Di Ibru Pipul Dɛn 8 - Krio Fɔs Oli Baybul

Jizɔs Dɔn Mek Sakrifays fɔ Wi Sin

¹ Di tin we wi de kam tɛl una so, impɔtant pas ɔl: Di edman we de mek sakrifays fɔ pipul sin, we wi gɛt, na Jizɔs we sidɔm na Gɔd we de rul wit pawa na ɛvin, in raytan.

² Fɔstɛm, dɛn ɔda man we bin de mek sakrifays fɔ pipul sin bin de du Gɔd in wok na bafa we mɔtalman bil, bɔt Jizɔs de wok na di ples we Gɔd de, na Gɔd bil da ples de, nɔto mɔtalman.

³ Ɔl dɛn edman we de mek sakrifays fɔ pipul sin, fɔ gi Gɔd wetin dɛn gɛt ɛn dɛn fɔ sakrifays animal to Gɔd. Semwe so, di edman we de mek sakrifays fɔ pipul sin, we wi gɛt, fɔ gɛt sɔntin we insɛf go gi Gɔd.

⁴ If Jizɔs bin de na dis wɔl te naw, i nɔ bin fɔ bi man we de mek sakrifays fɔ pipul sin atɔl, bikɔs dɛn man we de mek sakrifays fɔ pipul sin we de na dis wɔl de mek dɛn sakrifays ya lɛkɛ aw di Ju Lɔ se.

⁵ Di wok we dɛn bin de du bin jɛs tan lɛkɛ pikchɔ we de sho di wok we Jizɔs we na di edman we de mek sakrifays fɔ pipul sin, we wi gɛt, de du na ɛvin. Di Bafa na lɛkɛ pikchɔ we sho aw di ples, we Gɔd de, tan. Wɛn Mozis bin rɛdi fɔ bil di Bafa, dat na di ples we dɛn man we de mek sakrifays fɔ pipul sin bin de du dɛn wok, Gɔd tɛl am se, “Tek tɛm bil ɔltin jɛs lɛkɛ aw a bin sho yu wɛn yu bin de na Mawnt Saynay.”

⁶ So wi si se di wok we Jizɔs de du pas di wan we dɛn ɔda man we de mek sakrifays fɔ pipul sin de du. Semwe so, di agrimɛnt we Jizɔs mek bitwin Gɔd ɛn mɔtalman bɛtɛ pas di ol wan, bikɔs na Jizɔs in agrimɛnt mek Gɔd mek prɔmis to wi, we bɛtɛ pas di fɔs wan.

⁷ If di fɔs agrimɛnt bin du fɔ sev pipul, Gɔd nɔ bin fɔ mek ɔda agrimɛnt.

⁸ Bɔt Gɔd insɛf si se di pipul dɛn nɔ bin du wetin di fɔs agrimɛnt se, na dat mek i se, “Di tɛm de kam we a go mek ɔda agrimɛnt wit di pipul dɛn na Izrɛl ɛn di wan dɛn na Juda.

⁹ Dis nyu agrimɛnt ya nɔ go tan lɛkɛ di wan we a bin mek wit dɛn granpapa-papa dɛn, da tɛm we misɛf bin tek dɛn kɔmɔt na Ijipt. Dɛn bin pwɛl di agrimɛnt we a mek wit dɛn, so a bin lɛf dɛn to dɛnsɛf.

¹⁰ Wɛn di tɛm rich, na di agrimɛnt dis we a go mek wit di pipul dɛn na Izrɛl: A go mek dɛn no mi lɔ dɛn ɛn mek dɛn nɔ fɔgɛt dɛn. A go bi dɛn Gɔd, ɛn dɛn go bi mi pipul.

¹¹ Di pipul dɛn nɔ go gɛt fɔ lan dɛn kɔmpin ɔ dɛn brɔda igen se, ‘Una fɔ no Gɔd we na di Masta.’ Bikɔs dɛn ɔl, pikin ɛn bigman, go no mi.

¹² A go sɔri fɔ dɛn ɛn a go padin dɛn fɔ ɔl di sin we dɛn dɔn sin, a nɔ go mɛmba dɛn sin igen.”

¹³ Wɛn Gɔd tɔk bɔt nyu agrimɛnt, dat min se, di fɔs wan dɔn ol. Wi no se ɛnitin we dɔn ol, dɔn dɔn.