Ditarɔnɔmi 34 - Krio Fɔs Oli Baybul

Mozis Day

¹ Mozis bin kɔmɔt usay i bin de na Moab we na flat grɔn ɛn go ɔp Mawnt Pisga we de ɔpozit Jɛriko. Na de PAPA GƆD sho am di land, frɔm Giliad te rich Dan,

² I sho am Naftali, Ifrem ɛn Manasɛ, ɔl di land dɛn na Juda, te rich di Mɛditarenian Si,

³ I sho am di ɔt ɛn dray ples na Juda ɛn di flat grɔn dɛn, dat na di Jɛriko Vali, di Pam Tik Siti, te rich Zoa.

⁴ Nain PAPA GƆD tɛl am se, na di land dawande we i bin swɛ to Ebraam, Ayzak ɛn Jekɔb se i go gi dɛn jɛnareshɔn. I tɛl am se, I dɔn mek i si am wit in yay, bɔt i nɔ go gri mek i go de.

⁵ So Mozis we na PAPA GƆD in wokman, day na Moab, jɛs lɛkɛ aw PAPA GƆD bin dɔn se go bi,

⁶ ɛn PAPA GƆD bɛr am na di vali we de ɔpozit Bɛthpeɔ na Moab; bɔt nɔbɔdi nɔ no di rayt ples te tide.

⁷ Mozis bin ol wan ɔndrɛd ɛn twɛnti ia we i day; i bin de si gud gud wan ɛn i bin stil gɛt in trɛnk.

⁸ Di Izrɛlayt dɛn kray ɛn munin fɔ Mozis na Moab fɔ tati de.

⁹ Jɔshwa we na Nɔn in pikin, bin gɛt plɛnti sɛns, bikɔs Mozis bin dɔn blɛs am; so di pipul dɛn obe am ɛn du ɔl wetin PAPA GƆD bin tɛl Mozis se dɛn fɔ du.

¹⁰ Wande Izrɛl nɔ gɛt prɔfɛt we tan lɛkɛ Mozis, we PAPA GƆD de tɔk to fes to fes,

¹¹ nɔn ɔda prɔfɛt nɔ de we du dɛn wɔndaful tin dɛn we PAPA GƆD bin sɛn am fɔ go du na Ijipt, to di Ijipshian kiŋ ɛn wokman dɛn, ɛn ɔl in pipul dɛn,

¹² ɛn igen, na di kayn pawa we i bin de tek du tin dɛn, ɛn di kayn fiaful tin dɛn we i bin de du, we ɔl di Izrɛlayt dɛn bin de si.