ful; Na usay di wata de go ɔltɛm, na de i de go ɔltɛm.

⁸ Ɔltin na wɔl kin mek yu fɛdɔp; mɔtalman mɔt nɔ ebul fɔ tɔk am; yay nɔ de taya fɔ si, ɛn yes nɔ de taya fɔ yɛri.

⁹ Wetin dɔn bi go stil de bi ɛn na wetin pipul dɛn bin dɔn du, pipul dɛn go stil de du; ɛn natin nɔ de na wɔl we de bi we nɔ wande bi yet.

¹⁰ Ɛnitin de we pɔsin go se, “luk, dis na nyu tin” i bin dɔn bi, di tɛm we yu nɔ bɔn yet.

¹¹ Wi nɔ go no wetin bin dɔn pas, semweso, dɛn wan we nɔ bɔn yet nɔ go no tin dɛn we de bi naw afta dɛn dɔn bi.

Di Ɛkspiriɛns We Di Pricha Dɔn Gɛt

¹² Mi we na di Pricha, we na bin kiŋ fɔ Izrɛl na Jerusɛlɛm,

¹³ bin tɛl misɛf se, a wan fɔ lan ɛn lan gud bɔt ɔl wetin de na wɔl; na wok we nɔ swit Papa PAPA GƆD dɔn put na mɔtalman ed so we de mek dɛn bizi.

¹⁴ A dɔn si ɔl wetin de bi na wɔl, bɔt usay, ɔltin na fɔ natin ɛn na lɛk fɔ rɔnata briz.

¹⁵ Wetin dɔn bɛn nɔ go tret igen, ɛn yu nɔ go ebul kɔnt wetin nɔ de.

¹⁶ A tɛl misɛf se, a gɛt sɛns pas ɔl udat dɔn ɛva bi kiŋ na Jerusɛlɛm ɛn a gɛt bɔku ɛkspiriɛns ɛn sɛns ɛn sabi pas dɛn.

¹⁷ A tray ɛn fɛnɔt wetin i min fɔ gɛt sɛns, fɔ kres ɛn fɔ fulish. A fɛnɔtt se ɔl dat sɛf na fɔ natin.

¹⁸ Bikɔs di mɔ sɛns yu gɛt, di mɔ yu at de wɔri, di mɔ yu no bɔt sɔntin, na di mɔ yu at de pwɛl.