Ditarɔnɔmi 26 - Krio Fɔs Oli Baybul

Di Fɔs Pat Pan Wetin Dɛn Avɛst

¹ Mozis tɛl di Izrɛlayt dɛn se we dɛn go dɔn kapchɔ di land ɛn dɔn sidɔm gud na di land we PAPA GƆD we na dɛn PAPA GƆD go gi dɛn as dɛn yon prɔpati,

² dɛn fɔ put di fɔs frut dɛn we dɛn go pik na di difrɛn kayn frut tik dɛn, na blay, ɛn kɛr dɛn go na di ples we PAPA GƆD we na dɛn PAPA GƆD, go pik fɔ de mek sakrifays to am ɛn wɔship am.

³ Dɛn fɔ go to di man we de mek sakrifays fɔ pipul sin da tɛm de ɛn tɛl am se, in kam tɛl PAPA GƆD we nain PAPA GƆD se in de na di land we i bin dɔn swɛ to dɛn fɔstɛmpapa dɛn se, i go gi dɛn.

⁴ Di man we de mek sakrifays fɔ pipul sin go tek di blay na dɛn am ɛn put am na di ɔlta bifo PAPA GƆD we na dɛn PAPA GƆD.

⁵ Dɔn dɛn go tinap bifo di ɔlta ɛn tɔk bifo PAPA GƆD we na dɛn PAPA GƆD se, dɛn fɔstɛmpapa na bin Aramian man we bin jɔs de waka waka ɔlsay na di wɔl. So i waka waka te in ɛn tu tri in fambul dɛn, go Ijipt go tap de, bɔt dɛn nɔ bin bɔku. Bɔt dɛn bin kam bɔku aftawɔd lɛkɛ anch, ɛn ɔlman bin yɛri bɔt dɛn ɛn bin bigin fred dɛn.

⁶ Bɔt di Ijipshian dɛn nɔ bin trit dɛn gud atɔl; dɛn bin tɔn dɛn slev, bit dɛn ɛn mek dɛn wok fɔ dɛn lɛk dɔg.

⁷ So dɛn bin pre to PAPA GƆD we na dɛn fɔstɛmpapa dɛn PAPA GƆD, ɛn i bin si ɔl wetin dɛn bin de pas.

⁸ So PAPA GƆD bin yuz in pawa mek ɔlkayn mirekul, sayn ɛn tin dɛn we bin mek pipul dɛn wɔnda, we mek di Ijipshian dɛn fred ɛn lɛf dɛn fɔ go.

⁹ Afta dat, PAPA GƆD bin kɛr dɛn go na da ples de ɛn gi dɛn da land de; di land we gud fɔ plant ɛn fɔ mɛn animal.

¹⁰ Na dat mek insɛf dɔn kɛr di fɔs tin dɛn we PAPA GƆD mek gro nain fam. We dɛn dɔn tɔk ɔl dat, dɛn fɔ put di blay dɔŋ na di ɔlta bifo PAPA GƆD, dɔn dɛn fɔ wɔship PAPA GƆD de wantɛm;

¹¹ dɛn fɔ gladi fɔ ɔl di gud tin dɛn we i dɔn gi dɛn ɛn ɔl udat de na dɛn os dɛn, dɛn ɛn di Livayt dɛn, ɛn di trenja dɛn we de wit dɛn.

¹² Mozis tɛl di Izrɛlayt dɛn se, we dɛn dɔn pe ɔl dɛn tayth we di ia fɔ pa tayth rich, dat na wan tɛnth pan di ɛvri tri ia avɛst, to di Livayt dɛn, di trenja dɛn, dɛn pikin dɛn we dɛn mami ɛn dadi dɔn day ɛn di uman dɛn we dɛn man dɔn day, fɔ lɛ dɛn it ɛn bɛlful usay dɛn de,

¹³ datɛnde, dɛn fɔ tɛl PAPA GƆD se, nɔn pan di tin dɛn we dɛn fɔ tayth nɔ lɛf na dɛn os; dɛn dɔn gi di Livayt, di fɔrina dɛn, di pikin dɛn we dɛn mami ɛn dadi dɛn dɔn day, ɛn dɛn uman dɛn we dɛn man dɔn day, jɔs lɛkɛ we PAPA GƆD se dɛn fɔ du, ɛn dɛn nɔ bin fɔgɛt fɔ du ɔl wetin PAPA GƆD se dɛn fɔ du.

¹⁴ Dɛn nɔ bin tek natin pan dɛn we dɛn bin gɛt bɛrin ɛn dɛn nɔ bin tɔch dɛn we dɛn nɔ bin klin na PAPA GƆD in yay, ɛn dɛn nɔ sakrifays natin pan am to dayman. Dɛn dɔn du ɔl wetin PAPA GƆD bin se dɛn fɔ du we gɛt fɔ du wit di tayth, we dɛn fɔ giwe pan ɔltin we dɛn kɔt na dɛn fam.

¹⁵ We PAPA GƆD de nain oli os na ɛvin, i de si dɛn; luk Izrɛl, dɛn nain yon pikin dɛn. Duya, blɛs dɛn ɛn mek dɛn layf bɛtɛ. PAPA GƆD bin prɔmis dɛn fɔstɛm-papa dɛn se i go gi dɛn land we gud fɔ plant ɛn fɔ mɛn animal.

PAPA GƆD In Yon Pipul Dɛn

¹⁶ Mozis tɛl di Izrɛl pipul dɛn se, da de de, PAPA GƆD we na dɛn PAPA GƆD bin se, dɛn fɔ mek shɔ se dɛn obe di lɔ dɛn ɛn du ɔl wetin i se wit ɔl dɛn at ɛn dɛn sol.

¹⁷ I se da de de, dɛn di Izrɛlayt bin tɛl PAPA GƆD se, nain na dɛn GƆD, ɛn dat dɛn go du ɔl wetin i se dɛn fɔ de du.

¹⁸ PAPA GƆD insɛf dɔn gri se dɛn nain yon pipul dɛn lɛkɛ we i bin dɔn prɔmis dɛn se, in go du, ɛn i dɔn tɛl dɛn traŋa wan se, dɛn fɔ du ɔl wetin i dɔn se dɛn fɔ de du.

¹⁹ Mozis tɛl dɛn se, PAPA GƆD dɔn prɔmis dɛn se, in go mek Izrɛl shayn na di wanol wɔl; i go mek dɛn gɛt pawa pas ɔl ɔda neshɔn dɛn na di wɔl, dɛn go yɛri bɔt dɛn, tɔk dɛn gud nem, ɛn rɛspɛkt dɛn ɔlsay na di wɔl.