Di Ibru Pipul Dɛn 5 - Krio Fɔs Oli Baybul

¹ Ɛni edman we de mek sakrifays fɔ pipul sin, we na mɔtalman, fɔ tinap fɔ mɔtalman bifo Gɔd, so dat i kin mek sakrifays fɔ dɛn sin.

² Bikɔs insɛf na mɔtalman ɛn i kin du tin we nɔ rayt, i kin sɔri fɔ dɛn wan we nɔ du di rayt tin bikɔs dɛn nɔ no wetin rayt.

³ Na bikɔs insɛf na mɔtalman we kin du tin we nɔ rayt, mek i fɔ mek sakrifays fɔ in yon sin, jɛs lɛkɛ aw i de mek sakrifays fɔ di ɔda pipul dɛn sin.

⁴ Nɔbɔdi nɔ de mek insɛf edman we de mek sakrifays fɔ pipul sin, na Gɔd nɔmɔ de kɔl pɔsin fɔ du dis kayn wok lɛkɛ aw i bin pik Erɔn lɔntɛm fɔ du di sem kayn wok.

⁵ Semwe so, Krays nɔ put insɛf ɔp fɔ mek i bi edman we de mek sakrifays fɔ pipul sin, na Gɔd tɛl am se, “Yu na mi Pikin, a dɔn bi yu Papa tide.”

⁶ Ɛn Gɔd tɔk ɔda say se, “Yu na di wan we de mek sakrifays fɔ pipul sin sote go, yu go du di sem kayn wok we Mɛlkizidɛk insɛf bin du.”

⁷ Wɛn Jizɔs bin de na dis wɔl, i ala lawd ɛn kray wɛn i de pre to Gɔd we ebul sev am, mek i nɔ day. Gɔd yɛri di pre we Jizɔs bin pre bikɔs Jizɔs bin gri fɔ du ɔl wetin Gɔd want am fɔ du.

⁸ Bɔt ivin we Jizɔs na bin Gɔd in Pikin, di sɔfa we i sɔfa mek i no gud wan wetin i min fɔ du wetin Gɔd se.

⁹ Wɛn Jizɔs dɔn sho se in ebul du ɔltin, i kam bi di wan we de sev ɔl dɛn pipul we de du wetin i tɛl dɛn fɔ du, ɔltɛm.

¹⁰ Na dat mek Gɔd pik am fɔ bi edman we de mek sakrifays fɔ pipul sin, lɛkɛ Mɛlkizidɛk.

Mek Pipul Tek Tɛm

¹¹ Plɛnti tin stil de we wi want tɛl una bɔt wetin wi jɛs tɔk, bɔt dɛn tin ya traŋa fɔ ɛksplen to una, bikɔs una nɔ de ɔndastand kwik.

¹² I dɔn rich tɛm we unasɛf fɔ bigin lan ɔda pipul bikɔs i dɔn te we una de lan, bɔt pɔsin stil gɛt fɔ lan una di fɔs tin dɛn we una bin dɔn lan bɔt Gɔd in mɛsej. Una fɔ stil drink milk lɛkɛ pikin we de sɔk bɔbi, bikɔs una nɔ du yet fɔ it tin we fɔ cham lɛkɛ big pɔsin.

¹³ Ɛnibɔdi we stil de drink milk, na pikin stil, i nɔ no yet wetin gud ɛn wetin bad na Gɔd in yay.

¹⁴ Bɔt pɔsin we de it tin we fɔ cham, na big pɔsin; i dɔn no wetin gud ɛn wetin bad, bikɔs i dɔn lan aw fɔ no wetin gud ɛn bad bay dɛn tin we i de du we rayt na Gɔd in yay.