Ditarɔnɔmi 7 - Krio Fɔs Oli Baybul

PAPA GƆD Yon Pipul Dɛm

¹ Mozis bin tɛl di Izrɛlayt dɛn se we PAPA GƆD we na dɛn PAPA GƆD go dɔn ɛp dɛn kapchɔ di land ɛn pul di pipul dɛn kɔmɔt we na di Itayt dɛn, di Gigashayt dɛn, di Amɔrayt, di Kenanayt, di Pɛrizayt, di Ivayt dɛn ɛn di Jɛbyusayt dɛn we dɛn plɛnti ɛn ebul fɛt pas dɛn,

² we PAPA GƆD we na dɛn PAPA GƆD go mek dɛn kɔnka di pipul dɛn na di land, dɛn fɔ kil dɛn ɔl ɛn nɔ luk biɛn. I se dɛn nɔ mek nɔn Kɔvinant wit dɛn.

³ Mozis wɔn di Izrɛlayt dɛn nɔ fɔ mared dɛn pipul dɛn de dɛn gyal pikin dɛn, ɛn nɔ fɔ gri lɛ dɛn mared Izrɛl gyal pikin.

⁴ I se if dɛn mistek mared dɛn, dɛn gyal pikin dɛn we go dɔn bi Izrɛl dɛn bɔypikin dɛn wɛf dɛn, go pul di Izrɛl bɔypikin dɛn at kɔmɔt to PAPA GƆD ɛn kɛr dɛn go wɔship ɔda gɔd dɛn, ɛn dat go mek PAPA GƆD vɛks bad bad wan pan Izrɛl ɛn nɔ go westɛm fɔ kil dɛn ɔl.

⁵ So i tɛl di Izrɛlayt dɛn se we dɛn dɔn kapchɔ ɛni land, dɛn fɔ pwɛl ɔl usay dɛn de mek dɛn sakrifays dɛn nyakanyaka dɛn pila dɛn dɛn yon, ɛn fɔ brok dɛn Ashɛra, kpatakpata, ɛn bɔn ɔl dɛn imej dɛn.

⁶ I tɛl dɛn se dɛn na PAPA GƆD in pipul dɛn, ɛn se pan ɔl di ɔda pipul dɛn na di wɔl na dɛn nɔmɔ PAPA GƆD pik fɔ bi in spɛshal pipul dɛn.

⁷ I tɛl dɛn se nɔto bikɔs dɛn plɛnti pas di ɔda pipul dɛn mek PAPA GƆD bin pik dɛn. I se we yu luk sɛf, na dɛn bin smɔl pas ɔl di ɔda neshɔn dɛn na di wanol wɔl.

⁸ Bɔt PAPA GƆD lɛk dɛn ɛn de kip in prɔmis we i bin dɔn prɔmis dɛn fɔstɛm-papa dɛn se i go pul dɛn kɔmɔt slevri na Ijipt dɛn kiŋ in an, ɛn dɛn go bi in yon pipul dɛn sote go.

⁹ I tɛl dɛn se lɛ dɛn nɔ fɔgɛt se PAPA GƆD we na dɛn PAPA GƆD na di tru tru PAPA GƆD; di PAPA GƆD we wɛn i se sɔntin, i min am. I se if dɛn lɛk PAPA GƆD ɛn du ɔl wetin i se, i go lɛk dɛn sote go bikɔs PAPA GƆD nɔ de chenj.

¹⁰ Bɔt Mozis wɔn dɛn se PAPA GƆD nɔ de sɔri fɔ pipul dɛn we nɔ de gri yɛri in wɔd; I kin pɔnish dɛn bad bad wan.

¹¹ So Mozis advays dɛn fɔ tek tɛm du ɔl wetin i dɔn tich dɛn so dɛn nɔ go mistek pan di lɔ dɛn we i bin dɔn rid to dɛn.

Blɛsin Fɔ Udat De Obe

¹² Mozis tɛl di Izrɛlayt dɛn se if dɛn kɔntinyu fɔ yɛri wɔd ɛn de du ɔl wetin PAPA GƆD we na dɛn PAPA GƆD se, PAPA GƆD nɔ go fɔgɛt di Kɔvinant ɛn di lɛk we i bin dɔn swɛ to dɛn fɔstɛm-papa dɛn se, i go lɛk dɛn.

