Ditarɔnɔmi 28 - Krio Fɔs Oli Baybul

Di Blɛsin Dɛn Fɔ Udat De Obe

¹ Mozis tɛl di Izrɛlayt dɛn se, if dɛn obe PAPA GƆD we na dɛn PAPA GƆD, ɛn tek tɛm du ɔl wetin i dɔn tɛl dɛn da de de se PAPA GƆD se dɛn fɔ de du, PAPA GƆD we na dɛn PAPA GƆD go mek dɛn bɛtɛ pas ɔl di ɔda neshɔn dɛn na di wɔl.

² PAPA GƆD go blɛs dɛn te i rɔn oba if dɛn de du wetin PAPA GƆD we na dɛn PAPA GƆD se.

³ PAPA GƆD go put blɛsin pan ɔl dɛn biznɛs ɛn dɛn fam dɛn.

⁴ Dɛn pikin dɛn we dɛn bɔn go gɛt blɛsin, ɛn di tin dɛn we dɛn plant, go gro fayn fayn wan, ɛn dɛn kaw, ship ɛn got, go bɔn bɔku bɔku wan.

⁵ PAPA GƆD go blɛs dɛn mɔntdɔn ɛn dɛn pɔt.

⁶ Blɛsin go de pan ɛnitin we dɛn put an pan.

⁷ PAPA GƆD we na dɛn Gɔd go mek dɛn bit dɛn ɛnimi ɔltɛm; dɛn go pas wansay fɔ kam fɛt una, ɛn dɛn go skata sɛvin say fɔ rɔnawe.

⁸ PAPA GƆD go mek dɛn rɛs sto dɛn ful ɔltɛm, we dɛn nɔ go ɛva kray aŋri, ɛn dɛn nɔ go fel pan natin we dɛn put an pan na di land we PAPA GƆD we na dɛn PAPA GƆD, go gi dɛn.

⁹ PAPA GƆD go mek dɛn in yon oli pipul dɛn, jɛs lɛk aw i bin dɔn prɔmis, if dɛn obe PAPA GƆD we na dɛn PAPA GƆD ɛn du wetin i se paopa, dɛn fɔ du.

¹⁰ Datɛnde, di wanol wɔl go si se dɛn na PAPA GƆD in pipul dɛn ɛn dɛn go gɛt gud rɛspɛkt fɔ dɛn.

¹¹ PAPA GƆD go gi dɛn ɔltin plɛnti plɛnti wan na di land we i bin dɔn swɛ to dɛn fɔstɛm-papa dɛn se, i go gi dɛn: pikin, kaw, ship ɛn got, ɛn di tin dɛn we dɛn de plant.

¹² PAPA GƆD go opin in sto we i de kip di ren ɔp di klawd, ɛn mek dɛn gɛt ren di rayt tɛm, so dɛn plant dɛn go gro fayn fayn wan. Ren ɛn san de na PAPA GƆD in an. I go so blɛs dɛn, dat na ɔda neshɔn dɛn go de go lɛnt to dɛn.

¹³ If dɛn obe ɛn du ɔl wetin PAPA GƆD we na dɛn PAPA GƆD tɛl dɛn traŋa wan se dɛn fɔ de du, na dɛn go de bifo ɔltɛm pan ɔltin na dis layf ɛn nɔ de biɛn. Na ɔp nɔmɔ dɛn go de go ɛn nɔ de kam dɔŋ. Ɛnitin we dɛn put an pan, go bɛtɛ,

¹⁴ dat na if dɛn nɔ ple tampale wit PAPA GƆD ɛn go wɔship ɔda gɔd dɛn.

Wetin Kin Mit Pɔsin We Nɔ De Yɛri Wɔd

¹⁵ If dɛn nɔ obe PAPA GƆD we na dɛn PAPA GƆD ɛn du ɔl wetin i se, na bad bad tin dɛn go mit dɛn, ɛn go de wit dɛn te go.

¹⁶ Ɔl dɛn biznɛs ɛn dɛn fam nɔ go bɛtɛ.

¹⁷ Dɛn sto dɛn go ɛmti ɛn dɛn nɔ go gɛt bɛtɛ it fɔ it.

¹⁸ PAPA GƆD nɔ go mek dɛn gɛt bɔku pikin dɛn. Dɛn fam dɛn nɔ go bɛtɛ ɛn dɛn animal dɛn bɔn wan sɛf go traŋa.

¹⁹ Ɔl dɛn biznɛs nɔ go bɛtɛ.

