Ditarɔnɔmi 6 - Krio Fɔs Oli Baybul

Di Kɔmandmɛnt We Pas Ɔl

¹ Mozis tɛl di Izrɛlayt dɛn se PAPA GƆD we na dɛn PAPA GƆD tɛl am fɔ tich dɛn di lɔ dɛn, mek dɛn go ebul du ɔl wetin i want dɛn fɔ de du we dɛn go go na di land we dɛn de go kapchɔ;

² so dat dɛn ɛn dɛn pikin dɛn go rɛspɛkt PAPA GƆD we na dɛn PAPA GƆD ɛn du ɔl wetin i want dɛn fɔ de du, di we we i go want dɛn fɔ du dɛn, te dɛn day. Dat go mek dɛn gɛt lɔŋ layf.

³ Mozis koks di Izrɛlayt dɛn fɔ obe di lɔ dɛn so dat dɛn go gɛt blɛsin jɛs lɛkɛ aw PAPA GƆD we na dɛn fɔstɛm-papa dɛn PAPA GƆD bin dɔn se, ɛn dɛn go bɔn bɔku bɔku pikin dɛn na di land we gud fɔ animal ɛn fɔ plant.

⁴ Mozis ɛksplen tɛl dɛn se na PAPA GƆD waŋren na dɛn GƆD

⁵ dɛn fɔ lɛk PAPA GƆD wit ɔl dɛn at, wit ɔl dɛn sol ɛn wit ɔl dɛn trɛnk.

⁶ Dɛn fɔ mek shɔ se dɛn nɔ fɔgɛt di lɔ dɛn; dɛn fɔ kram dɛn.

⁷ Mozis se dɛn fɔ mek shɔ se dɛn tich dɛn pikin dɛn di lɔ dɛn gud gud wan so dat dɛn go ebul rid dɛn we dɛn de na os, na trit, we dɛn de wok ɛn we dɛn de blo.

⁸ I se dɛn fɔ rayt dɛn ɛn tay am na dɛn ed ɛn dɛn an, so dat dɛn nɔ go fɔgɛt dɛn.

⁹ I se dɛn fɔ rayt dɛn na ɔl dɛn domɔt dɛn ɛn di get dɛn fɔ go insay dɛn siti dɛn.

Mozis Wɔn Izrɛl Nɔ Fɔ Disobe PAPA GƆD

¹⁰ Mozis tɛl di Izrɛlayt dɛn se we PAPA GƆD we na dɛn PAPA GƆD go dɔn kɛr dɛn go na di land we i bin dɔn swɛ to dɛn fɔstɛm-papa dɛn, Ebraam, Ayzak ɛn Jekɔb se i go gi dɛn, wit big big ɛn fayn fayn siti dɛn we nɔto dɛn bin bil.

¹¹ Os dɛn wit fayn fayn tin dɛn de we nɔto dɛn put de, dam dɛn we nɔto dɛn mek, greps ɛn ɔliv planteshɔn dɛn we nɔto dɛn plant. I se we dɛn go dɔn it ɛn dɔn bɛlful,

¹² lɛ dɛn tek tɛm lɛ dɛn nɔ go fɔgɛt bɔt PAPA GƆD we pul dɛn kɔmɔt pan slev layf na Ijipt.

¹³ I advays dɛn fɔ rɛspɛkt PAPA GƆD we na dɛn PAPA GƆD; nain waŋren dɛn fɔ wɔship ɛn nain nem dɛn fɔ tek prɔmis pɔsin ɛnitin.

¹⁴ Mozis se dɛn nɔ fɔ wɔship nɔn ɔda gɔd; ivin dɛn fɔrina dɛn gɔd dɛnsɛf dɛn nɔ fɔ wɔship.

¹⁵ If dɛn wɔship dɛn, PAPA GƆD we na dɛn PAPA GƆD de jɛlɔs ɛn i go vɛks bad bad wan pan dɛn ɛn go kil dɛn tret.

¹⁶ I se lɛ dɛn nɔ fos PAPA GƆD fɔ du sɔntin lɛk aw dɛn bin fos am na Masa.

¹⁷ I advays dɛn se dɛn nɔ fɔ de mek traŋayes bɔt dɛn fɔ de obe ɔl di lɔ dɛn we PAPA GƆD we na dɛn PAPA GƆD dɔn gi dɛn.

¹⁸ I prɔmis dɛn se if dɛn du di tin dɛn we go mek PAPA GƆD in at gladi, ɔltin go fayn fɔ dɛn ɛn dɛn go go tap na di gud land we PAPA GƆD bin dɔn prɔmis dɛn fɔstɛm-papa dɛn

¹⁹ we i go dɔn drɛb dɛn ɛnimi dɛn kɔmɔt na di land, jɛs lɛk aw i bin dɔn prɔmis se in go du.

²⁰ I tɛl di Izrɛlayt dɛn se wande wande dɛn pikin dɛn go aks dɛn wetindu PAPA GƆD we na dɛn PAPA GƆD gi dɛn ɔl dɛn lɔ dɛn de.

²¹ I se dɛn fɔ ansa dɛn se dɛn na bin Ijipt dɛn kiŋ in slev dɛn, bɔt PAPA GƆD bin yuz in pawa fɔ pul dɛn kɔmɔt de.

²² I bin du mirekul dɛn fɔ pɔnish Ijipt dɛn ɛn dɛn kiŋ ɛn in fambul dɛn, we dɛn ɔl bin si wit dɛn yon yay.

²³ PAPA GƆD bin pul dɛn kɔmɔt de so i kɛr dɛn go na di land we i bin dɔn swɛ to dɛn fɔstɛm-papa dɛn se i go gi dɛn.

²⁴ I se PAPA GƆD we na dɛn PAPA GƆD dɔn tɛl dɛn traŋa wan se dɛn fɔ de obe di lɔ dɛn ɛn rɛspɛkt PAPA GƆD we na dɛn PAPA GƆD ɔltɛm, so dat i go de kɔba dɛn ɔltɛm lɛkɛ aw i bin dɔn kɔba dɛn te da de de.

²⁵ Ɛn se if dɛn du ɔl wetin PAPA GƆD we na dɛn se dɛn fɔ de du, I go luk dɛn lɛkɛ siriɔs mɔtalman dɛn ɛn in at go de to dɛn ɔltɛm.