Ditarɔnɔmi 32 - Krio Fɔs Oli Baybul

¹ Mek ath ɛn skay lisin wetin a de se.

² Mek wetin a de kam tɛl dɛn go tan lɛk we ren de kam, Mek wetin a de tɔk go tan lɛkɛ we dyu kɔba ples, lɛkɛ we ren de drisl pan yɔŋ gras, ɛn lɛkɛ we ren de fɔdɔm pan trɔŋ plant.

³ A go prez PAPA GƆD in nem ɛn ɔlman go tɔk bɔt PAPA GƆD in pawa.

⁴ Na PAPA GƆD de fɛt fɔ dɛn ɛn i nɔ de mek mistek, I nɔ bɛn-bɛn pan ɛnitin we i de du. Na fethful Gɔd, ɛn i nɔ de lay Natin we i de du nɔ gɛt wan bɛn bɛn.

⁵ Bɔt dɛn nɔ waka tret wi am, so dɛn nɔ fit fɔ bi in pipul, dɛn na sinful ɛn bɛn bɛn pipul.

⁶ Na so dɛn fulish pipul dɛn de we nɔ gɛt sɛns fɔ trit PAPA GƆD? In nɔto dɛn papa we mek dɛn, we mek dɛn bi wanol neshɔn?

⁷ Mɛmba fɔstɛm o, mɛmba lɔntɛm, aks una pipul dɛn bɔt wetin bin dɔn apin, aks di ol pipul dɛn mek dɛn tɛl una.

⁸ We PAPA GƆD Ɔlmayti gi neshɔn dɛn prɔpati, we i de sɛpret difrɛn difrɛn pipul dɛn, i sho ɔlman usay dɛn fɔ de akɔdin to aw di difrɛn fambul dɛn na Izrɛl plɛnti.

⁹ Na PAPA GƆD insɛf na Izrɛl dɛn Gɔd.

¹⁰ I fɛn dɛn na di ɛmti ples we pɔsin nɔ go ebul tap, ples we nɔbɔdi nɔ de, pas ebi ebi briz; i kɔba dɛn ɛn mɛn dɛn, i trit dɛn lɛk in bɔl yay.

¹¹ Lɛkɛ aw Igul de tich in pikin fɔ flay we di pikin kin de nak nak in fɛda ɛn wan fɔdɔm, di big Igul kin opin in fɛda ɛn go ɔnda in pikin ɛn kech am ɛn mek i sidɔm nain fɛda.

¹² Na PAPA GƆD waŋren bin de kɛr dɛn go, nɔn ɔda gɔd nɔ bin de de.

¹³ PAPA GƆD mek dɛn rul dɛn kɔntri we gɛt il ɛn mawnten, dɛn it wetin dɛn pul na fam; i mek dɛn pul ɔni insay dɛn big big ston ɛn ɔyl na ayɛn ston.

¹⁴ Dɛn kaw ɛn got dɛn bin de gi dɛn plɛnti milk; wit fat fat ship pikin dɛn, man ship dɛn, ɛn bɔku bɔku got ɛn kaw, wit di sid plant we fayn pas ɔl ɔda wan dɛn, ɛn nɔn wayn nɔ fayn pas dɛn yon.

¹⁵ Izrɛl, bin jɛs de jɛntri bɔt dɛn bin traŋayes; Izrɛl bin gɛt plɛnti fɔ it so i bin jɔs de rɔju. Dɔn i dɔn dray bak, dɔn i kɔmɔt biɛn PAPA GƆD we mek am, ɛn nɔ mɛmba di wan we sev am.

¹⁶ Izrɛl mek PAPA GƆD jɛlɔs fɔ dɛn fɔrena dɛn gɔd dɛn, di bad bad tin dɛn we dɛn bin de du, mek i vɛks bad bad wan.

¹⁷ Dɛn mek sakrifays to fɔrin gɔd dɛn we nɔto tru tru gɔd dɛn, gɔd dɛn we dɛn nɔ ɛva no, gɔd dɛn we kam yɛstade, we dɛn fɔstɛnpapa dɛn nɔ bin de fred.

