Ditarɔnɔmi 29 - Krio Fɔs Oli Baybul

Di Nyu Kɔvinant We Izrɛl Mek Wit PAPA GƆD Na Moab

¹ Apat frɔm di Kɔvinant we Izrɛl dɛn bin dɔn mek wit PAPA GƆD na Mawnt Saynay, PAPA GƆD bin tɛl Mozis fɔ mek di Izrɛlayt dɛn mek frɛsh wan wit am na Moab. Na dɛn tin dɛn ya Mozis bin tɛl dɛn se dɛn fɔ de du we dɛn mek di sɛkɛn Kɔvinant wit PAPA GƆD.

² Mozis bin gɛda ɔl di pipul dɛn ɛn tɛl dɛn se, dɛn ɔl bin si ɔl wetin PAPA GƆD bin du Ijipt dɛn kiŋ ɛn in wokman dɛn ɛn di Ijipshian dɛn.

³ PAPA GƆD bin du tin dɛn we dɛn nɔ bin dɔn si ɛn yɛri bɔt wande,

⁴ bɔt tetide, PAPA GƆD nɔ mek dɛn ɔndastand ɔl wetin dɛn bin si ɛn yɛri, min.

⁵ I bin dɔn waka wit dɛn na di dray ples we pɔsin nɔ go ebul tap fɔ fɔti ia bɔt dɛn klos dɛn nɔ chɛr, dɛn sandal dɛn nɔ kɔt.

⁶ Dɛn nɔ bin gɛt bred fɔ it, ɛn dɛn nɔ bin gɛt wayn ɔ spirit fɔ drink, so dɛn go no se in na PAPA GƆD we na dɛn PAPA GƆD.

⁷ We dɛn bin rich Moab, Sayɔn we na kiŋ na Ɛshbɔn, ɛn Ɔg we na kiŋ na Beshan, bin fɛt dɛn, bɔt di Izrɛlayt dɛn bin bit dɛn ɔl.

⁸ Dɛn bin tek dɛn land gi di Rubɛn fambul, di Gadayt ɛn af pan di Manasɛ fambul dɛn.

⁹ Mozis bin tɛl dɛn se lɛ dɛn mek shɔ se dɛn du ɔl wetin dɛn bin gri se dɛn go de du, we dɛn mek di Kɔvinant wit PAPA GƆD, so dat bɛtɛ go fala dɛn.

¹⁰ Mozis se, dɛn ɛn dɛn lida dɛn ɔl tinap bifo PAPA GƆD we na dɛn PAPA GƆD,

¹¹ dɛn wɛf ɛn smɔl smɔl pikin dɛn, ɛn di fɔrina dɛn we de kɔt wud ɛn tot wata fɔ dɛn, sɛf bin de de,

¹² so dat dɛn go mek di nyu Kɔvinant wit PAPA GƆD we na dɛn PAPA GƆD,

¹³ so ɔlman go no se, PAPA GƆD na dɛn Gɔd ɛn dɛn na PAPA GƆD in pipul dɛn, jɔs lɛkɛ we i bin prɔmis se i go du, ɛn bin dɔn swɛ to Ebraam, Ayzak ɛn Jekɔb, we na dɛn fɔstɛm-papa dɛn.

¹⁴ Mozis se, nɔto wit dɛn nɔmɔ we bin de de PAPA GƆD bin mek di Kɔvinant,

¹⁵ i se, na wit dɛn we de da de de na di ples we dɛn de mek sakrifays to PAPA GƆD we na dɛn PAPA GƆD, ɛn wɔship am, ɛn di wan dɛnsɛf we nɔ bɔn yet.

¹⁶ Dɛn bin no wetin dɛn ɔl bin pas na Ijipt, ɛn wetin dɛn bin pas na pipul dɛn an, we dɛn bin pas insay dɛn kɔntri we dɛn bin kɔmɔt Ijipt;

¹⁷ ɛn dɛn bin si dɛn bad bad tin dɛn we PAPA GƆD nɔ lɛk, dat na dɛn bod ɛn ston, dɛn silva ɛn gold lay lay gɔd dɛn insay di kɔntri dɛn we dɛn bin pas.

¹⁸ Mozis advays di Izrɛlayt dɛn fɔ tek tɛm lɛ nɔn pan di man dɛn, ɔl di uman dɛn, ɔl di famili dɛn ɛn ɔl di fambul dɛn, nɔ go bigin de wɔship dɛn ɔda neshɔn dɛn gɔd, lɛ dɛn nɔ go tan lɛk tik we gɛt rut, bɔt de bia frut we bita ɛn gɛt pɔyzin,

¹⁹ ɔ lɛk pɔsin we, pan ɔl we i no ɔl wetin di Kɔvinant se i fɔ de du, i stil de tɔk nain at se, natin bad nɔ go apin to am, i lɛk we i de traŋayes ɛn de du wetin in want. Mozis tɛl di Izrɛlayt dɛn se, dat go mek di pɔsin we de obe ɛn di wan we traŋayes, sɔfa togɛda.

²⁰ PAPA GƆD nɔ go fɔgiv da pɔsin de. Bifo dat, PAPA GƆD go put in vɛksteshɔn ɛn in jɛlɔs pan am, ɛn go put ɔl di swɛ dɛn we rayt na dis buk pan am, ɛn PAPA GƆD go mek i day ɛn nɔn pan in pikin dɛn nɔ go de fɔ tek mɛmba am.

²¹ PAPA GƆD go put ɔl di pɔnishmɛnt pan da wan pɔsin de, dat na di swɛ dɛn we de na di Kɔvinant we rayt ni dis Lɔ buk.

²² We di pikin dɛn we nɔ bɔn yet, ɛn di fɔrina we go kɔmɔt fa kam, si di kayn tin dɛn we de apin na di land, ɛn di kayn siknɛs we PAPA GƆD mek kech dɛn,

²³ we sɔlfa ɛn sɔl go mek di ples dɛn we dɛn fɔ plant nɔ gud fɔ plant. I go tan lɛkɛ Sɔdɔm ɛn Gɔmɔra, ɛn lɛkɛ Adma ɛn Zɛboli we PAPA GƆD bin bɔn we i bin vɛks bad bad wan.

²⁴ Di wanol wɔl go aks wetin dɛn du PAPA GƆD we mek i vɛks te i trit dɛn so.

²⁵ Pipul dɛn go de we go ansa se, na bikɔs dɛn kɔmɔt biɛn PAPA GƆD we na dɛn fɔstɛmpapa dɛn PAPA GƆD in Kɔvinant, we i bin mek wit dɛn we i bin pul dɛn kɔmɔt Ijipt,

²⁶ ɛn dɛn go sav ɔda gɔd dɛn, we dɛn nɔ bin no wande, ɛn PAPA GƆD nɔ bin tɛl dɛn fɔ du dat;

²⁷ so PAPA GƆD vɛks pan dɛn bad bad wan, ɛn sɛn ɔl di swɛ dɛn we rayt na dis buk, pan dɛn;

²⁸ ɛn PAPA GƆD vɛks te i pul dɛn kɔmɔt na dɛn land ɛn put dɛn na fɔren land te datɛnde.

²⁹ Mozis tɛl di Izrɛlayt dɛn se, tin dɛn de we PAPA GƆD kip as sikrit, bɔt di tin we i want lɛ dɛn no, i dɔn mek dɛn ɛn dɛn pikin dɛn no dɛm sote go, so dat dɛn ɔl go du wetin dis lɔ se.