Ditarɔnɔmi 24 - Krio Fɔs Oli Baybul

Di Lɔ Dɛn Fɔ Mared Ɛn Dayvɔs

¹ Mozis tɛl di Izrɛlayt dɛn se if man mared uman, leta, in at nɔ tek am igen, bikɔs i nɔ de biev lɛkɛ mared uman, dɔn di man rayt pepa se i nɔ want di uman fɔ bi in wɛf igen, ɛn sɛn di uman go bak to in pipul dɛn,

² we di uman go, ɔda man go si am ɛn mared am,

³ dɔn dis nyu man sɛf rayt pepa se i nɔ want am igen, ɔ di man day,

⁴ da man we bin dɔn dayvɔs di uman fɔs nɔ fɔ tek da uman de fɔ bi in wɛf igen, bikɔs i go dɔn tɔn uman we nɔ klin na PAPA GƆD in yay igen fɔ mared; na tin we PAPA GƆD et bad bad wan, so dɛn nɔ fɔ du dɛn kayn tin dɛn de lɛ dɛn nɔ briŋ sin na di land we PAPA GƆD we na dɛn PAPA GƆD go gi dɛn.

Ɔda Lɔ Dɛn

⁵ Mozis tɛl di Izrɛlayt dɛn se we pipul dɛn mared, fɔ di fɔs wan ia, di man nɔ fɔ go fɛt wit di ami ɔ go pan ɛni ɔda biznɛs we go mek i go lɛf in wɛf. I fɔ de na os wit in wɛf fɔ mek dɛn at swit.

⁶ I tɛl dɛn igen se if dɛn kɔmpin Izrɛlayt wan lɛf ɛnitin gi dɛn lɛ dɛn go lɛnt am mɔni ɔ ɔda tin, dɛn nɔ fɔ gri lɛ i lɛf tin we go mek dɛn nɔ ebul kuk. I se, dɛn nɔ fɔ tek am, bikɔs na layf dɛn go de tek so.

⁷ Mozis se if dɛn kech ɛnibɔdi we kech in kɔmpin Izrɛlayt, trit lɛk slev ɔ de tray fɔ sɛl am, dɛn fɔ kil am. I se dɛn fɔ kil am lɛ da swɛ de nɔ go de pan dɛn ɛn lɛ nɔbɔdi nɔ go tray fɔ du dat igen

⁸ If ɛnibɔdi gɛt da bad sik na bɔdi we dɛn kɔl lɛprɔsi, i fɔ du ɔl wetin di man dɛn we de mek sakrifays fɔ pipul sin se, dɛn fɔ du. I se dɛn go tɛl dɛn fɔ du ɔl wetin in bin dɔn tɛl di man dɛn we de mek sakrifays fɔ pipul sin, fɔ tɛl di pipul dɛn we gɛt da bad sik na bɔdi, so dɛn fɔ mek shɔ se, dɛn du ɔl wetin di man dɛn we de mek sakrifays fɔ pipul sin, se.

⁹ I se dɛn fɔ mɛmba wetin PAPA GƆD we na dɛn PAPA GƆD bin du Miriam we dɛn bin jɔs kɔmɔt Ijipt.

¹⁰ Mozis tɛl di Izrɛlayt dɛn se we dɛn de lɛnt dɛn brɔda ɛnitin, dɛn nɔ fɔ go insay in os go tek di tin we i go gi dɛn fɔ ol te i pe dɛn bak.

¹¹ I se dɛn fɔ wet am na do lɛ insɛf go briŋ am kam gi dɛn.

¹² If na po man, ɛn nain kot we i de tek slip i wan gi dɛn fɔ ol fɔ di tin we dɛn lɛnt am,

¹³ dɛn fɔ gi am in kot ɛvri ivintɛm lɛ i go gɛt am fɔ de slip. Mozis tɛl dɛn se PAPA GƆD we na dɛn PAPA GƆD go blɛs dɛn fɔ dat.

¹⁴ Mozis tɛl dɛn igen se dɛn nɔ fɔ trit wokman bad bikɔs i po, ɛn i want mɔni, wɛda na Izrɛlayt ɔ na trenja we de na di siti dɛn na di land.

¹⁵ I se dɛn no se po man abop pan wetin i go gɛt fɔ di de, so if dɛn nɔ pe am, i go kray to PAPA GƆD tɛl am bɔt dɛn, ɛn PAPA GƆD go lisin to am, ɛn na dɛn go gɛt di sin.

¹⁶ Mozis tɛl dɛn igen se mami ɛn dadi nɔ fɔ day fɔ wetin dɛn pikin dɛn du, ɛn pikin dɛn nɔ fɔ day fɔ wetin dɛn mami ɛn dɛn dadi dɛn du. Ɔlman fɔ day fɔ in yon sin.

¹⁷ I tɛl dɛn fɔ mek shɔ se nɔbɔdi nɔ tek advantej pan pɔsin bikɔs na trenja, ɔ dɛn pikin we dɛn mami ɛn dadi dɔn day, ɛn wɔn dɛn nɔ fɔ tek uman we in man dɔn day in klos we i de tek slip fɔ ol fɔ mɔni we i go wan lɛnt,

¹⁸ bɔt fɔ mɛmba se dɛnsɛf na bin slev na Ijipt, ɛn na PAPA GƆD we na dɛn PAPA GƆD, bin pul dɛn kɔmɔt de. I se paopa, dɛn fɔ de du dɛn kayn gud tin dɛn de.

¹⁹ Mozis se we dɛn kɔt dɛn rɛs, pik dɛn kɔn ɛn ɔda tin dɛn na dɛn fam, ɛn dɔn kɛr dɛn go usay dɛn de kip dɛn, dɛn nɔ fɔ tɔn bak go tek di wan dɛn we dɛn nɔ bin ebul kɔt ɛn kɛr go; dɛn fɔ lɛf dɛn fɔ di trenja dɛn we de wit dɛn, fɔ dɛn pikin we dɛn mami ɛn dadi dɔn day ɛn dɛn uman we dɛn man dɔn day. I se PAPA GƆD we na dɛn PAPA GƆD go blɛs dɛn fɔ dat.

²⁰ We dɛn go dɔn pik di ɔliv dɛn na dɛn ɔliv tik dɛn dɔn, ɛn dɔn gɛda dɛn go, dɛn nɔ fɔ go bak go pik di wan dɛn we nɔ bin fɔdɔm. Dɛm fɔ lɛf dɛn fɔ di trenja dɛn we de wit dɛn, di pikin dɛn we dɛn mami ɛn dadi dɔn day, ɛn dɛn uman we dɛn man dɔn day.

²¹ We dɛn dɔn pik dɛn greps dɛn na dɛn greps tik dɛn dɔn, ɛn dɔn gɛda dɛn go, dɛn nɔ fɔ go bak fɔ go pik di wan dɛn we dɛn nɔ bin ebul pik. Dɛn fɔ lɛf dɛn fɔ di trenja dɛn we de wit dɛn, dɛn pikin we dɛn mami ɛn dadi dɔn day ɛn dɛn uman we dɛn man dɔn day.

²² Mozis tɛl dɛn se dɛn fɔ de mɛmba ɔltɛm se, dɛn na bin slev na Ijipt, ɛn na dat mek in se, dɛn fɔ de du dɛn gud tin dɛn de.