Ditarɔnɔmi 20 - Krio Fɔs Oli Baybul

Aw Fɔ Fɛt Wa

¹ Mozis tɛl di Izrɛlayt dɛn se we dɛn go fɔ go fɛt dɛn ɛnimi dɛn, ɛn si se di ɛnimi dɛn plɛnti ɛn gɛt ɔs ɛn karej, dɛn nɔ fɔ fred. PAPA GƆD we na dɛn PAPA GƆD we bin pul dɛn kɔmɔt Ijipt, go de wit dɛn.

² I tɛl dɛn se bifo dɛn atak ɛni neshɔn, wan pan di man dɛn we de mek sakrifays fɔ pipul sin fɔ tɔk to di sojaman dɛn fɔs.

³ Mozis se di man we de mak sakrifays fɔ pipul sin fɔ tɛl dɛn se, we dɛn de kam go fɛt dɛn ɛnimi dɛn so, nɔbɔdi at nɔ fɔ de kɔt, nɔbɔdi nɔ fɔ panik, nɔbɔdi nɔ fɔ trimbul ɔ fred di ɛnimi dɛn,

⁴ bikɔs na PAPA GƆD we na dɛn PAPA GƆD insɛf de go fɛt di ɛnimi fɔ dɛn, ɛn i go mek dɛn win.

⁵ Mozis se afta dat, na di ɔfisa dɛn go tɔk to di sojaman dɛn. Dɛn go tɛl dɛn se if ɛnibɔdi no se in dɔn bil os ɛn i nɔ pre pan am yet, lɛ i go pre pan am wantɛm, bikɔs if i day, na ɔda pɔsin go pre pan am fɔ am,

⁶ ɛn ɛnibɔdi we de de we bin plant frut dɛn we dɔn rɛp, bɔt nɔ bɛnifit pan dɛn yet, lɛ i go bak nain os wantɛm, bikɔs if i day insay di fɛt, na ɔda man go ɛnjɔy in lebɔ.

⁷ If ɛnibɔdi de de we jɔs mared bɔt i nɔ tek in wɛf in vajin yet, lɛ i go bak, bikɔs if i day na di fɛt, na ɔda man go tek in vajin fɔ am.

⁸ Mozis se we dɛn go dɔn tɔk ɔl dat dɔn, di ɔfisa dɛn go aks dɛn se if ɛnibɔdi de de we in at wik ɛn de fred, lɛ i go bak wantɛm lɛ i nɔ kam mek in kɔmpin dɛn kam bigin fred.

⁹ We di ɔfisa dɛn dɔn tɔk dɔn, dɛn go pik lida dɛn fɔ di difrɛn sojaman grup dɛn.

¹⁰ Mozis tɛl di Izrɛlayt dɛn se, ɛni siti we dɛn go fɔ go atak, dɛn fɔ tɛl di pipul dɛn wetin dɛn fɔ du lɛ dɛn nɔ go atak dɛn fɔs.

¹¹ I tɛl dɛn se if dɛn gri fɔ pis, ɛn dɛn opin dɛn get lɛ di Izrɛlayt dɛn go insay ɛn go tek chaj na dɛn siti, di Izrɛlayt dɛn fɔ mek dɛn slev lɛ dɛn wok fɔ dɛn bay fos.

¹² Bɔt if dɛn nɔ gri fɔ pis ɛn dɛn rɛdi fɔ fɛt dɛn, Mozis se dɛn fɔ tinap rawnd dɛn siti; nɔbɔdi nɔ fɔ go insay, nɔbɔdi nɔ de kɔmɔt,

¹³ ɛn as PAPA GƆD we na dɛn PAPA GƆD mek dɛn kapchɔ di siti so, di Izrɛlayt dɛn fɔ kil ɔl di bɔypikin dɛn ɛn di man dɛn.

¹⁴ Bɔt i tɛl dɛn se dɛn nɔ fɔ kil di uman dɛn ɛn di lili pikin dɛn, ɛn dɛn fɔ tek dɛn kaw ship ɛn got dɛn ɛn ɔltin we de na di siti fɔ dɛnsɛf. Mozis tɛl dɛn igen se dɛn fɔ ɛnjɔy dɛn ɛnimi dɛn prɔpati dɛn we PAPA GƆD we na dɛn PAPA GƆD go gi dɛn.

¹⁵ I se na so di Izrɛlayt dɛn fɔ dil wit dɛn ɛnimi dɛn na ɔl dɛn siti dɛn we de fa frɔm di say we dɛn de.

¹⁶ Bɔt Mozis tɛl dɛn se we dɛn atak dɛn siti dɛn we de nia dɛn we PAPA GƆD we na dɛn PAPA GƆD go gi dɛn fɔ dɛn prɔpati, dɛn nɔ fɔ lɛf natin we gɛt layf;

¹⁷ dɛn fɔ nyakanyaka di Itayt ɛn di Amɔrayt dɛn, di Kenanayt ɛn di Pɛrizayt dɛn, di Ivayts ɛn di Jɛbyusayt dɛn, bikɔs na so PAPA GƆD we na dɛn PAPA GƆD dɔn se;

¹⁸ so dat dɛn nɔ go lan di Izrɛlayt dɛn, dɛn bad bad tin dɛn we dɛn bin de du, lɛk fɔ wɔship dɛn pegan gɔd dɛn we dat go mek di Izrɛlayt dɛn kɔmit sin to PAPA GƆD we na dɛn PAPA GƆD.

¹⁹ Mozis tɛl di Izrɛlayt dɛn se if dɛn fɛt ɛni neshɔn dɛn ɛn i tek dɛn lɔŋ tɛm fɔ kapchɔ dɛn, dɛn nɔ fɔ kɔt di tik dɛn we de de. I tɛl dɛn se dɛn nɔ fɔ wɛr dɛn aks dɛnsɛf pan di tik dɛn bikɔs dɛn go it di frut dɛn wande, ɛn di tik dɛn nɔto mɔtalman we dɛn go se go tinap fɔ fɛt dɛn.

²⁰ Mozis advays dɛn se dɛn kin kɔt dɛn tik dɛn we nɔ de bia frut, ɛn yuz dɛn fɔ mek lɛda dɛn fɔ klem na di pipul dɛn siti wɔl dɛn we dɛn go go fɛt, te dɛn ebul kapchɔ di siti.