Ditarɔnɔmi 9 - Krio Fɔs Oli Baybul

Di Izrɛlayt Dɛn Traŋayes

¹ Mozis tɛl di Izrɛlayt dɛn se, da de de, dɛn go krɔs Riva Jɔdan go oba say fɔ go kapchɔ di land; di pipul dɛn we de de plɛnti ɛn ebul fɛt pas Izrɛl. Dɛm siti dɛn big big ɛn dɛn wɔl dɛn ay ay te dɛn wan rich na di skay.

² Pipul dɛn kin tɔk se nɔbɔdi nɔ go ebul fɛt dɛn bikɔs dɛn na pipul dɛn we ay ay ɛn traŋa; dɛn na jayant dɛn.

³ Mozis tɛl dɛn se PAPA GƆD we na dɛn PAPA GƆD go go atak dɛn lɛkɛ we big big faya we gɛt pɛtrol de kech, ɛn bifo dɛn de rich de i go dɔn bit di ɛnimi dɛn dɔn jɛs lɛk aw i bin dɔn prɔmis se in go de du, so di Izrɛlayt dɛn go jɛs drɛb di ɛnimi dɛn kɔmɔt de ɛn kil dɛn.

⁴ I tɛl dɛn se lɛ dɛn nɔ fil se na gud we dɛn gud mek PAPA GƆD de pul dɛn pipul de kɔmɔt na di land gi dɛn; i se na bikɔs di pipul dɛn na bad bad pipul dɛn.

⁵ I se nɔto bikɔs di Izrɛlayt na gud pipul dɛn ɔ dɛn de du ɔl gud tin de mek PAPA GƆD gi dɛn di land. I se PAPA GƆD de drɛb dɛn pipul dɛn de bikɔs dɛn na bad bad pipul dɛn ɛn i wan kip di prɔmis we i bin dɔn mek to Ebraam, Ayzak ɛn Jekɔb, di Izrɛlayt dɛn fɔstɛm-papa dɛn.

⁶ Mozis tɛl dɛn se PAPA GƆD we na dɛn PAPA GƆD nɔ de gi dɛn di land bikɔs dɛn de waka tret; dɛn nɔ gud; dɛn na pipul dɛn we traŋayes.

⁷ I mɛmba dɛn we dɛn bin mek PAPA GƆD we na dɛn PAPA GƆD vɛks, we dɛn bin de na da ɛmti ples we pɔsin nɔ go ebul tap. I se frɔm we dɛn kɔmɔt Ijipt te dɛn rich usay dɛn bin dɔn rich so, dɛn nɔ bin de du wetin PAPA GƆD bin de tɛl dɛn fɔ du atɔl.

⁸ Na so dɛn bin mek PAPA GƆD vɛks pan dɛn we dɛn bin de na Mawnt Saynay, te PAPA GƆD niali wan dɔnawe wit dɛn ɔl.

⁹ Mozis se we in bin go ɔp di mawnten fɔ go tek di tablɛt dɛn we PAPA GƆD bin dɔn rayt ɔl wetin dɛn fɔ de du, ɛn nɔ fɔ de du fɔseka di Kɔvinant we dɛn bin mek wit am, in bin de de fɔ fɔti de ɛn i nɔ it natin; wata sɛf a i nɔ drink.

¹⁰ I se PAPA GƆD bin gi am tu ston tablɛt we in sɛf sɛf rayt ɔl wetin i tɛl dɛn se dɛn fɔ de du ɛn nɔ fɔ du, da tɛm we i bin tɔk insay da faya na di mawnten.

¹¹ Afta di de we mek Mozis fɔti de ɛn fɔti nɛt, PAPA GƆD bin gi am tu ston tablɛt, dat na di tablɛt dɛn we i rayt ɔl wetin dɛn fɔ du ɛn nɔ fɔ du.

¹² We PAPA GƆD bin gi am di tablɛt dɛn, i tɛl am se lɛ i grap go wantɛm, lɛ i go si di sin we di Izrɛlayt dɛn we i bin dɔn stren pul kɔmɔt slevri na Ijipt dɔn kɔmit; dɛn lɛf fɔ du ɔl wetin PAPA GƆD bin tɛl dɛn fɔ de du, dɛn grap go mek lay lay gɔd wit ayɛn de wɔship.

¹³ Mozis se PAPA GƆD bin tɔk se i bin dɔn de wach di Izrɛlayt dɛn, ɛn dɔn fɛnɔt awt se dɛn na pipul we traŋayes.

