Di Ibru Pipul Dɛn 3 - Krio Fɔs Oli Baybul

Jizɔs Pas Mozis

¹ Mi Kristiɛn brɔda dɛn, Gɔd kɔl unasɛf fɔ bi in yon pipul. Na dat mek una fɔ mɛmba Jizɔs we Gɔd dɔn sɛn fɔ bi di edman we de mek sakrifays fɔ pipul sin, fɔseka wetin wi biliv.

² Na Gɔd pik Jizɔs fɔ du in wok, ɛn Jizɔs du ɔl wetin Gɔd bin want lɛkɛ aw i bin want mek i du am, lɛkɛ aw Mozis bin du wetin Gɔd bin want am fɔ du fɔ Gɔd in pipul dɛn.

³ I rayt fɔ mek pipul rɛspɛkt ɛn ɔna Jizɔs pas aw dɛn bin rɛspɛkt ɛn ɔna Mozis, lɛkɛ aw pɔsin de prez di wan we bil os, pas aw i de prez di os insɛf.

⁴ Na tru se, os nɔ de we nɔto pɔsin bil, bɔt na Gɔd mek ɔltin.

⁵ Mozis na bin wokman we put ɔl in at pan ɔl di wok we i bin de du na Gɔd in Os. I bin de tɛl pipul wetin Gɔd go se bambay.

⁶ Bɔt Krays na di Pikin we de luk Gɔd, we na di Papa, in Os, ɛn i bin du in wok lɛkɛ aw Gɔd want am fɔ du. Wi we na Gɔd yon pipul, go bi Gɔd in Os, if wi gɛt kɔrej ɔltɛm ɛn put wi at pan ɔl wetin Gɔd prɔmis se in go du fɔ wi.

Gɔd Go Mek In Pipul dɛn Blo

⁷ Na dat mek wi fɔ lisin Gɔd in Spirit we de tɛl wi se, “If una yɛri Gɔd in vɔys tide,

⁸ una lisin am, una nɔ traŋayes lɛkɛ aw una pipul dɛn bin traŋayes lɔntɛm, wɛn Gɔd bin tray dɛn na di dɛzat, dɛn nɔ bin gri mek Gɔd rul dɛn.

⁹ Gɔd se, Lɔntɛm, wɛn una granpapa-papa dɛn bin de na di dɛzat, dɛn bin de kɔmplen ɛn tray mi plɛnti tɛm fɔ si aw lɔŋ a go bia wit dɛn, pan ɔl we dɛn si wetin a bin du wɛn dɛn bin de fɔti ia na di dɛzat.

¹⁰ Na dat mek a bin vɛks pan dɛn, ɛn a se, ‘Dɛn dɔn pul dɛn at kɔmɔt pan mi, ɛn dɛn nɔ ɔndastand di we we a de du ɔltin.’

¹¹ A bin vɛks pan dɛn, so a tek oth se, ‘Dɛn nɔ go kam da say we a de, dɛn nɔ go sidɔm blo!’”

¹² Mi Kristiɛn brɔda dɛn, una fɔ tek tɛm, so dat nɔn pan una nɔ go gɛt bad at ɛn so nɔ biliv pan Gɔd dat i go tɔn in bak pan Gɔd we gɛt layf sote go.

¹³ Bɔt una fɔ de kɔrej una kɔmpin dɛn ɔltɛm, so dat sin nɔ go mek ɛni wan pan una ful ɛn mek una traŋayes. Na dat una fɔ de du ɛvri de, wans nɔmɔ “Tide” na tide.

¹⁴ Una fɔ mɛmba se, if wi put wi at pan ɔl wetin Gɔd tɛl wi se in go du lɛkɛ aw wi bin de du di tɛm we wi jɛs bi Kristiɛn, ɛn wi nɔ tap fɔ du dat, wi go gɛt pan ɔl wetin Krays gɛt.

¹⁵ Dɛn rayt na Gɔd in Buk se, “If una yɛri Gɔd in vɔys tide, una nɔ traŋayes, lɛkɛ aw una granpapa-papa dɛn bin traŋayes lɔntɛm, we dɛn nɔ bin gri mek Gɔd rul dɛn.”

¹⁶ Udat na di pipul dɛn we bin yɛri Gɔd in vɔys, bɔt dɛn nɔ bin gri fɔ mek i rul dɛn? Na ɔl dɛn pipul we na bin slev na Ijipt, we Mozis bin fri.

¹⁷ Udat na di pipul dɛn we Gɔd bin vɛks pan fɔ fɔti ia? Gɔd bin vɛks pan dɛn pipul we bin sin ɛn dɛn bin day na di dɛzat.

¹⁸ Udat na di pipul dɛn we Gɔd bin prɔmis se, nɔ go go na di ples we i de ɛn dɛn nɔ go sidɔm blo? Gɔd bin de tɔk bɔt dɛn pipul we nɔ bin du wetin i tɛl dɛn fɔ du.

¹⁹ So, wi si se, dɛn nɔ bin ebul go na di ples we Gɔd de, bikɔs dɛn nɔ bin biliv am.