²⁰ PAPA GƆD go put ɔlkayn swɛ pan dɛn; dɛn go de pan kɔnfyushɔn ɛn pwɛlat ɔltɛm. I go brok dɛn dɔŋ kpatakpata, ɛn dɛn layf dɛn nɔ go lɔŋ, fɔseka we dɔn kɔmɔt biɛn PAPA GƆD ɛn du bad bad tin dɛn.

²¹ PAPA GƆD go mek ɔlkayn siknɛs de mit dɛn, ɛn dɛn go fasin dɛn te dɛn kil dɛn ɔl. Wan pan dɛn nɔ go lɛf na di land we dɛn de kam go kapchɔ so.

²² PAPA GƆD go mek dɛn jɔs de kɔf, dɛn go jɔs de fil fiva ɛn dɛn bɔdi dɛn go jɔs de swɛl ɛn de wam. Di ples go de ɔt bad bad wan. I go so ɔt dat di grɔn go jɔs de dray, ɛn natin nɔ go de gro, we na dat go kil dɛn ɔl.

²³ Wan ren nɔ go kam ɛn dat go mek di grɔn trɔŋ lɛk ayɛn.

²⁴ Bifo ren kam fɔ mek tin gro, na big big briz wit bɔku bɔku dɔst ɛn sansan PAPA GƆD go mek de blo pan dɛn ol de ol nɛt, te dɛn ɔl day.

²⁵ PAPA GƆD go mek dɛn ɛnimi dɛn bit dɛn bad bad wan ɛnitɛm we dɛn atak dɛn. We dɛn go na batul fil, na rɔnawe dɛn go de rɔnawe ɛn skata ɔlɔbɔt. Di wanol wɔl go fred we dɛn go si wetin de apin to dɛn.

²⁶ Na bɔd ɛn animal go it dɛn de dedebɔdi dɛn, ɛn nɔbɔdi nɔ go de fɔ drɛb dɛn.

²⁷ PAPA GƆD go mek dɛn gɛt di kayn bwɛl dɛn we di Ijipshian dɛn bin gɛt we dɛn bin de de. Dɛn go gɛt sofut, ɔl kayn skebiz ɛn krɔ krɔ na dɛn bɔdi, we nɔ go mɛn te dɛn day.

²⁸ Na kres, blɛn yay ɛn kɔnfyushɔn go mared dɛn na Izrɛl.

²⁹ Sansan tɛm, dɛn nɔ go ebul waka fɔ dɛnsɛf, pas dɛn go de tek tik de fɛn di rod, ɛn na so dɛn go de molɛs dɛn ɛn tif dɛn, ɛn nɔbɔdi nɔ go de fɔ ɛp dɛn. Natin nɔ go bɛtɛ na dɛn an.

³⁰ We dɛn mared, na ɔda man go lidɔm wit dɛn wɛf dɛn. If dɛn bil os o, dɛn nɔ go slip de; na ɔda man go slip de. Dɛn plant frut o, na ɔda man go pik dɛn fɔ dɛn.

³¹ Dɛn go kil dɛn yon kaw bifo dɛn, ɛn nɔ gi dɛn de. Dɛn go tek pawa tek dɛn dɔŋki dɛn ɛn nɔ gi dɛn bak. Dɛn go tek dɛn ship gi dɛn ɛnimi dɛn, ɛn nɔbɔdi nɔ go tɔk fɔ dɛn.

³² Dɛn go sɛl dɛn pikin dɛn as slev ɛn dɛn nɔ go si dɛn igen; dɛn nɔ go ebul du natin fɔ mek dat nɔ bi.

³³ Pipul dɛn we dɛn nɔ no wande, go kam it ɔl wetin dɛn wok fɔ, ɛn trit dɛn bad bad na dɛn yon kɔntri.

³⁴ Dɛn go so trit dɛn bad, dat plɛnti pan dɛn go kres.

³⁵ PAPA GƆD go mek bad bad bwɛl dɛn we nɔ de mɛn kɔmɔt na dɛn ni dɛn ɛn dɛn lɛg dɛn, ɛn bwɛl go de frɔm dɛn ed to dɛn fut.

³⁶ Mozis tɛl di Izrɛlayt dɛn se PAPA GƆD go mek dɛn kɛr dɛn ɛn dɛn kiŋ we dɛn go pik go na kɔntri we dɛn ɛn dɛn fɔstɛm-papa dɛn nɔ bin no wande, usay dɛn go go wɔship gɔd dɛn we dɛn mek wit tik ɛn ston.

