Ditarɔnɔmi 33 - Krio Fɔs Oli Baybul

Mozis Blɛs Di Difrɛn Fambul Dɛn na Izrɛl

¹ Na di blɛsin dis dis we Mozis bin blɛs di Izrɛlayt dɛn bifo i day.

² I se, PAPA GƆD kam dɔŋ Mawnt Saynay ɛn kɔmɔt lɛkɛ di san ɛn shayn lɛk san oba Idɔm, ɛn in layt bin de shayn kɔmɔt Mawnt Paran, tawzin tawzin enjɛl dɛn bin de wit am ɛn faya bin de kɔmɔt nain raytan.

³ I lɛk in pipul dɛn, ɛn i de kɔba di wan dɛn we de fɔ am ɛn de tek wetin i se,

⁴ we ɔl di difrɛn fambul dɛn na Izrɛl bin gɛda, a bin gi dɛn PAPA GƆD in lɔ we dɛn tek pas ɔltin na di wɔl.

⁵ Dɛn bin kam gɛt kiŋ na Izrɛl we ɔl di bigman dɛn na Izrɛl bin de, ɛn ɔl di pipul dɛn na Izrɛl bin de de

⁶ Lɛ di Rubɛn fambul dɛn de te go, ɛn lɛ di man dɛn de plɛnti te go.

⁷ Mozis tɔk bɔt di Juda fambul dɛn se, Mek PAPA GƆD ansa Juda dɛn prea ɛn mek dɛn bi wan pan di fambul dɛn na Izrɛl bak. Mek PAPA GƆD fɛt fɔ dɛn ɛn ɛp dɛn fɛt dɛn ɛnimi dɛn.

⁸ I tɔk bɔt di Livay fambul dɛn se, Mek PAPA GƆD gi di Livay fambul dɛn in Thumim ɛn in Yurim to di wan dɛn we dɛn at de to am gud gud wan Yu mek dɛn pas ɔlkayn trɔbul na Masa fɔ si uskayn pipul dɛn bi ɛn yu bin si dɛn na Mɛriba se dɛn na pipul dɛn we lɛk yu.

⁹ Dɛn lɛk ɛn rɛspɛkt yu pas dɛn mami ɛn dadi, ɛn dɛn brɔda, sista ɛn pikin dɛn. Dɛn de obe yu ɛn de du ɔl wetin yu tɛl dɛn fɔ du, ɛn dɛn de waka tret wit yu insay di Kɔvinant.

¹⁰ Dɛn tich yu pipul dɛn fɔ obe yu lɔ dɛn; Dɛn mek sakrifays na yu ɔlta.

¹¹ Mek di Livayt fambul dɛn jɛntri; ɛn gladi wit di wok we dɛn de du. Nyakanyaka ɔl dɛn ɛnimi dɛn so dat dɛn nɔ go ebul grap fɔ fɛt dɛn igen.

¹² I tɔk bɔt di Bɛnjamin fambul dɛn se, dɛn na di fambul dɛn we PAPA GƆD lɛk pas ɔl; PAPA GƆD de kɔba dɛn ɔltɛm mek natin nɔ du dɛn, ɛn na wit dɛn i tap.

¹³ I tɔk bɔt Josɛf in jɛnareshɔn dɛn se, Mek PAPA GƆD du dɛn gud ɔltɛm ɛn lɛ i mek ren de kam na dɛn land, ɛn wata go de bɔs ɔnda grɔn.

¹⁴ Mek ɔl dɛn frut dɛn rɛp na di tik ɛn mek ɔltin na dɛn fam dɛn ful di tɛm we dɛn fɔ avɛst.

¹⁵ Mek fayn fayn frut dɛn gro na dɛn il dɛn.

