Ditarɔnɔmi 2 - Krio Fɔs Oli Baybul

¹ Mozis se, we dɛn bin tɔn go bak na di ɛmti ples we pɔsin nɔ go ebul tap, dɛn bin go to di Rɛd Si jɛs lɛk aw PAPA GƆD bin se dɛn fɔ waka. Dɛn bin jɛs de go rawnd di il dɛn na Idɔm.

² Mozis se nain PAPA GƆD tɛl am se

³ i du so we dɛn paspas na da il de, so dɛn fɔ tɔn go nɔth.

⁴ I se PAPA GƆD se dɛn fɔ tek tɛm bikɔs dɛn de go pas usay dɛn broda dɛn, we na Isɔ in pikin dɛn de na di il kɔntri na Idɔm bikɔs we dɛn go si dɛn, dɛn go fred dɛn.

⁵ I se dɛn nɔ fɔ fɛt dɛn bikɔs PAPA GƆD se i nɔ go mek dɛn win. I nɔ go gi dɛn katin pan di pipul dɛn land fɔ ivin put wan fut sɛf, bikɔs i bin dɔn gi Isɔ Idɔm fɔ in ɛn in jɛnareshɔn.

⁶ I se dɛn fɔ pe fɔ dɛn it en wata we dɛn go it ɛn drink we dɛn de pas na dɛn land.

⁷ Mozis mɛmba dɛn se PAPA GƆD bin de blɛs ɔltin we dɛn bin de du ɛn ɔl di fɔti ia we dɛn de waka, dɛn nɔ slip aŋri wande; I bin de du ɔltin fɔ dɛn we dɛn bin de na di ɛmti ples we pipul nɔ go ebul tap.

⁸ Mozis se dɛn nɔ bin pas nia Isɔ in bɔypikin dɛn siti igen ɛn dɛn nɔ pas na di rod we kɔmɔt Ɛlat ɛn Iziɔŋeba, bifo dat dɛn bin tek di rod we go na di ɛmti ples we pipul dɛn nɔ go ebul tap na Moab.

⁹ Mozis se PAPA GƆD bin tɛl am se, dɛn nɔ fɔ fɛt di pipul dɛn na Moab bikos i nɔ go mek Izrɛl win. I nɔ go gi dɛn smɔl say sɛf fɔ put wan fut pan Moab dɛn land bikɔs i bin dɔn gi A to Lɔt fɔ in ɛn in jɛnareshɔn.

¹⁰ Na dɛn jayant dɛn we dɛn bin de kɔl di Ɛmim dɛn bin de na da land de. Dɛn bin b bɔku ɛn gɛt pawa ɛn bin ay ay lɛkɛ di Anakim dɛn.

¹¹ Di Moabayt dɛn bin de kɔl dɛn Ɛmim, bɔt ɔda pipul dɛn bin de kɔl dɛn ɛn di Anakim dɛn, Refaim.

¹² Na di Ɔrayt dɛn bin de de fɔs, bɔt na Isɔ in pikin dɛn bin go fɛt ɛn kil dɛn ɛn tek di land na dɛn an, jɔs lɛkɛ aw Izrɛl bin du fɔ tek di land we PAPA GƆD bin gi dɛn.

¹³ Mozis bin tɛl di Izrɛlayt dɛn se PAPA GƆD se lɛ dɛn tray go krɔs di Zɛrɛd Riva. So dɛn ɔl bin krɔs go na di ɔdasay.

¹⁴ I se frɔm di tɛm we dɛn bin lɛf Kedɛsh Bania te di tɛm we dɛn krɔs da Zɛrɛd Riva, i bin dɔn tek tati-et ia. Da tɛm de, ɔl di sojaman dɛn bin dɔn day bikɔs PAPA GƆD bin dɔn swɛ se dɛn go day.

¹⁵ PAPA GƆD bin vɛks pan dɛn tete i dɔnawe wit dɛn ɔl kpatakpata.

¹⁶ We ɔl di sojaman dɛn bin dɔn day,

¹⁷ PAPA GƆD bin tɛl Mozis se,

¹⁸ Da de de, dɛn go pas na di Moabayt dɛn kɔntri bay A.

¹⁹ I se we dɛn rich na di bɔda usay di Amonayt dɛn de, dɛn nɔ fɔ fɛt dɛn bikɔs in nɔ go mek Izrɛl win ɛn i nɔ go gi dɛn pan di Amonayt dɛn land bikɔs in bin dɔn gi Lɔt fɔ in jɛnareshɔn dɛn.

