Ditarɔnɔmi 23 - Krio Fɔs Oli Baybul

Udat Nɔ Fɔ De Na PAPA GƆD In Pipul Dɛn Mitin

¹ Mozis tɛl di Izrɛlayt dɛn se dɛn kayn pipul dɛn ya nɔ fɔ de na PAPA GƆD in pipul dɛn mitin: ɛni man we na okobo, we bi bay aksidɛnt ɔ we i bin de fɛt na wa.

² Ɛnibɔdi we in papa nɔ mared in mama, ɔ in papa nain mama in brɔda, ɔ in mama nɔto ju, te to di tɛn jɛnareshɔn, dɛn nɔ fɔ de na PAPA GƆD in pipul dɛn mitin dɛn.

³ Di Amonayt ɛn di Moabayt dɛn, te to di tɛn jɛnareshɔn, nɔ fɔ de na PAPA GƆD in pipul dɛn mitin,

⁴ bikɔs dɛn nɔ bin gi di Izrɛlayt dɛn wata ɛn tin fɔ it we dɛn bin de kɔmɔt Ijipt, bifo dat, dɛn bin go tek Belam, Bɛɔ we kɔmɔt Pɛtɔ na Mɛsopotemia in pikin, ɛn pe am fɔ put swɛ pan dɛn.

⁵ PAPA GƆD we na dɛn PAPA GƆD bin lɛk dɛn so i nɔ bin lisin to Belam, bifo dat, PAPA GƆD we na dɛn PAPA GƆD bin tɔn di swɛ to blɛsin.

⁶ Dɛm nɔ fɔ mek dɛn padi, ɛn dɛn nɔ fɔ du natin fɔ ɛp dɛn fɔ mek dɛn go bɛtɛ.

⁷ Mozis tɛl di Izrɛlayt dɛn se, dɛn nɔ fɔ luk dɔŋ pan di Idɔmayt dɛn, bikɔs dɛn na dɛn fambul. Di Ijipshian dɛn na ɔda wan dɛn we dɛn nɔ fɔ luk dɔŋ pan; I se dɛn fɔ mɛmba se dɛn bin dɔn de na dɛn kɔntri.

⁸ Di Izrɛlayt dɛn fɔ gri mek di Ijipshian ɛn di Idɔmayt dɛn grampikin dɛn we bɔn na Izrɛl de na PAPA GƆD in pikin dɛn mitin.

Sin Nɔ Fɔ De Na Sojaman Kamp

⁹ Mozis tɛl di Izrɛlayt dɛn se we dɛn go fɔ go fɛt, ɛn dɛn de na kamp, dɛn fɔ mek shɔ se dɛn nɔ du ɛnitin we go mek dɛn gɛt sin.

¹⁰ If ɛni sojaman du sɔntin na nɛt we mek i nɔ klin bifo PAPA GƆD, da sojaman de fɔ kɔmɔt na di kamp tret,

¹¹ bɔt i fɔ was in bɔdi fayn bifo san go dɔŋ, ɛn we di san dɔn go dɔŋ, i kin go bak insay di kamp.

¹² Mozis tɛl dɛn se dɛn fɔ mek shɔ se dɛn nɔ bil latrin insay di kamp; dɛn fɔ bil am na do usay dɛn go de go pis ɛn go na yad.

¹³ Dɛm fɔ mek shɔ se dɛn ɔl gɛt tik as pat ɔf dɛn wɛpɔn dɛn, we dɛn go tek dig we dɛn wan go na yad. We dɛn dɔn, dɛn fɔ kɔba di ol bak.

¹⁴ I tɛl dɛn se di kamp nɔ fɔ gɛt natin we go mek i nɔ klin na PAPA GƆD in yay, bikɔs PAPA GƆD we na dɛn PAPA GƆD go de wit dɛn ɔltɛm, fɔ de sev dɛn ɛn fɔ mek dɛn ebul fɔ de bit dɛn ɛnimi dɛn. So dɛn nɔ fɔ mek i si ɛnitin we go mek i vɛks kɔmɔt biɛn dɛn.

Ɔda Lɔ Dɛn

¹⁵ Mozis tɛl di Izrɛlayt dɛn se if slev rɔnawe kɔmɔt na ɔda kɔntri kam to dɛn, dɛn nɔ fɔ sɛn am go bak to in masta;

¹⁶ dɛn fɔ gri mek i de wit dɛn na di siti we in go lɛk fɔ de, ɛn nɔbɔdi nɔ fɔ ambɔg am ɔ trit am bad.

¹⁷ Mozis tɛl di Izrɛlayt dɛn se, nɔn pan dɛn, man o uman o, we de na Izrɛl, nɔ fɔ sɛl dɛn bɔdi fɔ mɔni na nɔn pegan gɔd os.

¹⁸ Nɔbɔdi, man o, uman o, we de sɛl in bɔdi fɔ mɔni, nɔ fɔ kɛr di mɔni we i gɛt pan di rare wok go na PAPA GƆD we na dɛn PAPA GƆD in os, fɔ go pe fɔ di tin dɛn we dɛn bin prɔmis fɔ pe fɔ. PAPA GƆD we na dɛn PAPA GƆD et dɛn kayn pipul dɛn de bad bad wan.

¹⁹ Nɔbɔdi nɔ fɔ put intrɛst pan ɛnitin we i go lɛnt in kɔmpin Izrɛlayt; mɔni o, it o, ɛnitin, dɛn nɔ fɔ put intrɛst de atɔl.

²⁰ If na fɔrina, dɛn kin put intrɛst, bɔt dɛn nɔ fɔ put intrɛst pan ɛnitin we dɛn go lɛnt dɛn brɔda, so PAPA GƆD we na dɛn PAPA GƆD go blɛs dɛn pan ɔl wetin dɛn go put dɛn an pan na di land we dɛn de kam go kapchɔ.

²¹ Mozis wɔn dɛn nɔ fɔ swɛ to PAPA GƆD we na dɛn PAPA GƆD se, dɛn go du sɔntin ɛn westɛm fɔ du an, bikɔs PAPA GƆD we na dɛn PAPA GƆD go mɔs de ɛkspɛkt dɛn fɔ du am, ɛn if dɛn nɔ du wetin dɛn bin dɔn se dɛn go du, dɛn go gɛt sin.

²² I if dɛn nɔ swɛ to PAPA GƆD fɔ gi ɔ du sɔntin, dɛn nɔ go gɛt sin fɔ dat.

²³ I advays dɛn fɔ du ɛnitin we dɛn dɔn opin dɛn mɔt swɛ to PAPA GƆD we na dɛn PAPA GƆD se, dɛn go gi ɔ du.

²⁴ Mozis tɛl di Izrɛlayt dɛn se we dɛn go na dɛn kɔmpin dɛn greps fam, dɛn fri fɔ it in greps te dɛn bɛlful sɛf, bɔt dɛn nɔ fɔ put na bag kɛr go na dɛn os.

²⁵ If dɛn go na dɛn kɔmpin in kɔn fam, dɛn kin pul ɔmɔs kɔn sid dɛn ebul fɔ cham, bɔt dɛn nɔ fɔ kɔt di kɔn kɔmɔt na di tik fɔ kɛr go na dɛn os.