¹⁸ Dɛn fɔgɛt bɔt dɛn Gɔd we mek dɛn, di wan we gi dɛn layf.

¹⁹ We PAPA GƆD si se dɛn dɔn kɔmɔt biɛn am, i vɛks ɛn i pul at pan dɛn.

²⁰ I se in nɔ go ɛp dɛn igen ɛn i go si if dɛn go de lɛkɛ aw dɛn bin de we in bin de du fɔ dɛn, bikɔs dɛn na traŋayes pipul dɛn we nɔ de waka tret.

²¹ Dɛn mek PAPA GƆD vɛks bikɔs dɛn de wɔship lay lay gɔd, dɛn mek i jɛlɔs bikɔs dɛn gɔd dɛn nɔto gɔd dɛn. So i go drɔ ɔda pipul dɛn we nɔ bɛtɛ kam nia am so dat Izrɛl go vɛks, dɛn go jɛlɔs.

²² Mi vɛksteshɔn kin mek big big faya kech ɛn bɔn ɔltin na dis wɔl. I go rich ɔnda ɔnda di grɔn ɛn go bɔn ɔnda dɛn mawnten dɛn.

²³ A go jɔs de mek waala de mit dɛn ɛn na ɔlkayn tin dɔn, nain a go sɛn pan dɛn.

²⁴ Na aŋri ɛn fiva ɛn ɔda bad bad sik dɛn go kil dɛn. A go sɛn bad bad animal dɛn pan dɛn ɛn dɛn bad bad snek dɛn go bɛt ɛn kil dɛn.

²⁵ Wa go mek dɛn kil dɛn plɛnti, bad bad pipul dɛn go atak dɛn na dɛn os dɛn. Yɔŋ man ɛn uman dɛn go day yɔŋ bebi dɛn ɛn ol pipul dɛnsɛf go day.

²⁶ A bin fɔ dɔn kil dɛn ɔl lɔntɛm so nɔbɔdi nɔ go mɛmba dɛn.

²⁷ Bɔt a nɔ bin wan lɛ mi ɛnimi dɛn blɔf se dɛn dɔn bit mi yon pipul dɛn, we na misɛf kil dɛn.

²⁸ Izrɛl na pipul dɛn we nɔ gɛt sɛns; dɛn nɔ de tink dip atɔl

²⁹ If na pipul dɛn we bin de tink dɛn bin fɔ dɔn no wetin go bi to dɛn if dɛn du wetin dɛn du so.

³⁰ Aw kɔm waŋren pɔsin ebul bit wan tawzin pipul, ɛn tu pipul mek tu tawzin pipul rɔnawe? Pas if di wan we de fɛt fɔ dɛn pul an pan dɛn, ɛn PAPA GƆD dɔn pul at pan dɛm.

³¹ Bikɔs di wan we dɛn abop pan nɔ gɛt pawa lɛk di wan we wi abop pan, ivin wi ɛnimi dɛnsɛf de tɔk am.

³² Bikɔs dɛn greps kɔmɔt pan dɛn greps tik na Sɔdɔm, ɛn di fam dɛn na Gɔmɔra; dɛn greps dɛn gɛt pɔyzin, dɛn bɔnch greps dɛn bita;

³³ dɛn wayn na lɛkɛ snek pɔyzin ɛn lɛkɛ dɛn bad bad snek pit.

³⁴ “Dis nɔ de na mi sto usay a de, sil wit ɔl mi jɛntri?

³⁵ Na mi gɛt rivɛnj ɛn na mi de pe pipul fɔ dɛn gud wok, fɔ di tɛm we dɛn go sket fɔdɔm; bikɔs di tɛm fɔ dɛn waala dɔn de rich, ɛn dɛn alaki wande kam lɛk briz.

