Ditarɔnɔmi 27 - Krio Fɔs Oli Baybul

Wetin Ɛn Wetin Fɔ Du Na Kenan

¹ Mozis ɛn ɔl di bigman dɛn na Izrɛl tɔk to di pipul dɛn ɛn tɛl dɛn se dɛn fɔ mek shɔ se, paopa, dɛn du ɔl wetin i bin dɔn tɛl dɛn se PAPA GƆD se, dɛn bawn fɔ du.

² I tɛl dɛn se di de we dɛn go krɔs Riva Jɔdan go na di land we PAPA GƆD we na dɛn Gɔd bin dɔn se i go gi dɛn, dɛn fɔ put big big ston dɛn lɛ dɛn tinap ɛn plasta dɛn wit simɛnt;

³ dɔn dɛn fɔ rayt ɔl di lɔ dɛn pan dɛn.

⁴ Na Ebal Mawnten dɛn fɔ put di ston dɛn ɛn rayt ɔl di lɔ dɛn. Dɛn nɔ fɔ fɔgɛt fɔ plasta di ston dɛn gud.

⁵ Dɛn fɔ bil wan ɔlta fɔ PAPA GƆD. Dɛn fɔ bil am wit ston nɔmɔ. Dɛn nɔ fɔ yuz ayɛn fɔ bil da ɔlta de.

⁶ Di ston dɛn we dɛn fɔ yuz fɔ bil PAPA PAPA GƆD in ɔlta, na ston dɛn we nɔ kɔt atɔl. Na da ɔlta de dɛn fɔ mek dɛn sakrifays dɛn we dɛn de bɔn wit faya,

⁷ ɛn na de dɛn fɔ it dɛn yon pan da sakrifays we na af pat pan di animal nɔmɔ dɛn de bɔn na di faya, ɛn dɛn it di balans. Na usay PAPA GƆD we na dɛn PAPA GƆD go pik fɔ mek sakrifays to am ɛn wɔship am, dɛn fɔ sɛlibret.

⁸ Mozis tɛl dɛn se dɛn fɔ rayt ɔl di lɔ dɛn na di ston dɛn we i bin tɛl dɛn fɔ put fɔ tinap, ɛn dɛn fɔ mek shɔ se dɛn rayt am klia wan.

⁹ Afta dat, Mozis ɛn di man dɛn we de mek sakrifays fɔ pipul sin we kɔmɔt na di Livayt fambul, tɛl di Izrɛlayt dɛn se lɛ dɛn lisin wetin dɛn de kam tɛl dɛn. Dɛn tɛl dɛn se, dɛn dɔn bi PAPA GƆD we na dɛn PAPA GƆD in yon pipul dɛn.

¹⁰ Dɛn fɔ du ɔl wetin i dɔn tɛl dɛn tide se, PAPA GƆD we na dɛn PAPA GƆD se, dɛn fɔ de du.

Di Swɛ De Fɔ Udat Nɔ Du Wetin PAPA GƆD Se

¹¹ Mozis wɔn di Izrɛlayt dɛn ɛn tɛl dɛn traŋa wan se,

¹² we dɛn krɔs Riva Jɔdan, Simiɔn, Livay, Juda, Isaka, Josɛf ɛn Bɛnjamin, fɔ tinap na Garizim Mawnten fɔ blɛs ɔl di pipul dɛn.

¹³ I se Rubɛn, Gad, Asha, Zɛbyulɔn, Dan ɛn Naftali, dɛn fɔ tinap na Ebal Mawnten fɔ swɛ di swɛ.

¹⁴ Di livayt dɛn go tɔk lawd wan lɛ ɔlman yɛri, ɛn dɛn go tɔk se:

¹⁵ “ ‘Ɛnibɔdi we go mek ɛnitin wit tik, ston ɔ ayɛn de wɔship am na kɔna, lɛ PAPA GƆD mek bad bad tin mit am. ‘Ɔlman fɔ ansa, Emɛn!’

¹⁶ “ ‘Ɛni pikin we go du ɛnitin we go mek in mami ɛn dadi shem na pɔblik, lɛ PAPA GƆD mek bad bad tin mit am.’ ‘Dɔn ɔlman fɔ ansa, Emɛn!’

¹⁷ “ ‘Ɛnibɔdi we push in neba in bawndri mak go biɛn, lɛ PAPA GƆD mek bad bad tin mit am. “Dɔn Ɔlman fɔ ansa, ‘Emɛn!’

¹⁸ “ ‘Ɛnibɔdi we go kɛr blɛn yay pɔsin go usay i nɔ se in wan go, lɛ PAPA GƆD mek bad bad tin mit am,’ “Dɔn ɔlman fɔ ansa, ‘Emɛn!’

¹⁹ “ ‘Ɛnibɔdi we go tek advantej pan trenja, dɛn pikin dɛn we dɛn mami ɛn dadi dɔn day, ɛn dɛn uman dɛn we dɛn man dɔn day, lɛ PAPA GƆD mek bad bad tin mit am. “Dɔn ɔlman fɔ ansa se, “Emɛn”

²⁰ “ ‘Ɛnibɔdi we lidɔm wit in papa in wɛf, lɛ PAPA GƆD mek bad bad tin mit am.’ “Dɔn ɔlman fɔ ansa se, ‘Emɛn!’

²¹ “ ‘Ɛni bɔdi we go lidɔm wit animal, lɛ PAPA GƆD mek bad bad tin mit am.’ “Dɔn ɔlman fɔ ansa se, ‘Emɛn!’

²² “ ‘Ɛnibɔdi we lidɔm wit in sista, in papa in gyal pikin ɔ in mama in gyal pikin, lɛ PAPA GƆD mek bad bad tin mit am.’ “Ɔlman fɔ ansa se, ‘Emɛn!’

²³ “ ‘Ɛnibɔdi we lidɔm wit in mɔdɛnlɔ, lɛ PAPA GƆD mek bad bad tin mit am.’ “ ‘Ɔlman fɔ ansa se, ‘Emɛn!’

²⁴ “ ‘Ɛnibɔdi we kil in kɔmpin sikrit wan, lɛ PAPA GƆD mek bad bad tin mit am.’ “Dɔn ɔlman fɔ ansa se, ‘Emɛn!’

²⁵ “ ‘Ɛnibɔdi we go gri fɔ tek mɔni fɔ kil pɔsin we nɔ du am natin, lɛ PAPA GƆD mek bad bad tin mit am.’ “ ‘Ɔlman fɔ ansa se, ‘Emɛn!’

²⁶ “ ‘Ɛnibɔdi we nɔ du ɔl wetin PAPA GƆD in lɔ dɛn se, lɛ PAPA GƆD mek bad bad tin mit am. “Ɔlman fɔ ansa se, ‘Emɛn!’