¹⁴ PAPA GƆD se i want lɛ Mozis lɛf am mek i dɔnawe wit dɛn ɛn nɔbɔdi nɔ go lɛf we dɛn go tek mɛmba dɛn, ɛn in go mek ɔda pipul dɛn fɔ Mozis we go kɔmɔt na Mozis in layn, we go plɛnti ɛn gɛt pawa pas di Izrɛlayt dɛn.

¹⁵ Mozis se in jɛs tek tɛm tek di tu tablɛt, ol dɛn nain tu an, tɔn saful ɛn go dɔŋ di mawnten we bin stil de kech.

¹⁶ I se we in luk, in si se dɛn bin dɔn kɔmit sin, ɛn dɛn bin dɔn tɔn pan PAPA GƆD we na dɛn PAPA GƆD kwik kwik wan ɛn go mek kaw pikin wit ayɛn de wɔship.

¹⁷ I se in bin es di ston tablɛt dɛn ɔp ɛn wap dɛn na grɔn ɛn brok dɛn we dɛn ɔl si koro koro wan.

¹⁸ Mozis se nain in lidɔm bak flat wan na grɔn ɛn pre to PAPA GƆD fɔ ɔda fɔti de ɛn fɔti nɛt, fɔ ɔl di sin dɛn we di Izrɛlayt dɛn bin dɔn kɔmit we mek PAPA GƆD vɛks bad bad wan. Ɔl datɛnde, Mozis nɔ it natin.

¹⁹ Mozis se di kayn vɛks we PAPA GƆD bin dɔn vɛks pan di Izrɛlayt dɛn bin mek in fred se i go dɔnawe wit dɛn ɔl wantɛm, bɔt i se PAPA GƆD bin lisin to am ɛn fɔgiv dɛn.

²⁰ I mɛmba dɛn igen se PAPA GƆD bin dɔn vɛks pan Erɔn ɛn bin wan kil insɛf, bɔt in Mozis bin pre fɔ am.

²¹ Na da tɛm de Mozis bin tek di kaw pikin we di Izrɛlayt dɛn bin mek wit ayɛn, we na bin sin, ɛn trowe am insay faya, brok am pis pis ɛn gren am te i tɔn dɔst. I trowe am na di wata we de rɔn kam dɔŋ di mawnten.

²² I se na so dɛn bin du igen na Tabɛra, Masa ɛn na Kibroth Atava; dɛn bin du bad tin dɛn we bin mek PAPA GƆD vɛks.

²³ I mɛmba dɛn se dɛn bin du di sem tin igen na Kedɛsh Banɛa; we PAPA GƆD bin se lɛ dɛn pak dɛn tiŋs dɛn ɛn go kapchɔ di land we i bin dɔn gi dɛn. Dɛn nɔ bin gri du am bikɔs dɛn nɔ bin biliv PAPA GƆD we na dɛn PAPA GƆD atɔl.

²⁴ I se we in tink gud, di Izrɛlayt dɛn nɔ bin de yɛri PAPA GƆD in wɔd frɔm di de we in no dɛn.

²⁵ Na ɔl dat mek i pre to PAPA GƆD fɔ fɔti de ɛn fɔti nɛt beg am fɔ dɛn, bikɔs PAPA GƆD bin dɔn tɔk se in go dɔnawe wit dɛn.

²⁶ We i bin de pre to PAPA GƆD, i pre se lɛ PAPA GƆD nɔ dɔnawe wit di Izrɛlayt dɛn we nain yon pipul we i bin pul kɔmɔt slevri na Ijipt wit in pawa.

²⁷ I se if PAPA GƆD vɛks te, du ya lɛ i mɛmba Ebraam, Ayzak ɛn Jekɔb we bin dɔn waka tret wit am, ɛn lɛ i nɔ luk dɛn pipul de dɛn traŋayes, dɛn bad we dɛn de du ɛn di sin dɛn we dɛn dɔn kɔmit.

²⁸ Ɔ nɔ so, di pipul dɛn na Ijipt go tɔk se PAPA GƆD nɔ ebul pul di pipul dɛn we de na di land fɔ gi di Izrɛlayt dɛn, ɔ na bikɔs i et dɛn ɛn wan kil dɛn mek i kɛr dɛn go na di ples we pɔsin nɔ go ebul tap.

²⁹ I tɛl PAPA GƆD se di Izrɛlayt dɛn na PAPA GƆD in yon pipul dɛn ɛn i bin dɔn du plɛnti wɔndaful tin dɛn wit in pawa fɔ dɛn sek, we i bin pul dɛn kɔmɔt slevri na Ijipt.