Di Ibru Pipul Dɛn 2 - Krio Fɔs Oli Baybul

Di Sev we Wi Go Sev na Wɔndaful Tin

¹ Na dat mek, wi fɔ put ɔl wi at pan di tru wɔd we dɛn dɔn tɛl wi, so dat wi nɔ go kɔmɔt na di rayt rod.

² Wi no se, di mɛsej we di enjɛl dɛn bin briŋ fɔ wi na tru. Ɛnibɔdi we bin jomp dɛn wɔd, ɛn we bin du wetin di enjɛl dɛn nɔ tɛl am fɔ du, Gɔd pɔnish da pɔsin de di rayt we.

³ Wetin mek wi fil se, wi go pul wi ed pan di pɔnish we Gɔd go pɔnish mɔtalman, if wi nɔ gri fɔ dis wɔndaful we we Gɔd de sev wi? Na Jizɔs we na di Masta, fɔs tɛl wi bɔt di wɔndaful we we Gɔd go sev wi, dɔn dɛn pipul we yɛri am, dɛnsɛf pruv to wi se na tru.

⁴ Gɔd insɛf pruv se in mɛsej bɔt di wɔndaful we we i go sev pipul, na tru, bay di wɔndaful tin we i du we sho wetin gɛt fɔ bi bambay; we i du ɔl kayn big wok we mek pipul wɔnda; ɛn we i mek in Spirit gi pipul dɛn pawa fɔ du difrɛn difrɛn tin lɛkɛ aw in want.

Jizɔs Sho Pipul di We we Go Sev dɛn

⁵ Gɔd nɔ bin pik enjɛl dɛn fɔ rul na di nɛks wɔl, we wi de tɔk bɔt.

⁶ Bɔt dɛn rayt wan say nain Buk se, “Gɔd, udat na mɔtalman we mek yu fɔ tink bɔt am? Mɔtalman nɔto ɛnitin, so wi wɔnda wetin mek yu kam na wɔl fɔ ɛp am?

⁷ Yu mek enjɛl pas mɔtalman fɔ shɔt tɛm, dɛn yu gi mɔtalman pawa ɛn ɔna.

⁸ Semwe so, yu mek mɔtalman fɔ rul ɔltin.” Wɛn dɛn rayt na Gɔd in Buk se “Gɔd mek mɔtalman fɔ rul ɔltin,” dat min se, natin nɔ de we mɔtalman nɔ go rul. Wi nɔ si we mɔtalman de rul ɔltin yet.

⁹ Bɔt wi no se Jizɔs de rul ɔltin. Fɔstɛm, Gɔd bin mek di enjɛl dɛn pas Jizɔs fɔ shɔt tɛm, so di lɛk we Gɔd lɛk mɔtalman ɛn di sɔri we i sɔri fɔ am, mek i mek Jizɔs sɔfa ɛn day fɔseka mɔtalman. Bikɔs Jizɔs sɔfa ɛn day, dat mek Gɔd gi am pawa, ɔna ɛn rɛspɛkt.

¹⁰ Bikɔs na Gɔd mek ɔltin ɛn nain de kip ɔltin, i rayt we i mek Jizɔs sɔfa aw i sɔfa fɔ dɔn di wok we i kam fɔ du, so dat plɛnti pipul go bi Gɔd in pikin dɛn, ɛn go na ɛvin. Na Krays de lid dɛn pipul de so dat i go sev dɛn.

¹¹ Na Jizɔs we de mek sin nɔ gɛt pawa oba pipul, ɛn ɔl dɛn pipul we i dɔn pul ɔnda sin in pawa, gɛt wan Papa. Na dat mek Jizɔs gladi fɔ kɔl dɛn in brɔda dɛn.

¹² Jizɔs se, “Gɔd, a go tɛl mi brɔda dɛn bɔt yu; a go tinap di say we yu pipul dɛn gɛda fɔ prez yu.”

¹³ I tɔk igen se, “Na Gɔd a put ɔl mi at pan.” I tɔk ɔda say se, “A de ya wit ɔl di pikin dɛn we Gɔd dɔn gi mi.”

¹⁴ We dɛn pikin ya na mɔtalman, na dat mek Jizɔs insɛf kam na wɔl lɛkɛ mɔtalman, so dat di day we i day go pwɛl Setan, we gɛt pawa fɔ kil, ɔltogɛda.

¹⁵ So, i go sev ɔl dɛn pipul we bin de lɛkɛ slev ɔnda Setan ɔl di tɛm we dɛn liv, bikɔs dɛn bin de fred fɔ day.

¹⁶ I plen naw se, nɔto di enjɛl dɛn i bin kam fɔ ɛp, na Ebraam in grampikin pikin dɛm.

¹⁷ Na dat mek, i bin tan lɛkɛ aw in brɔda dɛn tan pan ɔltin, so dat i go sɔri fɔ dɛn ɛn wok fɔ Gɔd wit ɔl in at, lɛkɛ di edman we de mek sakrifays fɔ pipul sin, we i bi, so dat i go padin ɔl Gɔd in pipul dɛn sin.

¹⁸ Na bikɔs Setan bin dɔn tray Jizɔs ɛn Jizɔs bin dɔn sɔfa, mek i ebul ɛp dɛn pipul we Setan de tray.