³⁶ PAPA GƆD go sev in pipul dɛn ɛn sɔri fɔ in wokman dɛm, we i si se dɛn pawa dɔn dɔn, ɛn nɔn pan di fribɔn ɔ slev nɔ de igen

³⁷ Na datɛnde, I go aks dɛn se, ‘We dɛn gɔd dɛm, di wan we dɛn bin biliv se go sev dɛm,

³⁸ we bin de it di fat na dɛn sakrifays dɛm, ɛn drink di wayn we dɛn kin mek drink ɔfrin?’ Lɛ dɛn grap ɛp una naw nɔ, lɛ dɛn protɛkt una.

³⁹ Una dɔn si naw se na Mi, yɛs Mi, na im, ɛn nɔn ɔda gɔd nɔ de apat frɔm mi; A de kil ɛn mek pipul dɛn gɛt layf; a de wund ɛn a de mɛn; ɛn nɔbɔdi nɔ de we ebul sev una kɔmɔt na mi an.

⁴⁰ Bikɔs a es mi an ɔp to ɛvin, ɛn swɛ se, Lɛk we mi go de sote go,

⁴¹ if a shap mi shayn sɔd we a bigin gi jɔjmɛnt, a go rivɛnj pan mi ɛnimi dɛn, ɛn pɔnish di wan dɛn we et mi.

⁴² A go mek mi aro drɔnk wit blɔd, ɛn min sɔd go it flɛsh blɔd we kɔmɔt pan di wan dɛn we dɛn kil ɛn di wan dɛn we dɛn kapchɔ, flɛsh we kɔmɔt pan mi ɛnimi dɛn we gɛt lɔŋ ia na dɛn ed.

⁴³ Mozis siŋ se, “Una prez in pipul dɛn, una di neshɔn dɛm; bikɔs i de rivɛnj fɔ in wokman dɛm we dɛn kil ɛn de rivɛnj pan in ɛnimi dɛm, ɛn fɔgiv in pipul dɛn fɔ ɔl dɛn sin.

⁴⁴ Na Mozis, ɛn Jɔshwa we na Nɔn in Bɔy pikin, bin siŋ lawd wan so dat ɔl di pipul dɛn go yɛri.

Mozis Tɛl Di Izrɛlayt Dɛn Di Las Tɛm Wetin Ɛn Wetin Fɔ Du

⁴⁵ We Mozis dɔn tɔk to di Izrɛlayt dɛn dɔn,

⁴⁶ I tɛl dɛn se, “Una kip ɔl wetin a dɔn tɛl una na una at, so dat una go ebul tich una pikin dɛn fɔ obe PAPA GƆD in lɔ dɛn.

⁴⁷ I tɛl dɛn igen se, nɔto fɔ natin in bin de tich dɛn ɔl wetin i dɔn tich dɛn, bɔt na fɔ dɛn yon vɛri layf. I tɛl dɛn se if dɛn obe di lɔ dɛn, dɛn go gɛt lɔŋ layf na di land we dɛn bin de rɛdi fɔ krɔs Riva Jɔdan go kapchɔ.

⁴⁸ Da sem de de, PAPA GƆD bin tɛl Mozis se

⁴⁹ lɛ i go na dɛn mawnten dɛn we dɛn kin kɔl Abarim, we de na Moab, ɔpozit Jɛriko, ɛn klem go rayt ɔp Mawnt Nɛbo, go luk di land we nem Kenan, we i de gi di Izrɛlayt dɛn;

⁵⁰ ɛn lɛ i de de te i day go mit in fɔstɛm-papa dɛn, lɛkɛ we Erɔn bin day na Mawnt Ɔ go mit in fɔstɛm-papa dɛn,

⁵¹ bikɔs dɛn nɔ bin du wetin PAPA GƆD bin want dɛn fɔ du we dɛn bin de na Mɛriba, na di ɛmti ples we pɔsin nɔ go ebul tap na Zin; i se dɛn nɔ bin rɛspɛkt am bifo di pipul dɛn se, in oli.

⁵² Dɔn i tɛl Mozis se, i go si di land, bɔt in fut nɔ go mas na da land de, we in de gi di Izrɛlayt dɛn.