¹⁶ Mek dɛn gɛt ɔl di gud tin dɛn we di land gɛt, we na bin di blɛsin we di Gɔd we bin tɔk na bush we de bɔn, gi dɛn. I se mek dɛn blɛsin de pan Josɛf in jɛnareshɔn dɛn bikɔs nain na bin di lida fɔ in brɔda dɛn.

¹⁷ Ifrem ɛn Manasɛ dɛn tawzin tawzin fɛt man dɛn trɔŋ, we yu si dɛn, dɛn fayn lɛk bush kaw in fɔs-bɔy-pikin. Dɛn gɛt trɛnk lɛk bush kaw we dɛn go tek kil ɔl dɛn ɛnimi ɛn pul dɛn kɔmɔt usay dɛn de.

¹⁸ Mozis tɔk bɔt di Zɛbyulɔn fambul se, bɛtɛ go fala dɛn we dɛn go du biznɛs na si ɛn jɛntri go de na Izrɛl.

¹⁹ Dɛn go invayt di ɔda fambul dɛn lɛ dɛn ɔl go wɔship PAPA GƆD na di mawnten usay dɛn kin mek dɛn sakrifays to PAPA GƆD; Dɛn jɛntri de kɔmɔt na di si ɛn di sansan we de na di sho.

²⁰ Mozis tɔk bɔt di Gad fambul dɛn se, Blɛsin de fɔ di wan we mek di Gad fambul dɛn land big! Gad de waka saful saful lɛkɛ Layɔn; i mɔs si se i skrap in ɛnimi bifo in at kol.

²¹ I pik di bɛt land fɔ insɛf, land we dɛn kip fɔ di kɔmanda; we na lɛkɛ fɔ kiŋ, we di lida dɛn na Izrɛl mit na di Gad fambul kin du ɔl wetin PAPA GƆD in lɔ se.

²² I tɔk bɔt di Dan fambul dɛn se, Dan na yɔŋ layɔn we go kɔmɔt nain kev na Beshan, ɛn jomp pan in ɛnimi.

²³ Mozis tɔk bɔt di Naftali fambul se, Naftali de ɛnjɔy PAPA GƆD in lɔv ɛn dɛn gɛt plɛnti blɛsin, na dɛn gɛt ɔl di land frɔm nɔth to sawt.

²⁴ Mozis tɔk bɔt di Asha fambul se, lɛ PAPA GƆD blɛs di Asha fambul pas ɔl di ɔda fambul dɛn; ɛn lɛ PAPA GƆD lɛk dɛn pas ɔl di ɔda fambul dɛn. Mek dɛn jɛntri bad bad wan.

²⁵ Na ayɛn ɛn bras dɛn go tek mek dɛn get ɛn nɔbɔdi nɔ go atak dɛn sote go.

²⁶ Nɔn gɔd nɔ de we gɛt pawa lɛkɛ Izrɛl dɛn PAPA GƆD, di klawd dɛn nain chariɔt ɛn i de rayd ɔp na di klawd.

²⁷ Na PAPA GƆD de kɔba dɛn, di Gɔd we nɔ de day, nain de drɛb dɛn ɛnimi kɔmɔt na di land dɛn we dɛn de go insay, ɛn tɛl dɛn se, mek dɛn kil dɛn ɔl.

²⁸ So Izrɛl gɛt pis, nɔbɔdi nɔ de fɔ ambɔg am na di land we gɛt bɔku bɔku sid plant ɛn wayn, usay dyu de wata di grɔn.

²⁹ Di pipul dɛn na Izrɛl na pipul dɛn we gɛt lɔk! Nɔn ɔda neshɔn nɔ tan lɛkɛ dɛn. Na PAPA GƆD insɛf de fɛt fɔ dɛn, I de kɔba dɛn ɛn mek dɛn win dɛn fɛt dɛn! Dɛn ɛnimi dɛn go beg dɛn lɛ dɛn nɔ kil dɛn, bɔt dɛn go kapchɔ dɛn ɛnimi dɛn land ɛn waka fri wande.