³⁷ Di pipul dɛn we de na di kɔntri we PAPA GƆD go skata dɛn, go wɔnda se wetin apin to pipul lɛkɛ dɛn; dɛn go tɔk bad bɔt dɛn ɛn go laf ɛn provok dɛn.

³⁸ Lokɔs go it ɔl wetin dɛn plant na dɛn fam dɛn.

³⁹ Di frut dɛn we dɛn go plant fɔ mek wayn nɔ go bɛtɛ; tumbu go it ɔl.

⁴⁰ Di tik dɛn we kin pul ɔliv ɔyl, go gro ɔlsay na dɛn kɔntri, bɔt wan ɔyl dɛn nɔ go pul pan dɛn, bikɔs ɔl di ɔliv go dɔn fɔdɔm kɔmɔt na di tik.

⁴¹ Dɛn go bɔn pikin lɛkɛ dɛn nɔ bɔn, bikɔs dɛn go fɛt dɛn ɛn tek dɛn ɔl na dɛn an as slev.

⁴² Lokɔs go pwɛl ɔl dɛn tik dɛn, ɛn di tin dɛn we dɛn plant na dɛn fam dɛn.

⁴³ Bɛtɛ go fala di fɔrina dɛn, ɛn dɛn go gɛt pawa na dɛn land pas dɛn we gɛt dɛn land; dɛn di Izrɛlayt dɛn go jɔs de po we di fɔrina dɛn go jɔs de jɛntri.

⁴⁴ Di fɔrina dɛn go de lɛnt dɛn mɔni bɔt dɛn nɔ go ebul lɛnt di fɔrina dɛn mɔni; di fɔrina dɛn go tɔn di bigman dɛn oba dɛn.

⁴⁵ Mozis tɛl di Izrɛlayt dɛn se ɔl dɛn swɛ ya go kech dɛn ɛn de pan dɛn te dɛn ɔl day, if dɛn nɔ du ɔl wetin i dɔn tɛl dɛn se PAPA GƆD we na dɛn PAPA GƆD se, dɛn fɔ de du.

⁴⁶ Na dɛn tin dɛn de pipul dɛn go tek no se, na dɛn PAPA GƆD bin swɛ. I go sho pan dɛn pikin dɛnsɛf we nɔ bɔn yet.

⁴⁷ Bikɔs dɛn nɔ du ɔl wetin PAPA GƆD se dɛn fɔ de du, ɔl we i gi dɛn bɔku bɔku blɛsin,

⁴⁸ dɛn go wok fɔ dɛn ɛnimi dɛn, we PAPA GƆD go mek fɛt dɛn, ɛn dɛn go so trit dɛn bad, dat dɛn nɔ go gɛt bɛtɛ it fɔ it, dɛn nɔ go gɛt tin fɔ drink ɛn klos fɔ wɛr.

⁴⁹ Na pipul dɛn we de fawe PAPA GƆD go mek trit dɛn bad; pipul dɛn we kin fɔdɔm pan pipul dɛn lɛkɛ we ak kin fɔdɔm pan fɔl pikin, ɛn dɛn nɔ go sabi dɛn laŋwej.

⁵⁰ Na pipul dɛn we nɔ de laf ɛn dɛn nɔ de sɔri fɔ ol ɔ yɔŋ pɔsin.

⁵¹ Na aŋri go kil di Izrɛlayt dɛn bikɔs, di pipul dɛn go tek ɔl dɛn animal dɛn we dɛn de mɛn, dɛn pikin dɛn, ɛn ɔl wetin go gro na dɛn fam dɛn. Dɛn go tek dɛn sid dɛn we dɛn kip fɔ it, ɛn dɛn wayn, dɛn ɔyl ɛn dɛn kaw ship ɛn got dɛn; natin dɛn nɔ go lɛf fɔ dɛn.

⁵² Dɛn go atak ɔl dɛn siti dɛn te dɛn brok ɔl di wɔl dɛn we dɛn abop pan ɔlsay na di land; dɛn go kapchɔ ɔl dɛn siti dɛn na di land we PAPA GƆD we na dɛn PAPA GƆD, bin dɔn gi dɛn.

⁵³ Mozis tɛl di Izrɛlayt dɛn se, dɛn go it dɛn yon pikin dɛn we PAPA GƆD we na dɛn GƆD bin dɔn gi dɛn, we dɛn go de insay di slev layf we dɛn ɛnimi dɛn go put dɛn pan.

