Ditarɔnɔmi 21 - Krio Fɔs Oli Baybul

Wetin Fɔ Du Fɔ Wit Dedebɔdi We Nɔbɔdi Nɔ No Aw I Day

¹ Mozis tɛl di Izrɛlayt dɛn se we dɛn go dɔn tap na di land we PAPA GƆD we na dɛn PAPA GƆD go gi dɛn, ɛni dedebɔdi we dɛn fɛn na trit we nɔto insay ɛni siti, ɛn dɛn nɔ no udat kil am,

² di jɔj dɛn ɛn di ɔda bigman dɛn na di siti dɛn nia usay di dedebɔdi lidɔm, fɔ go de, ɛn mɛnshɔ di grɔn fɔ no us siti di de de bɔdi de nia pas ɔl,

³ dɔn di bigman dɛn we de na di siti we di dedebɔdi de nia pas ɔl, go tek wan yɔŋ kaw we dɛn nɔ mek du ɛni wok yet,

⁴ ɛn kɛr am go na ɛni vali we wata de rɔn ɛn dɛn nɔ plant wande, ɛn twis in nɛk te i day.

⁵ Bikɔs na di Livayt dɛn PAPA GƆD we na dɛn PAPA GƆD dɔn pik fɔ mek sakrifays fɔ pipul sin ɛn pre fɔ blɛsin, na dɛn fɔ tɔk di kes; wetin dɛn se, nɛf kɔt.

⁶ Afta dat, ɔl di bigman dɛn we de na di siti we di dedebɔdi bin de nia pas ɔl, go was dɛn an oba di yɔŋ kaw we dɛn bin dɔn brok in nɛk na di vali.

⁷ We dɛn de was dɛn an, dɛn fɔ tɔk se nɔto dɛn kil di pɔsin we day ɛn dɛn nɔ bin si we dɛn de kil am.

⁸ So PAPA GƆD, fɔgiv Izrɛl, yu yon pipul dɛn we yu pul na Ijipt, ɛn nɔ mek di sin fɔ di kil we dɛn kil da pɔsin de, kam pan Izrɛl, duya, sɔri fɔ Izrɛl.

⁹ Mozis tɛl dɛn se, we dɛn du wetin PAPA GƆD se dɛn fɔ du, dɛn go ebul pul da kayn sin de kɔmɔt na dɛn land.

Aw Fɔ Trit Uman Prizina Afta Wa

¹⁰ Mozis tɛl dɛn se ɛnitɛm we dɛn fɛt ɛn PAPA GƆD mek dɛn kapchɔ dɛn ɛnimi dɛn,

¹¹ ɛn if sɔmbɔdi si ɛni fayn uman pan dɛn we i want fɔ wɛf,

¹² i kin tek am go nain os, ɛn di uman go krep ɔl in ia nain ed, ɛn kɔt ɔl in fiŋanel ɛn tonel.

¹³ I fɔ chenj da klos we i bin wɛr we dɛn bin kapchɔ am ɛn i fɔ munin fɔs fɔ in mama ɛn papa fɔ wan mɔnt, bifo di man go mared am. Dɛn go bi man ɛn wɛf.

¹⁴ Bɔt if di man si se i nɔ want am fɔ wɛf igen afta dat, di man fɔ lɛf am lɛ i go usay i want fɔ go; i nɔ go rayt fɔ sɛt am ɔ trit am lɛkɛ slev afta i dɔn mek i shem.

¹⁵ Mozis tɛl di Izrɛlayt dɛn se, ɛnibɔdi we gɛt tu wɛf we na wan i lɛk pan dɛn tu, ɛn dɛn tu bɔn bɔypikin dɛn fɔ am, bɔt na di wan we i nɔ lɛk bɔn di fɔs-bɔy-pikin,

¹⁶ we i de sheb in prɔpati, i nɔ fɔ gi di uman we i lɛk in yon fɔs-bɔy-pikin, di fɔs-bɔy-pikin pawa, bikɔs na di uman we i nɔ lɛk in yon fɔs-bɔy-pikin na di big wan.

¹⁷ I fɔ trit di uman we i nɔ lɛk, in yon fɔs-bɔy-pikin as di big wan, so i fɔ sheb in prɔpati tri pat, ɛn gi am tu pat, bikɔs nain fɔs mek ɔlman no se in papa ebul bɔn bɔypikin. Nain gɛt di fɔs-bɔy-pikin pawa.

Aw Fɔ Trit Bɔy Pikin We Traŋayes

¹⁸ Mozis tɛl di Izrɛlayt dɛn se if ɛnibɔdi gɛt bɔypikin we traŋayes bad bad wan, ɛn i nɔ de yɛri in mami ɛn dadi wɔd ɔl we dɛn dɔn bit bit am,

¹⁹ in mami ɛn dadi fɔ kɛr am go to di bigman dɛn na di famili dɛn na di kot os na dɛn siti get.

²⁰ We dɛn kɛr am go de, dɛn fɔ tɛl di bigman dɛn na di famili dɛn se, da dɛn bɔypikin de nɔ de yɛri dɛn wɔd; i jɛs de du wetin i want. I de it ɛn drink drɔnk bɔku bɔku wan.

²¹ As dɛn tɔk dat so, ɔl di man dɛn we de na di siti fɔ ston am te i day. I se, dat go mek dɛn go de pul di bad tin dɛn kɔmɔt na Izrɛl, bikɔs, we pipul dɛn yɛri se dɛn kayn tin dɛn de apin, dɛn go de fred fɔ du bad.

²² Mozis tɛl dɛn se if pɔsin du tin we mek dɛn ɛŋ am na tik,

²³ in de dedebɔdi nɔ fɔ de na di tik te di nɛks de. I se dɛn fɔ bɛr am di sem de lɛ dɛn nɔ mek swɛ go na di land we PAPA GƆD we na dɛn PAPA GƆD gi dɛn, bikɔs PAPA GƆD put swɛ pan dayman we ɛŋ na tik.