Ditarɔnɔmi 30 - Krio Fɔs Oli Baybul

Di Tin Dɛn We Fɔ Du Fɔ Go Bak To PAPA GƆD Ɛn Gɛt Blɛsin

¹ Mozis tɛl di Izrɛlayt dɛn se in de gi dɛn chans fɔ pik di gud tin dɛn we PAPA GƆD go du fɔ dɛn, ɔ di pɔnish we PAPA GƆD go pɔnish dɛn if dɛn nɔ biliv am. I tɛl dɛn se, we ɔl dɛn tin dɛn de we i bin dɔn tɛl dɛn bɔt go apin to dɛn na di fawe kɔntri dɛn we PAPA GƆD we na dɛn PAPA GƆD go skata dɛn, dɛn go mɛmba se in bin tɛl dɛn fɔ mek dɛn mekɔp dɛn maynd.

² I se if dɛn ɛn dɛn jɛnareshɔn gri fɔ obe PAPA GƆD we na dɛn PAPA GƆD, ɛn tɔn bak go to PAPA GƆD we na dɛn PAPA GƆD wit ɔl dɛn at ɛn sol;

³ datɛnde, PAPA GƆD we na dɛn PAPA GƆD go sɔri fɔ dɛn ɛn si dɛn lɛkɛ in yon pipul dɛn bak. PAPA GƆD go gɛda dɛn kɔmɔt na ɔl di kɔntri dɛn we i bin skata dɛn, ɛn mek dɛn gɛt ɔl dɛn jɛntri bak.

⁴ I lɛk us pat dɛn de na di wɔl, PAPA GƆD we na dɛn PAPA GƆD go pul dɛn ɔl kɔmɔt de;

⁵ ɛn PAPA GƆD we na dɛn PAPA GƆD go kɛr dɛn go bak na di land we na dɛn fɔstɛm-papa dɛn prɔpati, so dat dɛn go go de de. PAPA GƆD go mek dɛn jɛntri ɛn plɛnti pas dɛn fɔstɛm-papa dɛn.

⁶ PAPA GƆD go chenj dɛn ɛn dɛn jɛnareshɔn dɛn at, so dat dɛn go lɛk PAPA GƆD we na dɛn PAPA GƆD wit ɔl dɛn at ɛn wit ɔl dɛn sol so dat dɛn go kɔntinyu fɔ de na di land.

⁷ Ɛn PAPA GƆD go mek ɔl di bad tin dɛn we i bin dɔn se go apin to di Izrɛlayt dɛn, go mit dɛn ɛnimi dɛn we bin dɔn du dɛn bad.

⁸ Dɔn di Izrɛlayt dɛn go tɔn to PAPA GƆD bak, ɛn obe ɔl wetin i bin se dɛn fɔ de du.

⁹ PAPA GƆD we na dɛn PAPA GƆD go mek dɛn si bɛtɛ pan ɔl wetin dɛn put an fɔ du; pan dɛn pikin dɛn we dɛn de bɔn, di pikin dɛn we dɛn kaw dɛn de bɔn, ɛn di tin dɛn we dɛn de plant na dɛn fam, bikɔs PAPA GƆD go gladi fɔ mek dɛn jɛntri lɛkɛ aw i bin gladi fɔ mek dɛn fɔstɛm-papa dɛn jɛntri.

¹⁰ Dat na if dɛn tɔn bak go to PAPA GƆD we na dɛn PAPA GƆD, wit ɔl dɛn at ɛn ɔl dɛn sol, ɛn obe ɔl wetin PAPA GƆD we na dɛn PAPA GƆD se dɛn fɔ de du, we rayt na di Lɔ buk.

¹¹ Mozis tɛl di Izrɛlayt dɛn se, di kɔmandmɛnt dɛn we i gi dɛn da de de, nɔ at fɔ ɔndastand ɛn obe.

¹² So na nɔnsɛns fɔ lɛ sɔmbɔdi se, aw dɛn fɔ manej yɛri ɛn obe dɛn kɔmandmɛnt dɛn de we dɛn nɔ de na ɛvin ɛn dɛn nɔ gɛt fɔ krɔs wata fɔ briŋ am kam.

¹³ Ɔ fɔ sɔmbɔdi fɔ tɔk se, aw dɛn fɔ manej gɛt am, bikɔs i de fa.

¹⁴ Mozis tɛl dɛn se di kɔmandmɛnt dɛn de wit dɛn, bikɔs dɛn bin dɔn no dɛn ɔl na dɛn at ɛn bin de rid dɛn.

¹⁵ Mozis tɛl di Izrɛlayt dɛn se, in de gi dɛn chans fɔ pik fɔ gɛt ɔltin we dɛn want ɛn de na di land wit lɔŋ layf ɛn wɛl bɔdi, ɔ nɔ fɔ de na di land, ɛn de sɔfa ɛn day kwik.

¹⁶ I tɛl dɛn igen se, if dɛn obe ɔl PAPA GƆD in kɔmandmɛnt dɛn we in gi dɛn da de de, dat na fɔ lɛk PAPA GƆD we na dɛn PAPA GƆD, liv di we we PAPA GƆD se dɛn fɔ liv, ɛn du ɔl wetin i bin dɔn se dɛn fɔ de du, dɛn go bɔn bɔku bɔku pikin, ɛn PAPA GƆD we na dɛn PAPA GƆD go blɛs dɛn na di land we dɛn bin de rɛdi fɔ go kapchɔ ɛn tek as dɛn prɔpati.

¹⁷ I se bɔt if dɛn tɔn dɛn bak gi PAPA GƆD ɛn nɔ gri lisin ɔl we i de wɔn dɛn, ɛn fala ɔda pipul go wɔship ɔda gɔd dɛn,

¹⁸ in wan mek dɛn no se, dɛn nɔ go gɛt lɔŋ layf na di land we dɛn bin de rɛdi fɔ go krɔs Riva Jɔdan fɔ go tek as dɛn prɔpati.

¹⁹ Mozis se ɛvin ɛn di ath nain witnɛs dɛn se, in bin dɔn gi dɛn chans fɔ pik layf ɔ day, blɛsin ɔ swɛ; ɛn bin advays dɛn fɔ pik layf so dat dɛn jɛnareshɔn dɛn go kɔntinyu fɔ de na dis wɔl

²⁰ ɛn de traŋa wan wit PAPA GƆD we na dɛn PAPA GƆD, de sho am se dɛn lɛk an bay we dɛn de du ɔl wetin i se; bikɔs na da we de dɛn go kɔntinyu fɔ de na dis wɔl ɛn gɛt lɔŋ layf, so dat dɛn go de na di land we PAPA GƆD bin dɔn swɛ to di Izrɛlayt dɛn fɔstɛm-papa dɛn, dat na Ebraam, Ayzak ɛn Jekɔb, se i go gi dɛn.