⁵⁴ Di man dɛn we ɔlman bin no se na gud pɔsin, we ɔlman bin rɛspɛkt se kɔmɔt na gud famili, go so gridi in brɔda, in wɛf we i lɛk, ɛn in pikin we i nɔ it yet;

⁵⁵ dat i nɔ go gi dɛn pan in pikin dɛn bif we i de it, bikɔs i nɔ go gɛt natin lɛf fɔ am fɔ it insay di slev layf we dɛn ɛnimi dɛn go dɔn put dɛn pan.

⁵⁶ Di uman dɛn we ɔlman bin rɛspɛkt se kɔmɔt na gud famili, we nɔ waka wit bia fut na grɔn wande, bikɔs na yaŋa pɔsin, go gridi in man we i lɛk, ɛn in bɔypikin ɛn in gyal pikin,

⁵⁷ di afta bath ɛn di pikin we i jɔs bɔn. I go it dɛn sikrit wan, bikɔs i nɔ gɛt natin fɔ it, ɛn aŋri de kech an bad bad wan, bikɔs dɛn ɛnimi dɛn go trit dɛn lɛkɛ slev.

⁵⁸ Mozis tɛl di Izrɛlayt dɛn igen se if dɛn nɔ du ɔl wetin PAPA GƆD we na dɛn PAPA GƆD rayt na di Lɔ buk, dat na fɔ rɛspɛkt ɛn tɔk gud tin bɔt PAPA GƆD in big big nem,

⁵⁹ PAPA GƆD go mek bad bad siknɛs dɛn we nɔ de mɛn kech dɛn ɛn dɛn pikin dɛn we nɔ bɔn yet.

⁶⁰ PAPA GƆD go mek ɔl dɛn siknɛs dɛn we dɛn de fred, dat na dɛn siknɛs dɛn we nɔ de mɛn, we i bin put pan di Ijipshian dɛn, kech dɛn, ɛn dɛn nɔ go tek mɛn.

⁶¹ I se PAPA GƆD go sɛn ɔlkayn siknɛs ɛn waala dɛn we nɔ ivin rayt na di lɔ buk, pan dɛn. Dɛn siknɛs dɛn de go kil dɛn.

⁶² Ɛnti dɛn bin bɔku lɛkɛ di sta dɛn na di skay, na tu tri pan dɛn go lɛf, bikɔs, dɛn nɔ obe PAPA GƆD we na dɛn PAPA GƆD.

⁶³ Mozis tɛl di Izrɛlayt dɛn se, lɛkɛ aw PAPA GƆD bin gladi fɔ mek dɛn jɛntri ɛn bɔn bɔku bɔku pikin dɛn, na semweso i go gladi fɔ du dɛn tin dɛn we go mek dɛn alaki ɛn day day na di land we i dɔn rɛdi fɔ gi dɛn.

⁶⁴ I tɛl dɛn se PAPA GƆD go skata dɛn ɔlsay na di wɔl, ɛn na de dɛn go wɔship dɛn tik ɛn ston gɔd dɛn, we dɛn ɛn dɛn fɔstɛm-papa dɛn nɔ ɛva no.

⁶⁵ Dɛn nɔ go gɛt kol at na fɔren land, ɛn dɛn nɔ go gɛt ples we dɛn go se na dɛn yon. PAPA GƆD go mek dɛn nɔ gɛt wan kolat. Dɛn nɔ go gɛt tɛm fɔ blo, dɛn bɔdi dɛn nɔ go fayn, ɛn na kɔtat ɛn pwɛlat nɔmɔ dɛn go de pan;

⁶⁶ Frɔm mɔnin to nɛt, dɛn at dɛn nɔ go rɛst bikɔs dɛn ɛnimi dɛn kin kil ɛnibɔdi ɛnitɛm.

⁶⁷ Kɔtat go mek we dɛn wek na mɔnin, dɛn pre lɛ ivin tɛm kam, ɛn ivintɛm, dɛn pre lɛ mɔnin kam, bikɔs di tin we dɛn go si, mɔt nɔ go ebul tɔk am.

⁶⁸ PAPA GƆD go mek dɛn kɛr dɛn go na Ijipt bak wit ship; di kayn travul we PAPA GƆD bin dɔn prɔmis dɛn se i nɔ go mek dɛn travul igen, ɛn na de dɛnsɛf go go tray fɔ sɛl dɛnsɛf as slev, bɔt nɔbɔdi nɔ go bay dɛn.