Ditarɔnɔmi 8 - Krio Fɔs Oli Baybul

Izrɛl De Go Kapchɔ Di Gud Land

¹ Mozis tɛl di Izrɛlayt dɛn se if dɛn wan lɛ PAPA GƆD gi dɛn di land we i bin prɔmis dɛn fɔstɛm-papa dɛn se i go gi dɛn, ɛn dɛn go wande de, bɔn bɔku pikin ɛn gɛt lɔŋ layf, dɛn fɔ tek di lɔ dɛn siriɔs wan ɛn du ɔl wetin PAPA GƆD se.

² I se dɛn nɔ fɔ fɔgɛt ɔl usay PAPA GƆD we na dɛn PAPA GƆD dɔn waka wit dɛn na di ɛmti ples we pɔsin nɔ go ebul tap, fɔ fɔti ia, jɛs fɔ brok dɛn fɛda dɔŋ lilibit, fɔ fɛnɔt wetin de insay dɛn at, ɛn fɔ no if dɛn go du ɔl wetin i se.

³ I molɛs dɛn ɛn mek aŋri kech dɛn dɔn i gi dɛn mana fɔ it; tin we dɛn ɛn dɛn fɔstɛmpapa dɛn nɔ no wande. Ɔl dat na fɔ mek dɛn no se, nɔto it nɔmɔ de gi mɔtalman layf; ɔltin sɛf we PAPA GƆD se, de gi pɔsin layf.

⁴ Ɔl da fɔti ia de we dɛn bin de waka na di ɛmti ples we pɔsin nɔ go ebul tap, dɛn klos nɔ chɛr chɛr ɛn dɛn fut nɔ swɛl.

⁵ Dat fɔ mek dɛn no se lɛk aw mɔtalman de tren in pikin, na so PAPA GƆD we na dɛn PAPA GƆD bin de tren dɛn,

⁶ mek dɛn go du ɔl wetin PAPA GƆD we na dɛn PAPA GƆD se dɛn fɔ de du, ɛn rɛspɛkt am.

⁷ Bikɔs PAPA GƆD we na dɛn PAPA GƆD bin de kam kɛr dɛn go na di gud land we ɔlkayn watasay de; wata we de kɔmɔt ɔp ston, di wan we de kɔmɔt ɔnda grɔn ɛn di wan dɛn we de kɔmɔt ɔp dɛn il de rɔn na dɛn vali,

⁸ land we gɛt sɔm plant dɛn we fiba rɛs we dɛn kɔl Wit ɛn Bali, swit swit frut dɛn lɛkɛ pomigranet, ɛn na land we gɛt ɔni.

⁹ Land we it de beberebe wan, usay pɔsin nɔ go krach ed fɔ natin, we di ston dɛn na ayɛn, ɛn kɔpa de na di il dɛn.

¹⁰ Mozis wɔn dɛn nɔ fɔ fɔgɛt fɔ blɛs PAPA GƆD we na dɛn PAPA GƆD fɔ di gud land, we dɛn go dɔn bɛlful.

¹¹ I se mek dɛn mek shɔ se dɛn obe ɔl di lɔ dɛn ɛn du ɔl wetin PAPA GƆD we na dɛn PAPA GƆD se dɛn fɔ du ɛn mek shɔ se dɛn nɔ fɔgɛt am.

¹² I se lɛ i nɔ go kam bi se we dɛn de gɛt ɛnitin we dɛn want fɔ it ɛn de na fayn os,

¹³ gɛt nɔf kaw, got ɛn ship, mɔni ɛn bɔku bɔku pikin dɛn,

¹⁴ dɛn kam prawd ɛn fɔgɛt bɔt PAPA GƆD we na dɛn PAPA GƆD we pul dɛn kɔmɔt pan slevri na Ijipt.

¹⁵ Di GƆD we pul wata kɔmɔt na ston mek dɛn drink we dɛn bin de waka na di ɛmti ples we pɔsin nɔ go ebul tap, we na soso snek ɛn skɔpiɔn de de.

¹⁶ Di GƆD we gi dɛn mana fɔ it, we dɛn fɔstɛm-papa dɛnsɛf nɔ bin no, na di ɛmti ples we pɔsin nɔ go ebul tap, jɛs fɔ no if dɛn go du ɔl wetin i se ɔltɛm, so dat i go du gud tin fɔ dɛn afta dat.

¹⁷ Mozis wɔn dɛn lɛ dɛn nɔ kak dɛn fɛda se na bay dɛn yon swɛt dɛn bin tek gɛntri.

¹⁸ I se dɛn fɔ mɛmba se na PAPA GƆD we na dɛn GƆD mek dɛn ebul gɛt ɔl wetin dɛn gɛt, so dɛn go no se i nɔ fɔgɛt di swɛ we i bin swɛ to dɛn fɔstɛm-papa dɛn, te di tɛm we dɛn bin de rayt dis buk.

¹⁹ I tɛl dɛn se if dɛn fɔgɛt bɔt PAPA GƆD we na dɛn PAPA GƆD, ɛn wɔship ɛni ɔda gɔd, dɛn ɔl go day.

²⁰ Lɛkɛ aw dɛn bin si PAPA GƆD kil dɛn ɔda neshɔn dɛn fɔseka dɛn, na so i go mek dɛnsɛf day biks dɛn nɔ obe PAPA GƆD we na dɛn PAPA GƆD, in lɔ dɛn.