¹³ I se PAPA GƆD go lɛk dɛn, i go blɛs dɛn ɛn go mek dɛn bɔn bɔku bɔku pikin dɛn ɛn i go gi dɛn plɛnti plɛnti tin fɔ it, ɛn ɔda tin dɛn lɛk sid plant, wayn ɛn ɔliv ɔyl. As fɔ dɛn ship got ɛn kaw dɛn, dɛn go jɛs de bɔn bɔku bɔku wan.

¹⁴ Mozis se dɛn layf go bɛtɛ pas ɔl ɔda neshɔn dɛn na di wɔl, ɛn okobo ɛn uman we nɔ de bɔn, nɔ go de pan dɛn ɔ dɛn animal dɛn.

¹⁵ I tɛl dɛn se PAPA GƆD nɔ go mek ɛni siknɛs mit dɛn; nɔn pan di bad bad siknɛs dɛn we dɛn bin no na Ijipt nɔ go mit dɛn, bɔt na dɛn ɛnimi dɛn i go put dɛn pan.

¹⁶ I mɛmba dɛn se dɛn fɔ kil ɔl di pipul dɛn we PAPA GƆD we na dɛn PAPA GƆD se dɛn fɔ kil ɛn dɛn nɔ fɔ sɔri fɔ dɛn atɔl; dɛn nɔ fɔ wɔship dɛn pipul de dɛn gɔd bikɔs na trɔbul dɛn go jɛs tot fɔ dɛnsɛf.

¹⁷ Mozis se lɛ dɛn at nɔ tɛl dɛn se bikɔs di ɔda neshɔn dɛn plɛnti pas dɛn, di ɔda neshɔn dɛn go ebul bit dɛn.

¹⁸ Dɛm at dɛn nɔ fɔ kɔt sɛf; dɛn nɔ fɔ fɔgɛt wetin PAPA GƆD we na dɛn PAPA GƆD bin du wanol Ijipt ɛn dɛn kiŋ;

¹⁹ di bad bad sɔfa we Ijipt dɛn bin sɔfa we dɛn di Izrɛlayt dɛnsɛf bin si wit dɛn yay, we PAPA GƆD we na dɛn PAPA GƆD bin du dɛn tin dɛn we kin mek pipul dɛn fred ɛn rɛspɛkt am, we na dat i bin tek pul dɛn de; i se na semweso PAPA GƆD we na dɛn PAPA GƆD go du ɔl dɛn neshɔn dɛn we di Izrɛlayt dɛn de fred.

²⁰ Pantap dat, PAPA GƆD we na dɛn PAPA GƆD go mek dɛn ɛnimi dɛn at kɔt te, di wan dɛnsɛf we ayd we dɛn go dɔn kil di ɔda wan dɛn, go fred ɛn kɔmɔt usay dɛn ayd mek dɛn kil dɛn.

²¹ So dɛn nɔ fɔ fred nɔbɔdi bikɔs PAPA GƆD we na dɛn PAPA GƆD, na di PAPA GƆD we gɛt pawa pas ɔl ɔda gɔd dɛn ɛn i de wit dɛn ɔltɛm.

²² PAPA GƆD we na dɛn PAPA GƆD go de klia dɛn ɛnimi dɛn smɔl smɔl, bikɔs, if i kil dɛn ɔl wantɛm wantɛm, dɛn wayl animal dɛn go kam plɛnti pas di Izrɛlayt dɛn, ɛn dat go mek dɛn de atak ɛn kil dɛn.

²³ PAPA GƆD we na dɛn PAPA GƆD go mek dɛn ɛnimi dɛn kɔnfyus sote dɛn ebul kil dɛn ɔl.

²⁴ Mozis se dɛn go kil ɔl dɛn kiŋ dɛn ɛn nɔbɔdi nɔ go lɛf we dɛn go tek mɛmba dɛn. Dɛn nɔn nɔ go tinap fɔ fɛt di Izrɛlayt dɛn te dɛn kil dɛn ɔl dɔn.

²⁵ Di Izrɛlayt dɛn fɔ bɔn ɔl dɛn ɛnimi dɛn lay lay gɔd we dɛn de wɔship, ɛn dɛn nɔ fɔ tek dɛn silva ɛn dɛn gold we de pan di lay lay gɔd dɛn, lɛ dɛn nɔ go gɛt trɔbul, bikɔs na tin dat we PAPA GƆD et, ɛn dat kin mek i vɛks bad bad wan.

²⁶ Mozis advays dɛn nɔ fɔ kɛr dɛn tin dɛn de go na dɛn os dɛn lɛ dɛn nɔ go gɛt di swɛ we dɛn tin dɛn de bin dɔn gɛt. I se dɛn fɔ et dɛn tin dɛn de bikɔs swɛ de pan.