Ditarɔnɔmi 5 - Krio Fɔs Oli Baybul

Di Tɛn Kɔmandmɛnt

¹ Mozis kɔl ɔl di Izrɛlayt dɛn ɛn tɛl dɛn se, Lɛ ɔlman na Izrɛl yɛri o bikɔs dɛn fɔ tek tɛm lan ɛn obe di lɔ dɛn we i de gi dɛn da de de.

² I mɛmba dɛn bɔt di Kɔvinant we PAPA GƆD we na dɛn PAPA GƆD bin mek wit dɛn na Mawnt Saynay.

³ I mɛmba dɛn igen se nɔto wit dɛn fɔstɛm-papa dɛn PAPA GƆD bin mek di Kɔvinant, na wit dɛnsɛf sɛf, dɛn we bin de da tɛm de

⁴ bikɔs na to dɛn PAPA GƆD bin tɔk fes to fes insay da faya

⁵ ɛn nain Mozis na bin di midul man we bin go ɔp di mawnten de tɛl dɛn wetin PAPA GƆD bin de tɔk bikɔs dɛn bin de fred di faya. Mozis mɛmba dɛn se PAPA GƆD bin tɔk se,

⁶ nain PAPA GƆD we na dɛn PAPA GƆD, we pul dɛn kɔmɔt na Ijipt usay dɛn bin tek dɛn mek slev ɛn dɛn bin de sɔfa bad bad wan.

⁷ Nain waŋren Izrɛl fɔ wɔship.

⁸ Izrɛl nɔ fɔ mek nɔn imej ɔ tin we fiba lɛkɛ ɛnitin we de ɔp na di skay, ɔ lɛkɛ ɛnitin we de na land ɔ ɔnda wata,

⁹ fɔ de wɔship, ɔ ivin butu, bikɔs in PAPA GƆD we na dɛn GƆD de jɛlɔs bad bad wan. I nɔ want nɔn rayval. We i dɔn jɛlɔs, i kin pɔnish di grampikin fɔ di grampa in sin. I kin ivin pɔnish gret grampikin ɔl, we i kam to di wan dɛn we et am,

¹⁰ bɔt ɔl di wan dɛn we lɛk am ɛn de du wetin i se, kin ɛnjɔy in lɔv to di tawzin tawzin jɛnareshɔn sɛf..

¹¹ Izrɛl nɔ fɔ yuz in PAPA GƆD in nem fɔ swɛ we i de lay, bikɔs i nɔ go sɔri fɔ nɔbɔdi we go yuz in nem fɔ swɛ we i de lay.

¹² Izrɛl fɔ mek shɔ se dɛn fɔ de mɛmba ɛn rɛspɛkt di de we mek sɛvin we fɔ blo, bikɔs na so PAPA GƆD se.

¹³ Dɛm fɔ dɔn du ɔl dɛn wok insay siks de;

¹⁴ bɔt di de we mek sɛvin, na di de dat we dɛn fɔ mɛmba PAPA GƆD we na dɛn PAPA GƆD. Izrɛl nɔ fɔ du nɔn wok da de de. Dɛm o, dɛn bɔypikin dɛn o, gyal pikin dɛn o, wokman ɛn wok uman dɛn o, kaw ɛn dɔŋki o, trenja dɛnsɛf nɔ fɔ wok da de de atɔl, so dɛn wokman dɛn go blo jɛs lɛk dɛnsɛf.

¹⁵ Izrɛl nɔ fɔ fɔgɛt we dɛn bin bi slev na Ijipt, we PAPA GƆD we na dɛn PAPA GƆD bin yuz in pawa ɛn trɛnk fɔ sev dɛn, ɛn na dat mek in PAPA GƆD we na dɛn PAPA GƆD, de tɛl dɛn paopa se nain nɔmɔ dɛn fɔ de mɛmba di de we mek sɛvin ɛvri wik.

¹⁶ Izrɛl dɛn fɔ rɛspɛkt dɛn papa ɛn dɛn mama bikɔs na so PAPA GƆD se, lɛ dɛn go gɛt lɔŋ layf ɛn ɛnjɔy dɛnsɛf na di land we PAPA GƆD we na dɛn PAPA GƆD dɔn gi dɛn.

¹⁷ Nɔbɔdi nɔ fɔ kil in kɔmpin.