²⁰ Pipul dɛn bin no da land de fɔ dɛn jayant we dɛn bin de kɔl Refaim; na dɛn bin de de fɔs tɛn. Di Amonayt dɛn bin de kɔl dɛn Zamzumim.

²¹ Dɛn bin plɛnti ɛn gɛt pawa ɛn ay ay lɛkɛ di Anakim dɛn. Na PAPA GƆD bin kil dɛn ɔl bifo di Amonayt dɛn ebul go tap de.

²² Na so PAPA GƆD bin kil ɔl di Ɔrayt dɛn fɔseka Isɔ in jɛnareshɔn dɛn ɛn gi dɛn di land. Dɛn de de te tide.

²³ Fɔ di Avim dɛn we bin de na dɛn siti dɛn te rich Gaza, na di pipul dɛn we kɔmɔt Krit bin kam kil dɛn ɔl ɛn tek dɛn land.

²⁴ Mozis tɛl di Izrɛlayt dɛn se PAPA GƆD se dɛn fɔ pak dɛn tiŋs dɛn lɛ dɛn go krɔs Riva Anɔn fɔ go fɛt Sayɔn, we na di Amɔrayt dɛn kiŋ na Ɛshbɔn. I se dɛn fɔ fɛt am ɛn kapchɔ in land ɛn tek am fɔ dɛnsɛf, bikɔs in dɔn gi dɛn pawa fɔ bit an.

²⁵ I se PAPA GƆD se na da de de i go mek ɔlman na dis wɔl bigin fred Izrɛl ɛn trimbul we dɛn yɛri dɛn nem ɛn wetin dɛn ebul du.

Di Izrɛlayt Dɛn Bit Kiŋ Sayɔn

²⁶ Mozis tɛl di Iazrɛlayt dɛn se we dɛn bin de na da ɛmti ples we pɔsin nɔ ebul tap na Kɛdɛmɔth, in bin sɛn mɛsej to Kiŋ Sayɔn na Ɛshbɔn se dɛn nɔ nid fɔ fɛt,

²⁷ lɛ i alaw di Izrɛlayt dɛn fɔ pas insay in kɔntri. Dɛn go jɔs go tret usay dɛn de go.

²⁸ Dɛn go bay it ɛn wata to dɛn mek dɛn go gɛt tin fɔ it ɛn wata fɔ drink. I se lɛ i jɛs lɛ dɛn waka pas insay dɛn kɔntri nɔmɔ

²⁹ lɛkɛ aw Isɔ in pikin dɛn we de Sɛir ɛn dɛn Moabayt dɛn we de na A bin gri fɔ lɛ dɛn pas te dɛn krɔs Riva Jɔdan fɔr rich na di land we PAPA GƆD we na dɛn PAPA GƆD bin dɔn se i go gi dɛn.

³⁰ Bikɔs PAPA GƆD we na dɛn PAPA GƆD bin dɔn traŋa Kiŋ Sayɔn in at mek i go tinap fɔ fɛt mek dɛn go bit dɛn, i nɔ bin gri atɔl.

³¹ Mozis se PAPA GƆD tɛl am se, lɛ dɛn go insay di land go kapchɔ am wantɛm. I se PAPA GƆD se i go mek dɛn bit Kiŋ Sayɔn ɛn tek in land.

³² Kiŋ Sayɔn ɛn in pipul dɛn kɔmɔt fɔ fɛt dɛn na wan ples we nem Jeaz.

³³ Dɛn bin fɛt di fɛt ɛn PAPA GƆD we na dɛn PAPA GƆD bin mek Izrɛl bit dɛn bad bad wan; dɛn kil di kiŋ, in pikin dɛn ɛn ɔl in pipul dɛn.

³⁴ Dɛn bin kapchɔ ɔl in siti dɛn ɛn pwɛl dɛn kpatakpata. Dɛm bin kil ɔlman, uman ɛn pikin dɛnsɛf nɔ lɛf,

³⁵ pas di kaw ɛn got dɛn tek fɔ dɛnsɛf ɛn di ɔda tin dɛn we dɛn tek na dɛn siti dɛn.

³⁶ Mozis se frɔm Aroa we de nia di Anɔn vali ɛn di siti we de na di vali te rich Giliad, nɔn siti nɔ bin de we PAPA GƆD we na dɛn PAPA GƆD nɔ bin mek dɛn nɔ kapchɔ.

³⁷ Pas usay di Amonayt dɛn de, dat na di siti we Riva Jabɔk pas, ɛn di wan dɛn we de na di il, ɛn di say dɛn we PAPA GƆD bin se dɛn nɔ fɔ kapchɔ.