Ditarɔnɔmi 22 - Krio Fɔs Oli Baybul

¹ Mozis tɛl di Izrɛlayt dɛn se dɛn nɔ fɔ si dɛn brɔda in man kaw ɔ in ship dɛn de go usay dɛn nɔ fɔ go, ɛn se dat nɔto dɛn biznɛs; dɛn fɔ kɛr dɛn go bak usay dɛn kɔmɔt.

² I tɛl dɛn se if di pɔsin we gɛt dɛn de fa, ɔ dɛn nɔ no udat gɛt dɛn, dɛn fɔ kip dɛn na dɛn yon os te di wan we gɛt dɛn, tɔk se in ship ɔ kaw lɔs. We i aks, dɛn fɔ gi am.

³ Mozis se na dat dɛn fɔ du fɔ ɛnitin we dɛn fɛn we nɔto dɛn yon; dɔŋki, klos, ɛnitin, wans na dɛn kɔmpin Izrɛlayt gɛt am, dɛn nɔ fɔ se nɔto dɛn biznɛs.

⁴ I tɛl dɛn igen se if dɛn si dɛn kɔmpin Izrɛlayt in dɔŋki ɔ in man kaw fɔdɔm na rod, dɛn nɔ fɔ se nɔto dɛn biznɛs; dɛn fɔ ep am es am.

⁵ Mozis tɛl di Izrɛlayt dɛn se di uman dɛn nɔ fɔ wɛr man klos, ɛn di man dɛn nɔ fɔ wɛr uman klos, bikɔs na wan pan di bad bad tin dɛn we PAPA GƆD we na dɛn PAPA GƆD, et.

⁶ Mozis tɛl dɛn igen se, if dɛn si bɔd os na tik ɔ na grɔn, we di mami sidɔm nain eg ɔ butu pan in pikin dɛn, dɛn nɔ fɔ tek di pikin dɛn ɛn dɛn mami togɛda;

⁷ dɛn kin tek di pikin dɛn, bɔt dɛn fɔ lɛf di mami lɛ i go, so dat nɔn prɔblɛm nɔ go mit di Izrɛlayt dɛn, ɛn dɛn go gɛt lɔŋ layf.

⁸ I tɛl dɛn se we dɛn de bil nyu os, dɛn fɔ mek shɔ se dɛn mek relin rawnd di ruf, bikɔs if pɔsin fɔdɔm kam dɔŋ ɛn day, in blɔd go de na dɛn ed.

⁹ I se we dɛn de plant, dɛn nɔ fɔ plant ɛni ɔda frut na di sem fam wit di greps plant dɛn. If ɛnibɔdi du dat, dɛn fɔ siz di fam ɛn kɛr ɔl di frut dɛn go na PAPA GƆD in os, we dɛn bia.

¹⁰ Mozis se dɛn nɔ fɔ tay dɔŋki ɛn kaw togɛda na wan mashin we dɛn de dig dɛn fam.

¹¹ Dɛm nɔ fɔ wɛr klos we dɛn miks wul ɛn linin mek.

¹² Dɛm fɔ so lɔŋ trɛd dɛn na di fo kɔna na di klos we dɛn kin wɛr pantap dɛn klos.

Di lɔ Dɛn Fɔ Lidɔm Biznɛs

¹³ If ɛnibɔdi mared uman ɛn nɔ kam lɛk am igen afta i dɔn lidɔm wit am,

¹⁴ ɛn bikɔs i nɔ lɛk am igen, i de tɔk se di uman nɔto bin vajin we i bin mared am, fɔ gi am bad nem ɛn mek i shem,

¹⁵ di uman in pipul dɛn fɔ kɛr di bedshit we gɛt di blɔd sten we di man bin tek dɛn pikin in vajin, go na di kot os, go sho di bigman dɛn na di siti.

¹⁶ Di uman in papa fɔ tɛl di bigman dɛn na di siti se i bin gi di man in gyal pikin fɔ mared, bɔt naw i se i nɔ want am igen,

¹⁷ ɛn i dɔn mek in gyal pikin dɔn shem we i de tɔk se, in gyal pikin nɔto bin vajin we i bin mared am. We i dɔn tɔk so dɔn, di dadi fɔ prɛd di bedshit we bin prɛd na di bed wɛn di man bin tek in vajin, bifo di bigman dɛn na di siti, ɛn tɛl dɛn se, dat na di pruf se na lay di man de lay.

¹⁸ Mozis se di bigman dɛn na di siti fɔ kech di man we lay pan in wɛf ɛn bit am gud wan,

¹⁹ ɛn i fɔ pe in wɛf in papa wan ɔndrɛd silva kɔpɔ, bikɔs i dɔn mek wan Izrɛlayt vajin, shem. Di uman fɔ stil bi in wɛf te dɛn day.

²⁰ Bɔt if di uman in papa nɔ ebul pruv se di uman na bin vajin we di man bin mared am,

²¹ dɛn fɔ pul am kɔmɔt insay in papa in os, briŋ am kam na do, ɛn ston am te i day, bikɔs na shemful tin i bin du we i bin dɔn lidɔm wit man insay Izrɛl we nɔ bin mared am. Mozis tɛl dɛn se na so dɛn go ebul mek di swɛ fɔ dɛn kayn tin dɛn de, kɔmɔt na Izrɛl.

²² Mozis tɛl dɛn igen se if dɛn kech ɛni man de lidɔm wit in kɔmpin in wɛf, dɛn fɔ kil dɛn tu. I se na so dɛn go ebul pul di swɛ fɔ dɛn kayn tin dɛn de kɔmɔt na Izrɛl.

²³ If dɛn kech ɛni man lidɔm wit vajin gial we ɔda man dɔn ɛŋej,

²⁴ Mozis se dɛn fɔ tek dɛn tu kɔmɔt insay di siti, kɛr dɛn go na do pas di get, ɛn ston dɛn te dɛn day. Dɛm fɔ kil di uman bikɔs i nɔ ala we di man wan bin wan lidɔn wit am, we min se i bin gri, ɛn di man, bikɔs i lidɔm wit uman we in kɔmpin bin dɔn ɛŋej. Na so dɛn go ebul pul dɛn kayn swɛ dɛn de kɔmɔt na Izrɛl.

²⁵ Bɔt if na kes we di man mit uman we dɔn ɛŋej na dɛn ples we nɔ de nia siti, grip am ɛn rep am, na di man nɔmɔ dɛn fɔ kil.

²⁶ I se dɛn nɔ fɔ du di uman natin bikɔs, i nɔ du natin we fɔ mek dɛn kil am. Na kes we tan lɛk we pɔsin atak in neba ɛn kil am.

²⁷ Mozis ɛksplen to di Izrɛlayt dɛn se, kes lɛk dat, di gial we dɔn ɛŋej nɔ gɛt blem, bikɔs nɔn siti nɔ bin de nia di ples we di man rep an, ɛn nɔbɔdi nɔ bin de fɔ ɛp am ɔl we i bin de ala.

²⁸ I tɛl di Izrɛlayt dɛn igen se, ɛnibɔdi we rep yɔŋ gyal we nɔ ɛŋej yet,

²⁹ fɔ pe di yɔŋgyal in papa fifti Silva kɔpɔ, ɛn i fɔ mared am bikɔs i dɔn tek in vajin bay fos, ɛn i fɔ bi in wɛf te dɛn day.

³⁰ I wɔn dɛn se nɔbɔdi nɔ fɔ mared ɔ lidɔm wit in papa in wɛf ɔ ɛni uman we in papa gɛt, bikɔs dat go briŋ shem ɛn disgres to in papa.