Ditarɔnɔmi 3 - Krio Fɔs Oli Baybul

Aw Izrɛl Bin Kil Kiŋ Ɔg Ɛn Tek In Land

¹ Mozis se wɛn dɛn bin dɔn kil Kiŋ Sayɔn ɛn tek in land, dɛn put ed nɔth usay Kiŋ Ɔg we na bin kiŋ na Beshan ɛn in fɛt man dɛn bin kɔmɔt fɔ fɛt Izrɛl na Ɛdriay.

² I se nain PAPA GƆD tɛl am se lɛ dɛn nɔ fred Kiŋ Ɔg. PAPA GƆD dɔn gi dɛn to Izrɛl lɛ dɛn du dɛn wetin dɛn bin du Kiŋ Sayɔn, da Amɔrayt Kiŋ we bin de Ɛshbɔn.

³ I se PAPA GƆD bin mek Izrɛl kil Kiŋ Ɔg en ɔl in pipul dɛn. Wan pɔsin sɛf nɔ bin lɛf.

⁴ I se dɛn bin kapchɔ ɔl dɛn siksti siti na Agɔb na di Ɔg kindɔm na Beshan.

⁵ Sɔm vilej dɛn bin de we nɔ bin gɛt wɔl, bɔt di siksti siti bin gɛt ay ay wɔl dɛn ɛn get dɛn.

⁶ Mozis se dɛn pwɛl pwɛl ɔltin jɛs lɛk aw dɛn bin du di Ɛshbɔn kiŋ we dɛn pwɛl ɔltin ɛn kil ɔlman.

⁷ I se dɛn bin tek di ship ɛn got dɛn ɛn ɔda tin dɛn we dɛn bin want bikɔs na dɛn bin win di fɛt.

⁸ Mozis se na di sem tɛm dɛn bin kapchɔ di tu land dɛn na tu Amɔrayt kiŋ dɛn an biɛn Riva Jɔdan, frɔm Anɔn Vali te rich Mawnt Amɔn.

⁹ I se di Saydɔn pipul dɛn bin de kɔl Mawnt Amɔn, Siriɔn, bɔt di Amɔrayts dɛn bin de kɔl am Siriɔn.

¹⁰ I se dɛn bin kapchɔ ɔl di siti dɛn we de na di flat grɔn, di wan dɛn na di mawnten, Giliad ɛn Beshan, te rich Salɛka ɛn Ɛdriay, di siti dɛn na Ɔg kindɔm na Beshan.

¹¹ Dɛn bin bɛr Kiŋ Beshan wit ston kɔfin we bin 3 fut 11 inchis wayd. I stil de na Aman na Jɔdan. Nain wan bin lɛf pan di balans jayant dɛn we dɛn bin de kɔl di Refaim dɛn.

¹² Mozis se we dɛn bin kapchɔ di land we de na di ist pat na Jɔdan, i bin gi di Rubɛnayt ɛn di Gadayt dɛn di land frɔm Aroa we de bay Anɔn Vali ɛn af pan Giliad we gɛt so so il.

¹³ Dɔn i se i bin gi di Manasɛ pipul dɛn we miks, di ɔda pat na Giliad ɛn di wanol Beshan kɔntri we Kiŋ Ɔg bin de rul; dat na di wanol Agɔb. Pipul dɛn bin no Beshan fɔ dɛn jayant dɛn we dɛn bin de kɔl Refaim.

¹⁴ Wan pan Manasɛ in gret granpikin, Jeir bin tek ɔl da Agɔb eria de, dat na frɔm Beshan te rich Gɛshɔ ɛn Maka bɔda dɛn. Nain nem i bin gi Jeir vilej. Na so de bin nem te to di tɛm we dɛn bin rayt dis buk.

¹⁵ I se na di Mekir dɛn i bin gi Giliad,

¹⁶ ɛn i bin gi di Rubɛnayt ɛn di Gadayt dɛn di land we kɔmɔt frɔm di sawt na Giliad, te rich Anɔn Vali, ɛn na midul di Vali dɛn mak di bawndri te rich Riva Jabɔk, we na di Amɔrayt dɛn yon bawndri.

¹⁷ Na di wɛst pat, dɛn land go te rich Riva Jɔdan, ɛn bigin na Galili te to di Dɛd Si, te rich bɔtɔm Pisga Mawnten na di ist pat.

¹⁸ Da sem tɛm de, Mozis bin tɛl dɛn se PAPA GƆD dɔn gi dɛn da land de fɔ dɛn yon prɔpati so dɛn fɔ go kapchɔ di land. I se ɔl di gud fɛt man dɛn fɔ go bifo go krɔs Riva Jɔdan rɛdi fɔ fɛt.

¹⁹ Bɔt i se dɛn wɛf ɛn pikin dɛn ɛn dɛn bɔku bɔku kaw ship ɛn got dɛn, fɔ stil de na di ɔda siti dɛn we i bin dɔn gi dɛn,

²⁰ sote PAPA GƆD mek dɛn pul dɛn ɛnimi dɛn kɔmɔt na di land kpatakpata lɛk aw i bin bi fɔ dɛnsɛf. Dɔn dɛn go tek di land we PAPA GƆD we na dɛn PAPA GƆD dɔn gi dɛn biɛn Riva Jɔdan. Da tɛm de, ɔlman go go bak nain land we i bin dɔn pɔynt dɛn se na dɛn yon.

²¹ Mozis se in bin tɛl Jɔshwa se aw i bin si PAPA GƆD we na dɛn PAPA GƆD bin du to dɛn tu kiŋ dɛn, na so i go du ɔlsay we dɛn gɛt fɔ kapchɔ.

²² I tɛl dɛn se na PAPA GƆD we na dɛn PAPA GƆD de fɛt fɔ dɛn so dɛn nɔ fɔ fred dɛn atɔl.

PAPA GƆD Nɔ Gri Lɛ Mozis Go Na Di Prɔmis Land.

²³ Mozis se datɛnde, in bin pre to PAPA GƆD ɛn beg am.

²⁴ I se i pre to PAPA GƆD se, ‘PAPA GƆD we pas ɔl dɛn ɔda gɔd dɛn, a no se yu jɔs bigin sho mi yu pawa. Nɔn ɔda gɔd nɔ de ɔp na Ɛvin ɔ dis wɔl we ebul du di kayn tin dɛn we yu kin du.

²⁵ Duya, sɔri fɔ mi; mek a krɔs Riva Jɔdan ɛn si dis gud land we de oba Riva Jɔdan, mek a go si da fayn fayn kɔntri we gɛt so so il ɛn di il dɛn na Libanɔn.’

²⁶ Mozis se PAPA GƆD bin dɔn vɛks pan am fɔseka di Izrɛlayt dɛn so PAPA GƆD tɛl am se lɛ i sɛt in mɔt ɛn nɔ tɔk bɔt dat igen

²⁷ I se PAPA GƆD bin tɛl am se if i wan si di land, lɛ i go ɔp Mawnt Pisga go luk di land, bɔt i nɔ go gri lɛ i krɔs Riva Jɔdan.

²⁸ I tɛl di Izrɛlayt dɛn se PAPA GƆD se na Jɔshwa go gɛt fɔ lid dɛn go krɔs Riva Jɔdan kapchɔ di land dɛn we in go si, so PAPA GƆD se i fɔ tɛl Jɔshwa di tin dɛn we go mek i gɛt maynd fɔ ebul kɛr di pipul dɛn go.

²⁹ I mɛmba dɛn se dɛn bin stil de na di vali we de ɔpozit Bɛthpeɔ.