¹⁸ Nɔbɔdi nɔ fɔ lidɔm wit in kɔmpin in wɛf ɔ man.

¹⁹ Nɔbɔdi nɔ fɔ tif in kɔmpin in tiŋs dɛn.

²⁰ Nɔbɔdi nɔ fɔ lay pan in kɔmpin we i bi witnɛs na kot.

²¹ Nɔbɔdi nɔ fɔ want in kɔmpin in man ɔ in wɛf, ɔ milɛ dɛn os, ɔ dɛn fam, ɔ dɛn wokman ɛn wokuman dɛn, dɛn kaw, dɛn dɔŋki ɔ ɛnitin we na dɛn kɔmpin yon.

²² Mozis tɛl dɛn se na dɛn tin dɛn de PAPA GƆD bin tɛl dɛn we dɛn bin de na da Mawnten we i bin tɔk to dɛn lawd lawd wan insay da faya we bin gɛt tik tik smok we bin mek di ples dak. I se na dat nɔmɔ PAPA GƆD bin tɛl dɛn ɛn i bin rayt dɛn na tu ston tablɛt gi in di Mozis.

Di Pipul Dɛn Bin Fred

²³ Mozis se we di pipul dɛn bin yɛri di vɔys na di daknɛs we faya bin de kech na di mawnten, dɛn ɛn dɛn bigman ɛn di big wan dɛn na di fambul dɛn bin go mit am

²⁴ go tɛl am se PAPA GƆD we na dɛn PAPA GƆD dɔn sho dɛn aw i tan ɛn gɛt pawa ɛn dɛn dɔn yɛri in vɔys insay di faya. Na da de de nɔmɔ dɛn si PAPA GƆD tɔk to mɔtalman ɛn mɔtalman nɔ day.

²⁵ I se di pipul dɛn bin se dɛn de fred se di faya go kil dɛn ɛn if PAPA GƆD tɔk to dɛn wantɛm mɔ, dɛn mɔs day ɛn dɛn nɔ want fɔ day.

²⁶ I se dɛn tɛl am igen se nɔn mɔtalman nɔ de na dis wɔl we dɔn yɛri di PAPA GƆD we gɛt layf in vɔys na faya lɛk dɛn, ɛn nɔ day.

²⁷ So di pipul dɛn tɛl Mozis se lɛ in waŋren go bak go lisin wetin PAPA GƆD we na dɛn PAPA GƆD gɛt fɔ se ɛn wɛn i kam bak kam tɛl dɛn, dɛn go lisin am ɛn du ɔl wetin PAPA GƆD we na dɛn PAPA GƆD se.

²⁸ Mozis se we PAPA GƆD bin yɛri ɔl wetin di pipul dɛn se, PAPA GƆD tɛl am se in dɔn yɛri ɔl wetin di pipul dɛn tɛl Mozis ɛn na tru dɛn tɔk.

²⁹ I se PAPA GƆD bin se if na da kayn at de dɛn gɛt ɔl di tɛm fɔ rɛspɛkt am ɛn du ɔl wetin i se dɛn fɔ du, ɔltin bin fɔ fayn sote go fɔ dɛn ɛn dɛn pikin dɛn we nɔ bɔn yet.

³⁰ PAPA GƆD tɛl am fɔ go tɛl di pipul dɛn fɔ go bak na dɛn tɛnt dɛn

³¹ bɔt i se Mozis in fɔ stil de de bikɔs PAPA GƆD wan tɛl am ɔl di kɔmandmɛnt dɛn, wetin fɔ du ɛn aw fɔ du dɛn, so Mozis go tich di pipul dɛn lɛ dɛn go ebul obe di lɔ dɛn na di land we i dɔn gi dɛn.

³² Mozis tɛl di Izrɛlayt dɛn se, dɛn fɔ tek tɛm lɛ dɛn obe di lɔ dɛn we PAPA GƆD we na dɛn PAPA GƆD dɔn se dɛn fɔ obe, ɛn yuki yuki nɔ fɔ de pan dɛn.

³³ I advays di Izrɛlayt dɛn fɔ du ɔl wetin PAPA GƆD we na dɛn PAPA GƆD dɔn se dɛn fɔ de du so dat ɔltin go fayn fɔ dɛn ɛn dɛn go gɛt lɔŋ layf fɔ ɛnjɔy di land we dɛn bin de go kapchɔ.